ءبىلىم جانە عىلىم ءمينيسترى اسحات ايماعامبەتوۆ "سىنىپ" ءسوزىن قايتادان "كلاسقا" اۋىستىرۋعا قاتىستى جەكە ويىن ايتۋدان باس تارتتى، ءبىراق مۇنىڭ قابىلدانعان شەشىم ەكەنىن جەتكىزدى دەپ حابارلايدى Qamshy.kz اقپارات اگەنتتىگى Sputnik سايتىنا سىلتەمە جاساپ. 

"وعان قاتىستى جەكە ويىمدى ايتقىم كەلمەيدى. ويتكەنى بۇل – قابىلدانعان شەشىم. سوندىقتان ونى ايتپاي-اق قويايىن، تۇسىنىكتەمە بەرمەي-اق قويايىن"، - دەدى ايماعامبەتوۆ 

ايتا كەتەيىك، ماۋسىم ايىندا مادەنيەت جانە سپورت ءمينيسترى اقتوتى رايىمقۇلوۆا وتكەن ەسەپ بەرۋ كەزدەسۋى كەزىندە حالىقارالىق تەرميندەردى قازاق تىلىنە قايتارۋ ءۇشىن تەرمينولوگيالىق قورعا مونيتورينگ جۇرگىزىلگەنىن جەتكىزدى. وسىعان وراي بۇرىن قازاق تىلىنە اۋدارىلعان 3 300-دەن استام جالپىعا بىردەي قابىلدانعان تەرمين مەن ۇعىم قايتا قارالىپ بەكىتىلدى.

"ولاردىڭ 300-گە جۋىعى – حالىقارالىق تەرميندەر. مىسالى، "مۇراجاي" دەگەن ءسوز "مۋزەي" بولاتىن بولدى. مۇراعات – ارحيۆ، تاعى سونداي-سونداي نارسەلەر"، – دەدى رايىمقۇلوۆا.

بۇدان بولەك، ازاتجول – ابزاس، پايىز – پروسەنت، سىنىپ – كلاسس، قۇرسىم – شينا،  تەڭگەرىم – بالانس، ءانۇران – گيمن، مۇقاممال – ينۆەنتار، اقاۋ – دەفەكت، شەگەندەۋ – دەماركاسيا، مەيرامحانا – رەستوران، قيمىل – انيماسيا، ال "الەۋەت" دەگەن ءسوز "پوتەنسيال" بولىپ قايتا وزگەرتىلدى.

ال الەۋمەتتىك جەلىدە "سىنىپ" پەن "كلاسس" سوزدەرى قىزۋ تالقىلانعانى بەلگىلى. بىرەۋلەر وسى ۋاقىتقا دەيىن "سىنىپقا" ابدەن ۇيرەنگەنىن جازسا، ەندى بىرەۋلەر "كلاسستىڭ" قايتا كەلگەنىنە قۋاندى.