جۋىردا جۋالى اۋدانىنىڭ قوشقار اتا اۋىلىندا اۋداندىق «جاستار رەسۋرستىق ورتالىعىنىڭ» ۇيىمداستىرۋىمەن ايماقتىق كوكپار سايىسى ءوتتى،.

قوشقاراتا اۋىلدىق وكرۋگىنىڭ اكىمى جانىبەك مىرزالييەۆ، اۋداندىق «جاستار رەسۋرستىق ورتالىعىنىڭ» اۋىلدىق وكرۋگتەردەگى جاستار ءىسى نۇسقاۋشىلارى سايىستى ارنايى تاماشالادى.

شارانىڭ اشىلۋىندا ءسوز العان اۋداندىق «جاستار رەسۋرستىق ورتالىعىنىڭ» ديرەكتورى مەيىرجان تەلەۋشوۆ پەن قوشقار اتا اۋىلدىق وكرۋگتىڭ اكىمى جانىبەك مىرزالييەۆ اۋدان اكىمدىگىنىڭ قولداۋىمەن العاش رەت وتكىزىلىپ وتىرعان ايماقتىق كوكپار سايىسىنىڭ باستى ماقساتى وسكەلەڭ ۇرپاقتىڭ بويىنا ۇلتتىق قۇندىلىقتاردى ءسىڭىرۋ ەكەنىن ايتا كەلە، جينالعان قاۋىمعا ريزاشىلىقتارىن ءبىلدىردى. سونىمەن قاتار اۋىل اقساقالى بولات بايسىماقوۆ قاتىسۋشىلارعا ساتتىلىك تىلەپ، اق باتاسىن بەردى.

تانىمال كوكپارشى ساعىنعالي جامال ۇلى تورەلىك ەتكەن كوكپار باسەكەسى تارتىسقا تولى بولىپ، كوپشىلىكتىڭ دەلەبەسىن قوزدىردى. ءوزارا ەكى توپقا بولىنگەن كوماندالار ءوزارا سىنعا ءتۇسىپ، دودا كوركىن قىزدىردى.

العاشقى اينالىمدا رىسبەك باتىر جانە اقتاستى اۋىلدارىنىڭ شاباندوزدارى كەزدەسىپ، ءوزارا مىقتىنى انىقتادى. ءبىرىنشى اينالىم ناتيجەسىندە 2: 1 ەسەبىمەن رىسبەك باتىر اۋىلىنىڭ جاستارى باسىم ءتۇسىپ، سالىمعا نۇرحات ەسماحان ۇلى مەن نۇرداۋلەت جاڭاباي ۇلى قول جەتكىزدى. بۇدان كەيىن قوشقاراتا جانە قىزتوعان اۋىلدارى اراسىندا وتكەن سايىس 4: 0 ەسەبىمەن الاڭ يەلەرىنىڭ پايداسىنا شەشىلدى. اقتاستى جانە قىزتوعان كوماندالارى اراسىندا وتكەن باسەكەدە اقتاستى شاباندوزدارىنىڭ مەرەيى ۇستەم بولدى.

اقتىق سايىسقا قوشقاراتا جانە رىسبەك باتىر كوماندالارى شىعىپ، جارىستىڭ باس بايگەسىن ورتاعا سالدى. سايىس قورىتىندىسى بويىنشا، ءبىرىنشى ورىندى قوشقاراتا كومانداسى يەمدەنسە، ەكىنشى جانە ءۇشىنشى ورىندى رىسبەك باتىر جانە اقتاستى كوماندالارى ءوزارا ءبولىستى. سونداي-اق، قوشقاراتا كومانداسىنىڭ شاباندوزى جولداس جاندوس «ۇزدىك شابۋىلشى نوميناسياسىنا يە بولسا، كوكپارعا جاراۋ ات دايىنداعان ساكەن قىرعىزبايەۆ «ۇزدىك ات باپكەرى» اتالىمىمەن ماراپاتتالدى. جەڭىمپاز كوماندالار مەن جارىس ۇزدىكتەرىنە «جاستار رەسۋرستىق ورتالىعى» مەكەمەسىنىڭ ارنايى ديپلومدارى مەن باعالى سىيلىقتارى تابىس ەتىلدى.

شارانى قورىتىندىلاعان وكرۋگ اكىمى كوكپار باسەكەسىنىڭ وتۋىنە مۇرىندىق بولعان اۋداندىق «جاستار رەسۋرستىق ورتالىعىنا» العىسىن ءبىلدىردى.