قازاقستاندا بالالارىنا ەكپە سالدىرۋدان باس تارتقان اتا-انالار جازالانۋى مۇمكىن دەپ جازادى Qamshy.kz اقپارات اگەنتتىگى sputniknews.kz سايتىنا سىلتەمە جاساپ. 

ءبىراق بالالارعا قاجەتتى ەم كورسەتىلەتىن بولادى، دەپ دەنساۋلىق ساقتاۋ مينيسترلىگى جاڭا زاڭنىڭ نورماسىن ءتۇسىندىردى.

"زاڭ جوباسىندا بالالارىنىڭ ەكپە سالدىرۋ قۇقىعىن بۇزعان اتا-انالارعا قاتىستى ايىپپۇل سانكسيالارىن ەنگىزۋ تۋرالى ۇسىنىستار بار. جوبا ءالى ازىرلەنىپ جاتىر، وعان ۇسىنىستار ەنەتىن بولادى"، - دەلىنگەن حابارلامادا.

بالاسىنا ەكپە سالدىرماعاندارعا ايىپپۇل سالىنادى.

دەنساۋلىق ساقتاۋ مينيسترلىگى اتاپ وتكەندەي، بالاعا ەكپە سالىنباي، سونىڭ سالدارىنان اۋرۋعا شالدىقسا، تەگىن مەديسينالىق كومەك كورسەتىلەدى.

"ايىپپۇل اتا-انالاردىڭ بارىنە بىردەي سالىنبايدى. ءبىراق ەكپەدەن باس تارتۋ سالدارىنان اۋىرعان بالالاردىڭ ەمىن مەملەكەت تولەيدى. وسىنداي جاعدايدا عانا ايىپپۇل سالىنۋى مۇمكىن. ەكپە سالدىرماعان بالا اۋىرماسا، اتا-اناسى جازالانبايدى"، - دەپ مالىمەت بەردى ۆەدومستۆو.

بۇعان دەيىن دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى ءتوراعاسى ليۋدميلا بيۋرابەكوۆا حابارلاعانداي، قازاقستاندا ەكپە سالىنباعان بالالاردى اتا-انالاردىڭ ەسەبىنەن ەمدەۋدى قاراستىراتىن نورما ەنگىزىلۋى مۇمكىن.

دەنساۋلىق ساقتاۋ مينيسترلىگىنىڭ مالىمەتىنشە، بيىل التى مىڭداي ەكپەدەن باس تارتۋ جاعدايى تىركەلگەن. بارلىق اتا-انامەن جەكە-جەكە جۇمىس جۇرگىزىلىپ جاتىر.

ۆەدومستۆو ەكپەدەن باس تارتۋ سەبەپتەرىن دە اتاپ ءوتتى: شامامەن 50%ء-ى – جەكە ۇعىمى بويىنشا (الماتى، نۇر-سۇلتان، شقو)، 35%ء-ى – ءدىني نانىم-سەنىمىنە بايلانىستى (ماڭعىستاۋ، اتىراۋ، اقتوبە) جانە 15%ء-ى ەكپەنىڭ ساپاسىنان كۇدىكتەنەدى، سونداي-اق باق-تاعى جاعىمسىز جاڭالىقتار مەن ەكپەنىڭ سالدارىنان قورقادى ەكەن.