مادەنيەت جانە سپورت ءمينيسترى اقتوتى رايىمقۇلوۆا تەرميندەردى وزگەرتۋ شارالارى تۋرالى اڭگىمەلەدى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

ءمينيستردىڭ ايتۋىنشا، حالىقارالىق تەرميندەردى قازاق تىلىنە قايتارۋ ءۇشىن تەرمينولوگيالىق قورعا مونيتورينگ جۇرگىزىلدى. وسىعان وراي بۇرىن قازاق تىلىنە اۋدارىلعان 3 300-نان استام جالپىعا بىردەي قابىلدانعان تەرمين مەن ۇعىم قايتا قارالىپ بەكىتىلدى.  

"ولاردىڭ 300-گە جۋىعى – حالىقارالىق تەرميندەر. مىسالى، "مۇراجاي" دەگەن ءسوز "مۋزەي" بولاتىن بولدى. مۇراعات – ارحيۆ، تاعى سونداي-سونداي نارسەلەر"، – دەدى رايىمقۇلوۆا بۇگىنگى ەسەپ بەرۋ كەزدەسۋىندە. 

بۇدان بولەك، ازاتجول – ابزاس، پايىز – پروسەنت، سىنىپ – كلاسس، قۇرسىم – شينا،  تەڭگەرىم – بالانس، ءانۇران – گيمن، مۇقاممال – ينۆەنتار، اقاۋ – دەفەكت، شەگەندەۋ – دەماركاسيا، مەيرامحانا – رەستوران، قيمىل – انيماسيا، ال "الەۋەت" دەگەن ءسوز "پوتەنسيال" بولىپ قايتا وزگەرتىلدى.

"بۇگىندە "Termincom.kz" سايتىنىڭ نەگىزىندە تەرمينولوگيانىڭ قازىرگى جاعدايى مەن نەگىزگى قاعيدالارى تۋرالى اقپاراتتاندىرۋ ءۇشىن ەلەكتروندى پلاتفورما ىسكە قوسىلدى"، - دەپ اتاپ كورسەتتى رايىمقۇلوۆا.