بۇگىن قازاقستاندىقتار ءۇشىن ايرىقشا كۇن! ويتكەنى وسىدان 120 جىل بۇرىن العاش رەت قازاق دالاسىندا مۇناي اتقىلاپ، ەلىمىزدىڭ تاريحى جاڭا كەزەڭگە بەت بۇرعان ەدى. وسىناۋ تاريحي ءسات قارساڭىندا مايتالمان مۇنايشىلار دا، اعا بۋىننىڭ ءىزىن جالعاعان جاس ۇرپاق تا كيەلى ماڭعىستاۋ وڭىرىندە باس قوستى.

"ماڭعىستاۋداعى ءىرى مۇناي كەن ورىندارىنىڭ تابىلۋى، شىن مانىندە، تۇبەكتەگى تىرلىكتى تۇبەگەيلى وزگەرتىپ، تاريحتىڭ جاڭا بەتتەرىن اشتى. تابيعات انانىڭ قۇشاعىنداعى قازىنانى شاشاۋ شىعارماي، ەل يگىلىگىنە بەرىپ وتىرعان ادال ەڭبەكتەرىڭىزگە ريزاشىلىعىم شەكسىز. مۇنايشىلاردىڭ ەڭبەككە جۇمىلعان ەرەن كۇشى مەن قيىن قىزمەتتە ءبىر جەڭنەن قول، ءبىر جاعادان باس شىعارا العان ىنتىماعىنىڭ جەمىسى. قاجىرلى ەڭبەكتەرىڭىز ەشقاشان ۇمىتىلمايدى. سىزدەر كۇنى كەشە جەر قويناۋىنان قارا مارجاندى ءسۇزىپ الىپ، كەيىنگى ۇرپاعىنىڭ بولاشاعىنا التىن جول سالعان اعا بۋىننىڭ ءداستۇرىن لايىقتى جالعاستىرىپ كەلەسىزدەر. بىلىم-بىلىك جانە كۇش-قايراتىن قازاقستاننىڭ دامۋىنا جۇمساعان بۇگىنگى مۇنايشىلاردىڭ ەسىمى تاريح بەتتەرىندە التىن ارىپەن جازىلعانى انىق" – دەدى مەرەكەلىك كەشتە مۇنايشىلاردى قۇتتىقتاپ، ءسوز العان ايماق باسشىسى سەرىكباي ترۇموۆ.

ايتا كەتەيىك، قازىرگى تاڭدا ەلىمىزدە وندىرىلەتىن مۇناي-گاز سالاسىنىڭ 30%-ى ماڭعىستاۋ ايماعىنا تيەسىلى. بۇل دەگەنىمىز جىلىنا 18 ملن.توننادان استام مۇناي جانە 3 ملرد.تەكشە مەتر تابيعي گاز. كومىرسۋتەكتى شيكىزاتتىڭ نەگىزگى كولەمىن «ماڭعىستاۋمۇنايگاز»، «وزەنمۇنايگاز»، «قاراجانباسمۇناي»، «بوزاشى وپەرەيتينگ لتد» كومپانياسىنىڭ فيليالى، «قاراقۇدىقمۇناي» ج ش س وندىرەدى. وبلىس بيۋدجەتىنىڭ دە باسىم بولىگى دە وسى مۇناي-گاز سالاسىنان تۇسكەن سالىقتار مەن مىندەتتى تولەمدەر نەگىزىندە قۇرالادى. ماسەلەن، تەك بيىلعى جىلدىڭ العاشقى التى ايىندا ءوڭىر قازىناسى «ماڭعىستاۋمۇنايگازدىڭ» وندىرىستىك قىزمەتى ناتيجەسىندە 4،3 ملرد. تەڭگەگە تولىقتى. ال بۇل، ءوز كەزەگىندە مەملەكەتتىڭ قوعام الدىنداعى مىندەتتەمەلەرىنىڭ جۇزەگە اسۋىنىڭ، ايماق كەلبەتىنىڭ اجارلانا ءتۇسۋىنىڭ كەپىلى. كومپانيانىڭ الەۋمەتتىك سەرىكتەستىك نەگىزىندە كورسەتەتىن كومەگى كوپشىلىككە بەلگىلى.

سالتاناتتى جيىن اياسىندا ماڭعىستاۋ ءوڭىرىنىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن بىرنەشە ازاماتتار ماڭعىستاۋ وبلىسى اكىمىنىڭ قۇرمەت گراموتاسىمەن، "مۇناي-گاز كەشەنىن دامىتۋعا قوسقان ۇلەسى ءۇشىن" ق ر ەنەرگەتيكا مينيسترلىگىنىڭ مەدالىمەن ماراپاتتالدى.

جيىننان سوڭ قوناقتار داڭقتى مۇنايشى - سافي وتەبايەۆتىڭ ەسكەرتكىشىنە گۇل شوقتارىن قويدى. بيىل قازاق مۇنايىنىڭ كەمەڭگەر تۇلعاسى سافي وتەبايەۆتىڭ تۋىلعانىنا 110 جىل تولىپ وتىر. مۇناي ابىزىنىڭ ەسكەرتكىش-بيۋستىنە تاعزىم ەتۋ ميتينگىسىن "قازمۇنايگاز" ۇك" اق باسقارما ءتوراعاسى اليك ايداربايەۆ اشتى. ۇلتتىق كومپانيا باسشىسى قازاق مۇنايىنىڭ 120 جىلدىعى مەن قالامقاس كەنورنىنىڭ 40 جىلدىعىنا وراي مۇناي-گاز كەشەنى قىزمەتكەرلەرىن ءتول مەرەكەسىمەن قۇتتىقتاپ، الداعى ىستەرىنە تولاعاي تابىس تىلەدى.