قازاقستاننىڭ مەكتەپ باعدارلاماسىنا ەكى جىلدان كەيىن قايتا ورالعالى جاتقان الىپپە احمەت بايتۇرسىن ۇلىنىڭ ادىستەمەسى نەگىزىندە وقىتىلادى دەيدى. دەگەنمەن، بۇل ماسەلەگە قاتىستى عالىمدار تاراپىنان ءبىرقاتار سۇراقتار بار دەپ جازادى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

ءمينيستردىڭ مالىمدەمەسى قانداي؟

تامىز كونفەرەنسياسىندا ءبىلىم جانە عىلىم ءمينيسترى اسحات ايماعامبەتوۆ مەكتەپتىڭ وقۋ باعدارلاماسىنا الىپپەنىڭ قايتا ەنگىزىلەتىنىن مالىمدەدى.

"ۇستازدار مەن اتا-انالار كوپتەن الىپپە ماسەلەسىن كوتەرىپ ءجۇر. بۇل ماسەلە وتە ماڭىزدى. ءبىز الىپپەنى قايتارۋ كەرەك دەپ ەسەپتەيمىز. ول 2021 جىلى، وزدەرىڭىزگە جاقسى تانىس، قازاق تىلىنە بەيىمدەلگەن احمەت بايۇرسىنوۆتىڭ ادىستەمەسى نەگىزىندە ەنگىزىلەتىن بولادى"، - دەدى ايماعامبەتوۆ.

مينيستر "ويدان ەشتەڭە قۇراستىرۋدىڭ قاجەتى جوق" دەگەن پىكىرىن دە جەتكىزدى. سەبەبى بىزدە قازاق تىلىنە بەيىمدەلگەن ادىستەمە بار. ول - احمەت بايتۇرسىنوۆتىڭ ادىستەمەسى. الىپپە سونىڭ نەگىزىندە جاسالادى.

سوندا الىپپە قالاي وزگەرەدى؟

تامىز كونفەرەنسياسىنان كەيىن وتكەن باسپا ءسوز ءماسليحاتىندا مينيستر مىرزا جاڭا وقۋلىقتا ءبىرقاتار وزگەرىستىڭ بولاتىنىن دا ايتىپ قالدى.

"ءبىز ەگەمەن ەلدە تۇرىپ جاتىرمىز. سوندىقتان ىشكى قۇرىلىمى قازىرگى زامانعا قاراي وزگەرتىلەتىن بولادى. ءبىراق قازاق تىلىنە بەيىمدەلگەن احمەت بايتۇرسىنوۆتىڭ ادىستەمەسى نەگىزىندە ازىرلەنۋى كەرەك"، - دەيدى ايماعامبەتوۆ.

عالىمداردى ءدال وسى وزگەرىس ماسەلەسى الاڭداتىپ وتىر. پروفەسسور ايگۇل سماقوۆانىڭ ايتۋىنشا، مينيستر جاقسى جاڭالىقتى جاريالاسا دا، وعان قاتىستى نەگىزگى ماسەلەلەردى اشىق ايتقان جوق.

"مينيستر الىپپە احمەت بايتۇرسىن ۇلىنىڭ ادىستەمەسى نەگىزىندە قايتىپ كەلەدى دەدى. ال الىپپە لاتىن نۇسقاسىندا بولا ما؟ قازىرگى ءبىز سويلەپ جۇرگەن كيريلل نۇسقاسىندا بولا ما؟ سەبەبى احمەت بايتۇرسىن ۇلىنىڭ الىپپەسى توتە جازۋداعى الىپپە. ءبىز ونداي جازۋدى قولدانىپ جۇرگەن جوقپىز. مىنە، بۇل ماسەلە اشىق قالدى. سوندىقتان حالىققا وسىنى ءتۇسىندىرۋ كەرەك"، - دەدى سماقوۆا.

عالىمنىڭ ايتۋىنشا، بۇگىندە لاتىن گرافيكاسىنا كوشۋگە قاتىستى ناقتى جوسپار بار. الايدا الىپپەنىڭ لاتىن نۇسقاسى بەكىتىلمەگەن.

"مەنىڭشە، الىپپە قازىرگى كيريلل قارپىمەن شىعۋى كەرەك. سەبەبى بۇگىندە ءبىزدىڭ ءتىل عالىمدارى ۇسىنىپ جاتقان لاتىن نۇسقاسى شيكىلەۋ. سوندىقتان بالالاردىڭ ميىن اشىتپاي، الىپپەنى الدىمەن ءوزىمىز ۇيرەنگەن نۇسقادا ەنگىزگەن دۇرىس. ارتىنشا لاتىن ءالىپبيى تالقىلاۋدان ءوتىپ، بەكىتىلگەننەن كەيىن كوشۋگە وڭاي بولادى"، - دەپ اتاپ كورسەتتى سماقوۆا.