مەملەكەتتىك تىلدە پروكاتقا شىققان 32ء-شى فيلم سيقىرعا تولى حيكايامەن جالعاسىن تاپتى.

كورسەتىلىم "وزىڭنەن باستا" جوباسى اياسىندا "بولاشاق" كورپوراتيۆتىك قورى جانە "مەلومان" كومپانياسىنىڭ باستاماسىمەن "نۇر وتان" پارتياسىنىڭ قولداۋىمەن جۇزەگە اسىرىلعان.

تۋىندىنى دۋبلياجداۋعا ەۋرازيالىق توپ (ERG) دەمەۋشىلىك ەتتى.

جوبانىڭ كوركەمدىك ناقىشىن كەلتىرۋگە بەكبولات قۇرمانقوجايەۆ، قۋانىش بيسەعالي، ناۋرىز ساباعان، التىناي نوگەربەك، گۇلنار قۇرمانبەكوۆا، ءابىلمانسۇر سەرىكوۆ ۇلەس قوسقان. 

دىبىستاۋ – ەكىنشى ويناپ شىعۋ ونەرى. ياعني وريگينالدى تۇردە ويناۋدان ەرەكشەلەنەدى. دەگەنمەن ءار اكتەردىڭ سەزىمىن، باسىنان اياعىنا دەيىنگى وقيعاسىن الىپ شىعۋ – ويناپ شىعۋدىڭ ەرەكشە ءبىر ءتۇرى سانالادى.

ەكىنشى ماۋسىمداعى جاڭا كەيىپكەر – ينگريد پاتشايىم. العاشىندا جاعىمدى، سۇيكىمدى پاتشايىم بولعانىمەن، ونىڭ بارلىق ايلاسى، ىشىندەگى جوسپارلارى ءفيلمنىڭ سوڭىنا قاراي اشىلادى. راسىنا كەلگەندە جاعىمسىز كەيىپكەر بولىپ شىعادى. ال ونى دىبىستاعان ا. نوگەربەك. اكتريسانىڭ ايتۋىنشا، ينگريد پاتشايىمىنىڭ داۋسىن دىبىستاۋى ومىرىندە قىزىقتى تاجىريبە بولعان.

دۋبلياج رەجيسەرى نازەركە لەسبەك قىزى فيلمدەگى باستى تاقىرىپ – انا مەن بالا اراسىنداعى ماحاببات ەرەكشە سۋرەتتەلگەنىن اتاپ ءوتتى.  اتاپ ايتقاندا كەيىپكەرلەر گۇلنار قۇرمانبەكوۆا (اۆرورا) مەن گۇلناز اۋەلبەكوۆا (مالەفيسەنتا) اراسىنداعى وتە نازىك، جۇرەكتى تەربەيتىندەي ەتىپ، دىبىستالۋىنان اڭعاراسىز دەيدى. ءفيلمدى قازاقشالاۋداعا اتىسقان ءوز ءىسىنىڭ ماماندارى "قىزىقتى دىبىستاۋ بولدى. ءار اكتەردىڭ  وزگەگە ۇقسامايتىن داۋىس بوياۋلارى كورەرمەننىڭ جۇرەگىن جاۋلايدى" دەگەن سەنىممەن سوزدەرىن تۇيىندەدى.

تۋىندىداعى باستى كەيىپكەر مالەفيسەنتانى دىبىستاعان گۇلناز اۋەلبەكوۆا جوباعا 2014 جىلى كاستينگ ارقىلى ءوتىپ، ءبىرىنشى بولىمىنەن باستاپ وسى ۋاقىتقا دەيىنگى انجەلينا ءدجوليدىڭ داۋسىن تۇراقتى سالاتىن ءارتىس رەتىندە بەكىتىلگەن.

كارتينادا تۇنەك پەريزاتى مەن بولاشاق پاتشايىمنىڭ اراسىنداعى كۇردەلى ءوزارا بايلانىس، سيقىرلى ورماندى قورعاۋداعى جاڭا وداقتاستار مەن قارسىلاستار جانە وندا ءومىر سۇرەتىن سيقىرلى تىرشىلىك يەلەرى تۋرالى اڭگىمەلەيدى. جەر انانىڭ بارشا تىرشىلىك يەسىنە تيەسىلى ەكەندىگى ايتىلىپ، ومىردە جاقسىلىق پەن زۇلىمدىقتىڭ قاتار جۇرەتىنىن سۋرەتتەپ، ءار كەز قايدان شىققان تەگىن ۇمىتپاۋ كەرەكتىگىن ەسكە سالادى. الەمدەگى بار پروبلەمانى شىنايى ماحاببات پەن تاتۋلىق، بىرلىك-ىنتىماق ارقىلى شەشۋگە بولادى دەپ قورىتىندىلايدى.

تۇساۋكەسەرگە كەلگەن ءانشى، اكتريسا اقەركە بۇركىتبايدىڭ دۋبلياج جونىندە پىكىرىن بىلگەن ەدىك.

«قازاقشا اۋدارىمدا مەن قاراپ تۇرعان ءتورتىنشى فيلم. ماعان وتە قاتتى ۇنادى. تىپتەن، ءبىزدىڭ تىلىمىزدەن ۇمىتىلىپ بارا جاتقان كەيبىر قازاقشا ادەمى سوزدەردى فيلمدەردەن قاراپ، جادىما ءتۇيىپ الىپ ءجۇرمىن. تۇساۋكەسەرگە كىشكەنتاي بالالاردى كوبىرەك شاقىرادى. ولدا دۇرىس. سەبەبى، كىشكەنتايىنان ءتىل مادەنيەتىنە دەگەن كوزقاراستارىن جاقسى قالىپتاستىرۋعا ۇلەسىن قوسادى» – دەپ ءوز ويىن ايتتى.

ايتا كەتسەك، فيلم ەكى تىلدە اۋقىمدى كينوپروكاتقا 17 قازاننان باستاپ شىعادى.