رەسەيلىك ساراپشىلار 2019 جىلدىڭ سوڭىنا قاراي ءرۋبلدىڭ السىرەۋى مۇمكىن ەكەنىن جوققا شىعارمايدى. بۇنىڭ كورشىلەس قازاقستان ەكونوميكاسىنا دا سالقىنى ءتيۋى ىقتيمال.

lsm.kz سايتىنىڭ جازۋىنشا، الەمدىك شيكىزات نارىعىنداعى جاعدايات رەسەيگە قاراعاندا، قازاقستانعا كوبىرەك اسەر ەتەدى. وعان قازاقستان ەكونوميكاسىنىڭ ءارتاراپتانباۋى مەن شيكىزاتتىق تاۋار ۇلەسىنىڭ كوپ بولۋى سەبەپ.

ەكونوميست الەكساندر يۋرين اعىمداعى جاعدايدا تەڭگە رۋبلگە قاتىستى بىرتىندەپ السىرەپ جاتقانىنا نازار اۋداردى.

شيكىزات باعاسى ارزاندايتىنداي بولسا، تەڭگە باعامى رۋبلدىڭ جاعدايىنا قاراماستان قۇنسىزدانادى. ءرۋبلدىڭ السىرەۋى دە ۇلتتىق ۆاليۋتاعا تەرىس اسەر ەتەدى. سوندىقتان قالاي قاراسا دا تەڭگە باعامى تومەندەيدى دەگەن پىكىردە ساراپشى.

الەكساندر يۋرين 385 تەڭگەلىك شاماداعى دوللار باعامى ەندى 4 پايىزعا كۇشەيسە، 400 تەڭگە شاماسىنا جەتەتىنىن ەسكەرتتى.

"بۇنداي جاعدايدا جىل سوڭىنا دەيىن 1 دوللار 400 تەڭگە باعامىنىڭ ورناۋى شىندىققا جاناساتىن سەناريي"، دەيدى ول.