كارانتين ەنگىزىلگەلى مەديسينالىق ساقتاندىرۋ قورىنىڭ 1406 ءبىرىڭعاي بايلانىس ورتالىعى 119 مىڭنان استام قوڭىراۋ قابىلدادى. ساۋالداردىڭ باسىم بولىگى – كارانتين مەن كوروناۆيرۋس ينفەكسياسىنا قاتىستى. بۇل تۋرالى «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالىنىڭ ديرەكتورى نۇرلىبەك قابدىقاپاروۆ بريفينگ بارىسىندا ايتتى.

ونىڭ ايتۋىنشا، 2019 جىلدىڭ 1 قىركۇيەگىنەن بەرى جۇمىس ىستەپ كەلە جاتقان بايلانىس ورتالىعى قىزمەتكەرلەرى كۇن سايىن 5 مىڭنان استام قوڭىراۋ قابىلدايدى. قازاقستاندىقتاردى تابىسىنان ايىرىلعاندارعا، جۇمىسسىز قالعاندارعا بەرىلەتىن الەۋمەتتىك تولەمدەر، كارانتين ەنگىزىلگەن قالالار مەن وبلىستار اۋماعىندا ءجۇرىپ-تۇرۋ، كوروناۆيرۋس ينفەكسياسىنا تەست تاپسىرۋ، جالعىزىلىكتى كىسىلەرگە، قارتتار مەن مۇگەدەكتەرگە ازىق-تۇلىك پەن دارى-دارمەك جەتكىزۋ جولدارى سىندى تاعى دا باسقا ماسەلەلەر ءجيى مازالايدى.

– كارانتين ەنگىزىلگەلى بەرى شۇعىل جەلىگە تۇسەتىن جۇكتەمە دە ارتتى. ازاماتتار وزدەرىن مازالاعان سۇراقتاردىڭ جاۋابىن ءبىزدىڭ ورتالىق ماماندارىنان سۇراپ بىلگىسى كەلەدى. سوندىقتان قازىرگى تاڭدا قور ءۇشىن مەديسينالىق قىزمەت ساپاسىن باقىلاپ قانا قويماي، حالىققا دۇرىس اقپارات بەرۋ ماسەلەسىنىڭ دە ماڭىزى زور، –  دەپ اتاپ ءوتتى ن.قابدىقاپاروۆ.

سونىمەن قاتار، فيليال باسشىسى ساقتاندىرۋ جۇيەسىندەگى جەڭىلدىك مەرزىمىن 1-ساۋىردەن 1-شىلدەگە دەيىن ۇزارتۋ ماسەلەسىنە دە توقتالدى. جاڭا ءتارتىپ بويىنشا، ساقتاندىرىلماعان ازاماتتار الداعى ءۇش ايدا مىندەتتى الەۋمەتتىك مەديسينالىق ساقتاندىرۋ پاكەتىندەگى قىزمەتتەردى دە تولىققاندى پايدالانا الادى.

اۋەلدە جىلدىڭ باستاپقى ءۇش ايى وتپەلى كەزەڭ رەتىندە جاريالانعان بولاتىن. بۇل جاڭا جۇيەگە قاتىستى تۋىنداعان ماسەلەلەردى شەشىپ، تۇرعىندارعا جاڭا جۇيەنىڭ ارتىقشىلىقتارىن سەزىنۋگە مۇمكىندىك بەردى.

– ءقازىر الماتى تۇرعىندارىنىڭ 93 پايىزى ساقتاندىرىلعان. ونىڭ جارتىسىنان استامى ءۇشىن جارنانى مەملەكەت تولەيدى. ءبىراق ءوزىن-وزى جۇمىسپەن قامتىعان، بەيرەسمي جۇمىس ىستەيتىن ازاماتتارعا دا جاعداي جاساۋ كەرەك. سوندىقتان ولاردىڭ بارىنە قازىرگىدەي قيىن ۋاقىتتا ساقتاندىرۋ پاكەتىندەگى قىزمەتتەردى كەدەرگىسىز پايدالانۋعا مۇمكىندىك بەرىلىپ وتىر، –  دەدى فيليال باسشىسى.

وسى ماقساتتارعا ارناپ قور ىشكى رەزەرۆىنەن 20 ملرد تەڭگە ءبولۋدى جوسپارلاپ وتىر. بۇل قارجى قازاقستاندىقتاردىڭ كت، مرت سىندى باعاسى قىمبات اناليزدەر مەن وپەراسيالارعا دەگەن سۇرانىسىن قاناعاتتاندىرۋعا جۇمسالماق.