ەلباسىنىڭ «ۇلى دالانىڭ جەتى قىرى» اتتى ماقالاسىندا ۇرپاق ساناسىندا تاريحقا، تاريحي تۇلعالارعا وڭ كوزقاراس قالىپتاستىرۋ ماقساتىندا كينو ونەرىن دامىتا وتىرىپ، قازاق كينو ونەرىندە ەلىمىزدىڭ تاريحىنان سىر شەرتەتىن دەرەكتى-قويىلىمدىق فيلمدەردىڭ، تەليەۆيزيالىق سەريالدار مەن تولىقمەتراجدى كوركەم كارتينالاردىڭ ارنايى سيكلىن وندىرىسكە ەنگىزۋ جايى ايتىلادى. وسى ماقساتتا تاراز قالاسىندا جاس كينوگەرلەردىڭ باسىن ءبىر ارناعا توعىستىرعان «Taraz Film Scholl» دەپ اتالاتىن كينو مەكتەبى جۇمىس جاسايدى، دەپ جازادى Qamshy.kz اقپارات اگەنتتىگى. 

جاقىندا عانا اتالعان جاس رەجيسسەر داۋرەن قامشىبايەۆ جەتەكشىلىك ەتەتىن مەكتەپتەن ءتالىم العان جاس كينوگەرلەر تۇسىرىلگەن «قايسار»، «No limites» اتالاتىن فيلمدەر جارىققا شىقتى. بۇل فيلمدەردىڭ باستى كەيىپكەرلەرى مۇمكىندىگى شەكتەۋلى بولعانىنا قاراماستان ماقساتىنا جەتۋ جولىندا مويىماعان جاندار. ءارى فيلم اۆتورلارى مۇندا گولليۆۋدتىق كينوكارتينالاردا قولدانىلاتىن ءتاسىلدى وڭتايلى قولدانا بىلگەن. اتالعان فيلمدەردى كورەرمەندەر «Taraz Film Scholl» كينو مەكتەبىنىڭ «يۋتۋب» جەلىسىندەگى كانالىنان تاماشالاي الادى. «قايسار» كينوسى ارقىلى وڭىرگە تانىمال بولعان جاس اكتەر ماديار قۇرمانبايەۆ تاراز كينو مەكتەبىنىڭ مۇمكىندىگى مول ەكەنىن العا تارتادى. ول «Taraz Film Scholl» كينو مەكتەبىنەن ارنايى كاستينگتەن ءوتىپ كەلگەن. ءۇش ايعا سوزىلعان اكتەرلىك شەبەرلىكتى جەتىلدىرۋ كۋرستارى دا مادياردىڭ تالانتىن شىڭداي تۇسكەن. سونىڭ ناتيجەسى بولسا كەرەك «قايسار» ءفيلمىن تۇسىرۋگە جۇمىلدىرىلعان شىعارماشىلىق توپ ءوز جۇمىستارىن نەبارى 5 كۇندە اياقتاۋ مۇمكىندىگىنە يە بولعان.

كينو مەكتەبىندەگى تالاپتى جاستاردىڭ جىگەرىن جانۋ ماقساتىندا ءتۇسىرىلىم جۇمىستارىنا وتاندىق كينو الەمىنە تانىلعان جاس بەلگىلى اكتەر ەلجان راحيمبەكوۆ تە قاتىسقان. ءوزىنىڭ اقش-تاعى ءومىرى ارقاۋ بولعان «ەل فريمان» تۋىندىسىمەن تانىلعان تالانتتى جاستىڭ ونەرى «Taraz Film Scholl» كينو مەكتەبى شاكىرتىنە ونەگە بولارى انىق.

ايتا كەتۋ كەرەك تارازدىق كينوگەرلەردىڭ تۋىندىسىندا باستى ءرولدى ويناعان بارلىق ونەرلى ورەندەرگە قولداۋ ءبىلدىرۋ ماقساتىندا تاراز مەملەكەتتىك پەداگوگيكالىق ۋنيۆەرسيتەتىنىڭ رەكتورى ەرجان امىربەك ۇلى ولارعا 100 پايىزدىق گرانت تابىستادى.

قازىرگى تاڭدا تاجىريبەسى تولىسىپ، تەحنولوگيا جابدىقتالۋى جاعىنان جوعارى دەڭگەيگە قول جەتكىزگەن جاس كينوگەرلەر مەكتەبى بىرنەشە اۋقىمدى جوبالاردى قولعا العان.