ق ر ەكولوگيا، گەولوگيا جانە تابيعي رەسۋرستار ءمينيسترى م. مىرزاعالييەۆتىڭ باستاۋىمەن رەسپۋبليكالىق دەڭگەيگە ۇلاسقان "بىرگە - تازا قازاقستان" ەكولوگيالىق اكسياسىنىڭ نەگىزگى ماقساتى - قورشاعان ورتانىڭ تازالىعىنا ءبىراۋىزدان اتسالىسۋ، سول ارقىلى جاس جەتكىنشەكتەرگە ۇلگى كورسەتۋ بولىپ تابىلادى.

اكسياعا وبلىس بويىنشا بارلىعى 2000-عا جۋىق ادام، ونىڭ ىشىندە مەملەكەتىك مەكەمەلەر جانە مەملەكەتتىك ەمەس ۇيىمدار قاتىستىرىلىپ، 100 تەحنيكا جۇمىلدىرىلدى. ايماق بويىنشا 25 تاريحي جانە دەمالىس ورىندارىندا تازالاۋ جۇمىستارى جۇرگىزىلىپ، سول جەرلەردەن بارلىعى 300 تونناعا جۋىق قوقىس تاسىپ شىعارىلدى.

ايتا كەتەيىك، قازاقستان پرەزيدەنتى قاسىم-جومارت توقايەۆ Twitter جەلىسىندەگى پاراقشاسىندا ەكو-چەللەندج قوزعالىسىن تولىق قولدايتىنىن جازعان بولاتىن.

"ۇكىمەت پەن ازاماتتىق قوعامنىڭ باستاماسىمەن بۇكىل ەل بويىنشا جۇزەگە اسىرىلىپ جاتقان ەكو-چەللەندج قوزعالىسىن تولىق قولدايمىن. ەلدى تازالىق ايماعىنا اينالدىرايىق. بىرگە - تازا قازاقستان! جارايسىڭدار، ۆولونتەرلار!" - دەپ جازدى مەملەكەت باسشىسى.

#Birge #TazaQazaqstan