اقىن ازامات مالجانباي قوعام بەلسەندىسى، تەرگەۋ يزولياتورىندا قايتىس بولعان دۋلات ءاعادىلدىڭ قازاسىنا بايلانىستى ۇلى جانبولات ءاعادىلدىڭ اتىنان مونولوگ جازدى.
جانبولات ءاعادىلدىڭ مونولوگى
اكەسى دۋلاتقا ارنالادى:
اسىل اكە ءوزىڭ باردا قاسىمدا،
بايقاماپپىن، باقىتتى ەكەم راسىندا.
تالاپكەردىڭ تاڭىن بۇگىن قارسى الدىم،
جىلاپ تۇرىپ بەيىتىڭنىڭ باسىندا.
كوپ دەۋشى ەدىڭ، ەل مەن جەر دەپ ولگەندەر،
كەشە قاتتى تولقىدى عوي كومگەندە ەل.
كىم ويلاعان جەرگە تىعىپ كەتەر دەپ،
جەدەل جاردەم كولىگىمەن كەلگەندەر.
ول سۇمدارعا اشپاعان ەم ەسىكتى،
تەۋىپ كىرىپ، زورلىعىمەن شوشىتتى.
اكەتاي-اۋ، سەن اڭساعان «ادىلەت»،
وسى جولى اجال بولىپ جەتىپتى.
ءسىز ايتقان سوڭ الاش جايلى وقىعام،
وسيەتىڭدى كوكەيىمە توقىعام.
37-جىلدارداعى سۇمدىقتار،
ءبىزدىڭ ۇيدە بولعانىنا شوشىنام.
دۋلاتوۆتاي بولسا ەكەن دەپ باتىلدى،
قويىپتى دەپ ايتىپ ەدىڭ اتىڭدى.
سول ارىستاي سەندە كەتتىڭ جان اكە،
تۇسىنە الماي مىناۋ نۇرلى عاسىردى.
جەر قايىستى جانازاڭا كەلگەندە،
وزەگىمە ءورت تۇتاندى كومگەندە.
بالكىم بىزدە ءتىرى جەتىم بولماس پا ەك،
وسى حالىق سەن تىرىدە ەرگەندە.
پانا بولار زار بولىپ ءبىر قالقاعا،
التى جەتىم اڭىرادىق ارقادا.
ەندى ءبىزدىڭ جان-جارامىز جازىلماس،
التى الاش كەلىپ الاقانعا سالسادا.
بالاڭ قالدى جەتىم بولىپ سور قايناپ،
انام قالدى جەسىر بولىپ ويبايلاپ.
ءوز باسىڭا دومالايتىن جارتاسقا،
مەرت بولدىڭ-اۋ اكە قاتتى ايعايلاپ.
قازاق ءۇشىن تۇرامىن دەۋشى ەڭ ولگەنشە،
اكە سەنى جاۋ كوردى عوي كومگەنشە.
تۇل جەتىمنىڭ ازابىنا شىدارمىز،
وسى جۇيە ءسىزدى ءولتىرىپ جوندەلسە.
اكە وزىڭە ءبىز تۇگىلى، ەل زار بولدى،
ءوز ساقشىمىز وزىمىزگە جاۋ بولدى.
ءبىزدى وسىلار قورعايدى دەپ ءجۇرۋشى ەم،
ءسابي جۇرەك تۇسىنە الماي دال بولدى.
اكە سەنەن دەۋشى ەدىك كوپ ۇلگى الساق،
ءنار بەرەتىن تامىر ەدىڭ ءبۇر جارساق.
اكە سەنىڭ تىنشيدى ما ارۋاعىڭ،
وسى ەلدەگى سوڭعى جەتىم ءبىز بولساق.
اكە سەنىڭ ءار ءبىر ءسوزىڭ – ۇلت ءۇنى،
كوكجال ەدىڭ قيسايماعان قىلشىعى.
بولتىرىگىڭ امان بولسا تۇبىندە،
قورقاۋلاردى يتشە ۇلىتار ءبىر كۇنى.
قوش بول اكە، ارتىڭدا التى بالا ءجۇر،
رۋحىڭمەنەن ءبىزدى ەسىڭە الا ءجۇر.
تۇلىبىنا موڭىرەپ قالعان سيىرداي،
ەلىڭە دە نازارىڭدى سالا ءجۇر.....
ازامات مالجانباي
پىكىر قالدىرۋ