جامبىل وبلىسىنىڭ ازاماتتىق حال اكتىلەردى تىركەۋ قىزمەتى مۇراعاتىندا جامبىلدىقتاردىڭ 82 جىلدىق مالىمەتتەرى جيناقتالعان. ولاردىڭ اراسىندا قازاق تىلىندە لاتىن قارپىمەن تولتىرىلعان ءىس-قاعازداردى كەزىكتىرۋگە بولادى، دەپ جازادى Qamshy.kz اقپارات اگەنتتىگى. 

ەلباسى ءوزىنىڭ «بولاشاققا باعدار: رۋحاني جاڭعىرۋ»، «ۇلى دالانىڭ جەتى قىرى» اتتى ماقالالارىندا قازاق تىلىنە نەگىزدەلگەن لاتىن قارپىنە كوشۋ، مۇراعاتتىق دەرەكتەردى ەلەكتروندى فورماتقا اۋىستىرۋ ارقىلى ونىڭ پايدالانۋىن وڭتايلاندىرۋدى كوزدەيتىن «ارحيۆ–2025» مەملەكەتتىك باعدارلاماسى جايىندا ايتقان بەلگىلى. جامبىل وبلىسىنداعى ازاماتتاردىڭ حال اكتىلەرىن تىركەۋ قىزمەتىنىڭ ارحيۆىندەگى ەسكى مۇراعاتتىق دەرەكتەر ەلباسى ماقالاسىندا كوتەرىلگەن باستامالاردىڭ باياندىلىعىن اڭعارتا تۇسەدى. بىرىنشىدەن مۇنداعى 1941 جىلعا دەيىن مۇراعاتتىق دەرەكتەر قازاق تىلىندە لاتىن قارپىمەن جازىلعان. دەمەك بۇل ەلباسىنىڭ لاتىننەگىزدى قازاق ءالىپبيىن قولدانىسقا ەنگىزۋ باستاماسىنىڭ تاريحي العىشارتى سانالادى. ەكىنشىدەن ارحيۆتەگى مۇراعاتتىق مالىمەتتەردىڭ بارلىعى 2008 جىلعا دەيىن قولمە جازىلىپ كەلگەن. تەك مۇراعاتتىق مالىمەتتەردى تىزىمدەۋدە ءبىرىڭعاي «رپ زاگس» اقپاراتتىق جۇيەسىنە كوشۋ باستالعاننان بەرى جامبىلدىق مۇراعاتشىلاردا سيفرلاندىرۋدىڭ وزىق ءادىسىن كادەگە جاراتا باستادى.

–قازىرگى تاڭدا ازاماتتىق حال اكتىلەردىڭ ەلەكتروندى مۇراعاتىن جاساۋ ءىسى قولعا الىندى. قورداعى بارلىق تىركەۋ كىتاپشالارى سيفرلى فورماتقا كوشىرىلدى. قىزمەتكەرلەر ونداعى جازبالاردى تۇزەتۋمەن شۇعىلدانىپ جاتىر. جالپى ەلەكتروندى ارحيۆ حالىققا سۇراتىلعان مەملەكەتتىك قىزمەتتەردى جەدەل كورسەتىپ، زاڭگەرلەردى سۇرانىستارىن دا تەز ارادا قاناعاتتاندىرۋعا مۇمكىندىك بەرەدى. ال وبلىس تۇرعىندارىنىڭ تالاي جىلعى ازاماتتىق حال اكتىلەرى تىركەلگەن كىتاپشالار وبلىستىق ادىلەت دەپارتامەنتىنىڭ مۇراعاتىنىڭ قورىنا الىنىپ، قۇندى تاريحي دەرەك رەتىندە ساقتالاتىن بولادى،– دەيدى جامبىل وبلىستىق ادىلەت دەپارتامەنتىنىڭ ازاماتتىق حال اكتىلەردىڭ تىركەلۋىن قاداعالاۋ جانە قامتاماسىز ەتۋ، اپوستىلدەۋ ءبولىمى باسشىسى ءلاززات اباشوۆا.

راسىندا ازاماتتىق حال اكتىلەردى تىركەۋ قىزمەتى مۇراعاتىنداعى بۇل قۇجاتتار 82 جىل ىشىندەگى وبلىستىڭ قوعامدىق-ساياسي ومىرىنە تاريحي زەرتتەۋ جۇرگىزۋگە نيەتتى تاريحشىلار ءۇشىن قۇندى دەرەككە اينالماق. ءارى ولاردىڭ سيفرلى فورماتقا كوشىرىلۋى دە ەلباسى ماقالاسىنان تۋىنداعان مىندەتتەردى جۇزەگە اسىرۋداعى وڭىردەگى سان سالاداعى مۇراعات ءىسى ماماندارىنىڭ بەلسەنە كىرىسكەندىگىن كورسەتەدى.