قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ قاسىم-جومارت توقايەۆپەن العاش قالاي تانىسقاندارىن ەسكە الدى دەپ جازادى Qamshy.kz اقپارات اگەنتتىگى. بۇل تۋرالى ەلباسى "Nur Otan" پارتياسى كانديداتىنىڭ رەسپۋبليكالىق شتابىنىڭ مۇشەلەرىمەن كەزدەسۋىندە ايتتى.

"1984 جىلى مەن ۇكىمەت باسشىسى بولىپ تۇرعانىمدا، كەڭەس وداعىنىڭ دەلەگاسياسىمەن  قىتايعا باردىم. ول كەز سسرو مەن قىتايدىڭ اراسىنداعى ساياسي كيكىلجىڭ ۋشىققان كەزەڭ ەدى. جوعارى كەڭەستىڭ دەلەگاسياسى قاتارىندا بىزگە جۇڭگو تىلىنەن اۋدارما جاساۋعا كومەكتەسكەن جاس جىگىت بولدى. ول جىگىت قىتايداعى سسرو ەلشىلىگىندە جۇمىس جاسايدى ەكەن. ول – قاسىم-جومارت توقايەۆ ەدى. قاسىم-جومارتپەن العاش كەزدەسۋىم وسىلاي بولىپ ەدى"، - دەدى وتكەندى ەسكە العان نۇرسۇلتان ءابىش ۇلى.

العاش تاۋەلسىزدىك العان جىلدارى قازاقستاننىڭ سىرتقى ىستەر مينيسترلىگىنە تاجىريبەلى ماماندار جەتىسپەگەنىن، سول ۋاقىتتا توقايەۆتى سىرتقى ىستەر ءمينيسترىنىڭ ورىنباسارى قىزمەتىنە شاقىرعانىن دا ەلباسى اتاپ ءوتتى.

"تاۋەلسىزدىك جىلدارى قازاقستان سىرتقى ىستەر مينيسترلىگىنە بىلىكتى ماماندار قاجەت بولدى، قاسىم-جومارت كەمەلۇلىن سىرتقى ىستەر ءمينيسترىنىڭ ورىنباسارى قىزمەتىنە شاقىردىم. سول كەزدەن بەرى بىرگە جۇمىس جاساپ كەلەمىز. سىزدەرگە مۇنىڭ بارلىعىن مەنىڭ بۇل ادامدى قانشالىقتى جاقىن تانيتىنىمدى ءتۇسىنسىن دەپ ايتىپ وتىرمىن. ادامدى بارىنشا جاقىن تاني ءتۇسۋ ءۇشىن، ونى جان-جاقتى زەرتتەۋ قاجەت، دوس رەتىندە، جولداس رەتىندە، نەگە قىزىعاتىنىن ءبىلۋ كەرەك"، - دەدى نۇرسۇلتان نازاربايەۆ

دايىنداعان: داۋرەن سىبانباي