ەلىمىزدىڭ وڭتۇستىك وڭىرىنە جاساعان ساپارىنىڭ ەكىنشى كۇنىندە تۇركىستان وبلىسىنىڭ ءبىرقاتار شالعاي ەلدىمەكەندەرىن ارالاپ، ايگىلى وتىرارعا ات باسىن تىرەگەن «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك تۇركىستان وبلىسىنىڭ اكىمى ءومىرزاق شوكەيەۆپەن بىرگە وتىرار ارحەولوگيالىق قورىق مۋزەيىندە ءوڭىردىڭ ەل اعالارىمەن جانە زيالى تۇلعالارىمەن كەزدەستى.

باس قوسۋ بارىسىندا ءوڭىردىڭ جاي-كۇيى، مادەنيەت، رۋحانيات، ءبىلىم، تۋريزم سالالارى، ونەر مەن ءتىلدىڭ احۋالى اڭگىمە ارقاۋىنا اينالىپ، كەلەلى كەڭەسكە ۇلاستى. پارتيا ءتوراعاسىنىڭ ءبىرىنشى ورىنباسارى جينالعاندارعا وسى ساپارىنىڭ ماقساتىنا توقتالىپ، ساياسي ۇيىمنىڭ قولعا العان ىستەرى مەن الداعى جوسپارلارى جايىندا كەڭىنەن اڭگىمەلەدى.

«ەلباسىنىڭ شەشىمىمەن تۇركىستان – تۇركى الەمىنىڭ رۋحاني استاناسى بولىپ اتاندى. كۇزدە مۇندا ۇلكەن ءىس-شارا ءوتىپ، وعان تۇركى ەلدەرىنىڭ باسشىلارى كەلەدى. مۇنداي جيىندار وڭىرگە تۋريستەر تارتۋعا دا وڭ ىقپالىن تيگىزەدى. دۇرىس ۇيىمداستىرسا، تۋريزم سالاسىندا كوپ جۇمىس ورىندارىن اشۋعا بولادى. مۇندا تۋريزم جاقسى دامىپ كەلەدى. ارىستان-بابقا كەلىپ جاتقان حالىقتىڭ سانى جىل سايىن وسۋدە. وسىنى دۇرىس پايدالانا ءبىلۋ كەرەك.

جالپى، رۋحانياتسىز ەل بولمايدى. مادەنيەت، ءداستۇر، ءتىل، ونەر سەكىلدى رۋحاني قۇندىلىقتار – پارتيامىزدىڭ دا باستى باسىمدىقتارى. ساياسي ۇيىمىمىز اسىل ونەرىمىز – ايتىستى، جىر-تەرمەلەردى، ۇلتتىق سپورتتى قولداپ كەلەدى. ەلباسى باستاماسىمەن قولعا الىنعان «رۋحاني جاڭعىرۋ» باعدارلاماسى دا وسىعان باعىتتالعان. رۋحاني جاڭعىرۋ دەگەنىمىز – ۇلتتىق كودىمىزدى ساقتاپ، مادەنيەتىمىزدى، ءداستۇرىمىزدى ناسيحاتتاپ، باسقا وزىق ەلدەردىڭ جاقسى جاقتارىن يگەرۋ ارقىلى وزگەرۋ. وسىعان وراي بيىل ءال-فارابيدىڭ 1150 جىلدىعىن، ۇلى ابايدىڭ 175 جىلدىعىن اتاپ وتكەلى جاتىرمىز. وسىناۋ وتىرار – دانىشپان بابامىز ءال-فارابيدىڭ كىندىك قانى تامعان جەرى. كەيدە الەۋمەتتىك جەلىلەردە قاراجات ءبولىپ، نەگە مەرەيتويلاردى تويلاي بەرەمىز دەگەن پىكىرلەر ۇشىراسىپ قالادى.ۇلى بابالارىمىزدى قادىرلەپ، مۇراسىن ۇرپاققا تانىستىرماساق، قالاي ەل بولامىز. كەمەڭگەر اباي كوزدەگەن مۇراتقا ۇمتىلۋ، سىلتەگەن جولىن ۇستانۋ، سىناعان كەمشىلىكتەردەن ارىلۋ – بارشامىزعا ورتاق پارىز»، – دەدى باۋىرجان بايبەك.

ەمەن-جارقىن سۇحبات بارىسىندا زيالىلار دا ءوز ۇسىنىس-تىلەكتەرى مەن ويلارىن بۇكپەسىز ورتاعا سالدى. بەلگىلى جازۋشى مارحابات بايعۇت پارتيا ايتىسپەن قاتار كوركەم ادەبيەتكە دە كوبىرەك كوڭىل ءبولىپ، وسى كەزگە دەيىن ىسكە اسىرىلا باستاعان «ءبىر ەل – ءبىر كىتاپ» دەگەن اكسيانى پارتيالىق باقىلاۋعا الىپ، ونى قايتا جانداندىرۋ ارقىلى اياسىن كەڭەيتۋدى ۇسىندى. سونىمەن بىرگە جاڭادان وبلىس ورتالىعى بولىپ وتىرعان قاسيەتتى تۇركىستاندى، ادامزاتتىڭ التىن بەسىگى بولعان قازىعۇرتتى ءارتۇرلى ادەبي-مادەني شارالار ارقىلى ناسيحاتتاۋ، «تۇركىستاننىڭ تاي قازانى – تۇركىلەردىڭ وي قازانى» دەگەن تاقىرىپپەن سانا ساپاسىن ارتتىراتىن جاقسى كىتاپتارعا، جاقسى درامالىق شىعارمالارعا، باسقا دا مادەني-رۋحاني دۇنيەلەرگە بايقاۋلار ۇيىمداستىرسا دەگەن تىلەگىن دە جەتكىزدى. ال وسى ءوڭىردىڭ تۇلەگى، ايگىلى ايتىسكەر اقىن اسەلحان قالىبەكوۆا «Nur Otan» پارتياسىنىڭ ايتىسقا بەت بۇرىپ، قولداپ جاتقانىنا ريزاشىلىعىن ءبىلدىرىپ، ونى ورىستەتە بەرۋ قاجەتتىگىن ايتتى.

سونداي-اق، كەزدەسۋدە وڭىردەگى مەكتەپتەردىڭ جەتىسپەۋشىلىگى، جاسوسپىرىمدەر اراسىنداعى قىلمىس، سۋيسيد سەكىلدى جۇرتشىلىقتى تولعاندىرعان تۇيتكىلدى جايتتار دا ءسوز بولىپ، ولاردىڭ الدىن الۋ شارالارى تالقىلاندى. «Nur Otan» پارتياسىنىڭ دوكتريناسىندا دا جاستار مەن ۇرپاق تاربيەسىنە ەرەكشە ماڭىز بەرىلگەن.