2000 جىلدان استام تاريحى بار تاراز قالاسى ءتۇرلى ايتۋلى وقيعالاردىڭ قارت شەجىرەشىسى. مۇندا الەم تاريحىنا بەلگىلى ادامداردىڭ ءىزى قالعان. ولاردىڭ اراسىندا تانىمال ونەر جۇلدىزدارىنىڭ دا ءبىر شوعىرىن كەزىكتىرۋگە بولادى. 1975 جىلى سول كەزدەگى جامبىل قالاسىنا جۇمىس ساپارىمەن كەلگەن سسسر حالىق ءارتىسى يۋريي نيكۋلين مەن سسسر-دىڭ ەڭبەك سىڭىرگەن ءارتىسى ليۋدميلا گۋرچەنكو مۇندا «سوعىسسىز وتكەن جيىرما كۇن» ءفيلمىنىڭ كەي ەپيزودتارىن ءتۇسىردى، دەپ جازادى Qamshy.kz اقپارات اگەنتتىگى. 

بەلگىلى ورىس جازۋشىسى كونستانتين سيمونوۆتىڭ سەناريى بويىنشا تۇسىرىلگەن «سوعىسسىز وتكەن جيىرما كۇن» ءفيلمى ونىڭ سوڭعى تۋىندىلارىنىڭ ءبىرى بولىپ تابىلادى. ال فيلمگە الەكسەي گەرمان باس رەجيسسەرلىك ەتكەن. ايتپاقشى ءتۇسىرىلىم كەزىندە كينوكارتينانىڭ باس كەيىپكەرلەرى اتاقتى يۋريي نيكۋلين مەن ليۋدميلا گۋرچەنكو سول كەزدەگى جامبىل قالاسىنداعى ەڭ ءىرى شوقان ۋاليحانوۆ اتىنداعى كينوتەاتردا جامبىلدىقتارمەن جۇزدەسكەن. كەزدەسۋ بارىسىندا ارتىستەر جاڭا ءفيلمنىڭ ءتۇسىرىلۋ بارىسى جانە جانە ونىڭ كەيىپكەرلەرى تۋرالى اڭگىمە وربىتكەن.

فيلم ۇلى وتان سوعىسىنىڭ قىزعان شاعىندا 20 كۇندىك دەمالىس الىپ ەلگە ورالعان اسكەري جۋرناليست، جازۋشى ۆاسيليي ءلوپاتيننىڭ باستان كەشكەن وقيعاسىمەن ءوربيدى. وسى دەمالىستا جاۋىنگەر ءوزىنىڭ ەرلىكپەن قازا تاپقان قارۋلاسىنىڭ تاشكەنت قالاسىندا تۇراتىن تۋىستارىنا جولىعىپ، زاتتارىن ءوز قولىمەن تابىستاۋدى ءجون دەپ سانايدى. وسىندا جەر اۋدارىلعان ءوز ايەلىمەن دە جولىعىپ، ءوز اۆتورلىعىمەن ءتۇسىرىلىپ جاتقان ءفيلمنىڭ بارىسىمەن تانىسقان مايور ەلى ءۇشىن، ءۇمىتتى كوزبەن مايداننان اكەسىن كۇتكەن بۇلدىرشىندەردىڭ، ءسۇيىپ قوسىلعان جارىن كۇتكەن ايەلدەردىڭ كوزىنە قاراپ مايدان ساپىن تولىقتىرۋ ازاماتتىق بورىشى ەكەنىن تۇسىنەدى. فيلم ۇلى وتان سوعىسىنىڭ ەڭ ءبىر شەشۋشى كەزەڭىندەگى ەلدىڭ جاعدايىن انىق سۋرەتتەيدى. اسىرەسە «ءبارى دە مايدان ءۇشىن» دەپ جان تالاسقان حالىقتىڭ ارەكەتى ەلدە دەمالىپ جاتقان وفيسەرگە ۇلكەن وي سالادى. سونداي-اق مايدانعا كەتكەن ەرلەرىنەن قارا قاعاز كەلسە دە ءۇمىت ۇزبەگەن كەڭەس ايەلدەرىنىڭ قايسارلىعى مەن تاباندىلىعىنا ءتانتى بولادى.

وسىنىسىمەن فيلم 1977 جىلى فرانسياداعى جىل سايىنعى جورجا سادۋليا اتىنداعى سىيلىققا يە بولدى. ال 1987 جىلى بۇل كينوكارتينا روتتەردامداعى حالىقارالىق كينوفەستيۆالدە سىنشىلاردىڭ وڭ باعاسىنا يە بولىپ، ارنايى تاعايىندالعان سىيلىققا قول جەتكىزدى.