نۇرلان نوعايەۆ داۋىس بەرەتىن ۋچاسكەسىنە جەرگىلىكتى ۋاقىتپەن ساعات 9.00-دە كەلدى.
اتىراۋ وبلىسىنىڭ بارلىق جەرىندە ق ر پرەزيدەنتى سايلاۋى جالعاسىپ جاتىر. جەرگىلىكتى ساعات 9.00-دە ن.تىلەندييەۆ اتىنداعى كىشى ونەر اكادەمياسىندا ورنالاسقان ءوز سايلاۋ ۋچاسكەسىنە ايماق باسشىسى نۇرلان نوعايەۆ كەلدى. اتىراۋ وبلىسىنىڭ اكىمى ءوڭىر تۇرعىندارىن مەرەكەمەن قۇتتىقتاپ، دۇرىس تاڭداۋ جاسايتىندارىنا سەنىم ءبىلدىردى.
-بۇگىن ەلىمىز ءۇشىن ەرەكشە ءمانى بار كۇن. تۇرعىندار ەرتەمەن سايلاۋ ۋچاسكەلەرىنە كەلىپ، تاڭداۋلارىن جاساپ جاتقاندارىنا قۋانىشتىمىن. بارلىق سايلاۋشىلارعا ورتاق ءبىر قۇندىلىق بار، ءبىز تىنىشتىق پەن كەلىسىم سالتانات قۇرعان، ءوز-وزىن جەتىلدىرۋگە بارلىق جاعداي جاسالعان بەيبىت ەلدە ءومىر سۇرگىمىز كەلەدى. ءبىز بۇگىن ەلىمىزدىڭ بولاشاعىن بىرگە تاڭدايمىز،-دەدى سايلاۋشىلارعا نۇرلان نوعايەۆ.
ايتا كەتەيىك، اتىراۋ وبلىسى اكىمىمەن بىرگە سايلاۋعا ءوڭىردىڭ ەڭ ەگدە جاستاعى تۇرعىنى بالزيبا ءماجيتوۆا كەلدى. 101 جاستاعى قاريا سايلاۋ ۋچاسكەسىنە تۋىستارىمەن كەلگەن.
-ەل پرەزيدەنتىنىڭ سايلاۋىنا ءبىرىنشى رەت قاتىسىپ تۇرعان جوقپىن. جاسىما قاراماستان سايلاۋ ۋچاسكەسىنە ءوزىم كەلدىم. قازاقستاندا ۇزاق ءومىر سۇرەتىن ادامدار جىل ساناپ كوبەيە بەرسىن، ەلىمىز دامىپ، وركەندەي بەرسىن دەگەن تىلەكتەمىن،-دەدى بالزيبا اجە.
اتىراۋ وبلىسىندا داۋىس بەرەتىندەر تىزىمىندە 409 679 سايلاۋشى بار.
سايلاۋ كوميسسيالارىنىڭ جالپى سانى- 271، ونىڭ 262ء-سى ۋچاسكەلىك، 9 اۋماقتىق (وبلىستىق، قالالىق جانە 7 اۋداندىق).
داۋىس بەرۋ 262 سايلاۋ ۋچاسكەسىندە ءجۇرىپ جاتىر. 12 سايلاۋ ۋچاسكەسىنە كىرۋ شەكتەلگەن، ونىڭ 9-ى ەمدەۋ مەكەمەلەرىندە، 2-ەۋى اسكەري بولىمشەلەردە، 1-ەۋى تەرگەۋ يزولياتورىندا.