نۇر-سۇلتاندا ق ر مەملەكەتتىك رامىزدەر كۇنىن اتاپ ءوتۋ اياسىندا قالالىق اكىمدىك «كوپبالالى وتباسى» ساناتى بويىنشا تۇرعىن ءۇي كەزەگىندە تۇرعان وتباسىلارعا جالعا بەرىلەتىن 150 پاتەردىڭ سەرتيفيكاتتارىن بەرۋدى باستادى دەپ حابارلايدى Qamshy.kz اقپارات اگەنتتىگى akimat_nur_sultan پاراقشاسىنا سىلتەمە جاساپ.

پاتەرلەردى بەرۋ ەكى كەزەڭنەن تۇرادى. ونىڭ العاشى كەزەڭىندە 17 ماۋسىمعا دەيىن قۇجاتتار جيناۋ جانە قابىلداۋ، ال ەكىنشى كەزەڭىندە 15 شىلدەدەن باستاپ قونىستاندىرۋ جۇمىستارى جۇرگىزىلەدى.
⠀
اكىمدىكتە اتاپ وتكەندەي، قابىلدانىپ جاتقان شارالار از قامتىلعان كوپبالالى وتباسىلاردىڭ باسپانا جاعدايىن جاقسارتۋعا مۇمكىندىك بەرەدى. بۇل ءوز كەزەگىندە قالا تۇرعىندارىنىڭ ءال-اۋقاتىنىڭ جوعارىلاۋىنا سەپتىگىن تيگىزەدى.
⠀
ايتا كەتەيىك، بۇگىندە ەلوردادا 46 مىڭ ادام تۇرعىن ءۇي كەزەگىندە تۇر. ونىڭ 3000-نان استامى كوپبالالى وتباسىلار.
⠀
تۇرعىن ءۇي كەزەگىندە حالىقتىڭ الەۋمەتتىك جاعىنان وسال توپتارىنا جاتاتىن ازاماتتار تۇر، ولاردىڭ قاتارىندا كوپبالالى انالار، تۇرمىسى تومەن ازاماتتار، مۇمكىندىگى شەكتەۋلى جاندار بار. ەلوردادا وسى جىلدىڭ سوڭىنا دەيىن شامامەن 2 مىڭ پاتەر بەرىلەدى.
⠀
«كوپبالالى وتباسى» ساناتىندا تۇرعىن ءۇي كەزەگىندە تۇرعان كوپبالالى وتباسىلار نۇر-سۇلتان قالاسى اكىمدىگىنىڭ «تۇرعىن ءۇي قورى» كوممۋنالدىق مەملەكەتتىك مەكەمەسىنە (ر.قوشقاربايەۆ، 39) جۇگىنۋى ءتيىس، بايلانىس ءنومىرى: 79-34-50.