كەشە اقپارات اگەنتتىكتەرى «قازتەلەراديو» كومپانياسى اكسيالارىنىڭ تولىق پاكەتى رەسپۋبليكالىق مەنشىككە بەرىلگەنى جونىندە حابار تاراتتى. ءبىر قاراعاندا، بۇل – مەنشىكتەۋ يەسى يتتەي ساپىرىلىسقان ەلدەگى قاتارداعى حابار سياقتى ەستىلەدى. ءبىراق بىلە بىلگەنگە – بۇنىڭ استارىندا ۇلكەن ساياسي ءمان جاتىر.

ورتالىق ءوفيسى مەن نەگىزگى تەحنيكالىق قۇرال-جابدىعى الماتى قالاسىندا ورنالاسقان «قازتەلەراديو» اكسيونەرلىك قوعامى – ەلدە تەليەۆيزيا جانە راديو حابارلارىن تاراتۋدىڭ ۇلتتىق وپەراتورى سانالادى. ەفيرلىك سيگنالى بۇكىل قازاقستانعا تارايتىن بارشا وتاندىق «تۆ» مەن «رۆ» وسى وپەراتوردىڭ قىزمەتىنە مۇددەلى. ەگەر ۇلتتىق وپەراتور تولقىننىڭ تۇتقاسىن تارتىپ قالسا، «31-ارنا» مەن «كتك» تۇگىلى، «حابار» مەن «قازاقستان» دا قاراڭ قالادى. «قازاق راديولارى» مەن ۇساق-تۇيەك راديو-تەلەجاشىكتەردىڭ حابار تاراتۋ دياپازونى دا وسى وپەراتوردىڭ قىزمەتتىك قۇزىرىنا تاۋەلدى.

ال ەندى وسى «قازتەلەراديونىڭ» قىزمەتىندە قانداي «ساياسي ءمان» بولۋى مۇمكىن؟
تىكەلەي! ءماننىڭ ءمانىسى توقايەۆ مىرزانىڭ پرەزيدەنتتىك ەرىك-جىگەرىنە تىكەلەي تىرەلەدى. ەگەر ول سايلانعان پرەزيدەنت رەتىندەگى ءرولدىڭ رەتىمەن تىكەلەي ەفيرگە شىعىپ، «كىتاپحاناعا» كىرىپتار بولۋعا ءماجبۇر ەكەنىن ايتىپ، حالىقتان قولداۋ سۇرايتىن بولسا، ەلدەگى وزگەرىسكە وزەۋرەگەن جۇرتشىلىق جوڭكىلىپ، الاڭعا اتىپ شىعۋى ابدەن مۇمكىن. (ەسكە سالايىق: «ءبىرىنشى پرەزيدەنت»، «قاۋىپسىزدىك كەڭەستىڭ» ءتوراعاسى دەگەن جاساندى لاۋازىمداردى تاقىمىنا تىعىپ، «نۇر وتاندى» جاستانىپ العان ن.نازاربايەۆتىڭ اكىمشىلىگى «ءبىرىنشى پرەزيدەنتتىڭ كىتاپحاناسى» دەپ اتالاتىن عيماراتتا وتىر. بۇگىندە استانالىق يستەبليشمەنت قوس بيلىكتى «اقوردا» جانە «كىتاپحانا» دەپ اتايدى).

ال توقايەۆ مىرزا «جاساندى» بيلىك يەسىنىڭ ساياسي-ينتريگالىق قيتۇرقىلىعىنان قۇتقارۋعا حالىقتان اراشا سۇراي ما، جوق پا – ول ەندى باسقا اڭگىمەنىڭ تاقىرىبى. ازىرگە ايتپاعىمىز – بۇعان دەيىن «قازتەلەراديو» اكسيونەرلىك قوعامىنا «ءبىرىنشىنىڭ» ءبىرىنشى قىزى داريعا نازاربايەۆانىڭ كومانداسى يەلىك ەتىپ كەلگەن. كومپانيا پاكەتىنىڭ قوماقتى بولىگى دە، وعان باسشىلىق جاساپ وتىرعان مەنەدجەرلەر توبى دا – داريعا حانشايىمنىڭ «جۇگىرمەكتەرى» ەدى.
تاعى ءبىر ەسكە سالاتىن ءجايت – ەلدەگى ساياساتتى سارنايتىن «حابار»، «كتك»، «ەۆرازيا – ءبىرىنشى ارنا» تۆ-لارى، باسقا دا تورت-بەس «فم» راديولار نازاربايەۆانىڭ نازارىندا ەكەنى ءمالىم (شوۋ-دۋمانعا قاتىسى بار كودەدەي كوپ «رۆ-تۆ»-لاردى ايتپاعاندا). ەندى، مىنە، بۇلاردىڭ بارلىعى ءبىر كۇندە حابار تاراتۋ تەحنيكاسى جاعىنان مەملەكەتكە تاۋەلدى بولىپ شىعا كەلدى. داريعا دالادا قالدى... ما؟

بۇل قانداي ساياسي قيساپتى بىلدىرەدى؟ ق ر پرەزيدەنتى قاسىم-جومارت توقايەۆ ءوزىنىڭ «وكىل اكەسىمەن» تىكەلەي تەكەتىرەسكە كەتتى مە؟ ەلدەگى اقپارات تاراتۋ كەڭىستىگىنە يەلىك قۇزىرى نازاربايەۆتىڭ «كىتاپحاناسىنان» توقايەۆتىڭ «اقورداسىنا» (ياعني، مەملەكەتكە) ءوتتى مە؟

البەتتە، بۇل سۇراقتاردىڭ جاۋابىن جۋىق ماڭدا بىلە الماسپىز. بىلەتىنىمىز ءبىر نارسە – قالاي بولعاندا دا، سايلانعان پرەزيدەنت توقايەۆ پەن «بيلىكتىڭ باسقىنشىسى» نازاربايەۆتىڭ اراسىنداعى تەكەتىرەس بىرتە-بىرتە ايقىندالا ءتۇستى. وعان ءبىر مىسال – توقايەۆتىڭ قىتايعا ساپارى: بۇرىنعى پرەزيدەنت قىتايعا بارعان سايىن، بىرەر ميلليارد قارىزدى قالتاسىنا سالا كەلەتىن؛ توقايەۆ – «ەكى جاققا ورتاق بيزنەستى بىرلەسىپ جاسايىق» دەپ قايتتى.
توقايەۆ بارلىق كەزدەسۋلەردە قازاق جانە جۇڭگو تىلدەرىندە عانا سويلەدى. ەسىك-تەسىككە كىرگەن جەرىنىڭ بارىندە اۋىز جاپپاي، تەك قانا ورىسشا سويلەيتىن نازاربايەۆتىق ءداستۇردىڭ «اۋزىن ۇرىپ قويدى». ورىسشالاپ ايتقاندا: «چەم نە ۆىزوۆ؟ مەلوچ، نو پرياتنو...».

بۇل ەكى ارادا توقايەۆ جۇڭگو جەرىندە جۇرگەندە، نازاربايەۆ ماسكەۋگە – پۋتينگە «جالوبا» جاساپ باردى: «ەل اراسىندا بەدەلى جوق...» دەپ سىپسىڭ قاعىپ. بۇل دا «ۆىزوۆ»: «اياز، ءالىڭدى ءبىل!» دەگەن سىڭايى. توقايەۆتىڭ بىرتە-بىرتە حالىققا بەت بۇرا باستاعان ءتۇرى نازاربايەۆتىڭ قىزىليت ءىشىن كۇيدىرىپ بارادى...

كورنەۋ كوزگە كورىنە بەرمەيتىن مۇنداي تەكەتىرەستىڭ «تۇرلەرى» كۇن سايىن قىلاڭ بەرەر ءتۇرى بار. ءبىز ارينە ايسبەرگتىڭ ءۇستىن عانا بىلمەيمىز: ونىڭ استىندا جان الىپ، جان بەرىستىڭ ارپالىسى ءجۇرىپ جاتقانى انىق. وتكەندە پرەزيدەنتتىڭ اپپارات باسشىسى قىرىمبەك كوشەربايەۆ «سەنىمنەن شىقتى» دەگەن توقايەۆتىق توقەتەرمەن شىمكەنتتىڭ اكىمىن ورنىنان الىپ تاستادى. ول العاشىندا قاڭعىپ كەتەردەي كۇيدە ەدى، كەيىننەن نازاربايەۆتىق «نۇر وتاننىڭ» جيىنىندا جايناڭ قاعىپ وتىردى. ول – ول ما، «سەنىمنەن شىققان» ادام كۇنى كەشە پرەمەردىڭ كەڭەسشىسى بولىپ شىعا كەلدى. ياعني، بۇل تەكەتىرەسكە توقايەۆتىق ۇكىمەتتىڭ باسشىسى مامين دا تارتىلدى دەگەن ءسوز. بۇل ەندى «بولەە سەرەزنىي ۆىزوۆ»: پرەمەر-مينيستر «كىتاپحانانىڭ» دەگەنىنە مويىنسۇندى دەگەن ءسوز.

ال ەكەۋارا ەرەگەستىڭ كوكەسى كەشەلى-بەرى باستالدى: توقايەۆ ءوزىنىڭ حالىققا جولداۋىندا بەيبىت جيىندارعا ەرىك بەرۋ كەرەك دەدى؛ نازاربايەۆتىڭ «جاندارمەرياسى» «شەرۋگە شىقتى»، «دۆك-نى قولدادى» دەپ، ازاماتتىق بەلسەندىلەردى تاعى دا سوتتاي باستادى. ايدالعانداردىڭ العاشقىسى 15 كۇندىك اباقتىعا ءتۇستى.

ءتۇبىن قۋىپ كەلگەندە، بۇل تارتىستىڭ ەكى جاققا دا ءجونى بار: تۋمىسىنان توقپەيىل توقايەۆ كورگەن تالىمىنە ساي، شاما-شارقى كەلگەنشە حالىققا قىزمەت ەتىپ كەتكىسى بار؛ ال تۇتاس مەملەكەتتەن باستاپ، ءبىر قالانى ءوز اتىنا مەنشىكتەپ العان نازاربايەۆتىڭ جوعالتارى كوپ. كىم ءوزىنىڭ وتىز جىل جيعان-تەرگەنىن تەگىن تاراتىپ بەرگىسى بار دەيسىڭ؟...

قىسقاسى، قوس وكىمەت قوسارلانىپ، ۇزاق ءجۇرۋى مۇمكىن ەمەس: نە نازاربايەۆ تاعى ءبىر قيتۇرقى قيمىلدى باستايدى؛ نە توقايەۆ ءبىر كۇنى «جارىلادى». نەگىزى، قارسىلاسىنا قاراعاندا، ىشكى دۇنيەسى الدەقايدا تازا قاسەكەڭنىڭ قاستىققا ۇشىراماي، حالىق جاعىندا «جارىلعانى» جاقسى بولار ەدى...
كىم ءبىلسىن؟!

ەرمۇرات ءباپيدىڭ فەيسبۋك پاراقشاسىنان الىندى.