دەنساۋلىق ساقتاۋ سالاسىن دامىتۋدىڭ 2011-2015 جىلدارعا ارنالعان «سالاماتتى قازاقستان» باعدارلاماسىنىڭ شاپاعاتى مۇنايلىداعى باتىر اۋىلىنا ءتيدى. بەيسەنبى كۇنى باتىر سەلولىق وكرۋگىندا جاڭا دارىگەرلىك امبۋلاتوريا اشىلىپ، ەل يگىلىگىنە تاپسىرىلدى. باعدارلامانىڭ يگىلىگىن كورگەن باتىرلىقتاردىڭ مەرەيى ءوسىپ، كوپتەن كۇتكەن قۋانىشقا كەنەلدى.
سالتاناتتى ساتتە وبلىس اكىمىنىڭ ءبىرىنشى ورىنباسارى س.الداشيەۆ اۋىل تۇرعىندارىنىڭ قۋانىشىنا ورتاقتاسىپ، يگى ءىستىڭ ىلگەرى باسۋىنا قۇتتى قادام تىلەدى.
– بۇگىن ەل يگىلىگىنە بەرىلگەلى تۇرعان دارىگەرلىك امبۋلاتوريانىڭ اشىلۋىمەن شىن جۇرەكتەن قۇتتىقتايمىن! قازاقستان تاۋەلسىزدىك العان جىلداردان بەرى پرەزيدەنتىمىز ن.نازاربايەۆتىڭ باسشىلىعىمەن تۇرعىنداردىڭ ءال-اۋقاتى مەن مەملەكەتىمىزدىڭ وركەندەۋىنە باعىتتالعان جۇيەلى رەفورمالار جۇرگىزىلۋدە. تەك قانا مۇنايلى اۋدانى قۇرىلعالى بەرى دەنساۋلىق ساقتاۋ سالاسى بويىنشا 8 باستاپقى مەديسينالىق-سانيتارلىق كومەك كورسەتۋ ورتالىعى مەن اۋداندىق 1 ەمحانا ىسكە قوسىلدى. وسى دارىگەرلىك امبۋلاتوريا اۋىل تۇرعىندارىنا ساپالى قىزمەت كورسەتىپ، حالىقتىڭ مەديسينالىق كومەككە قولجەتىمدىلىگىن ارتتىرۋ جولىندا ەل يگىلىگىنە قىزمەت ەتەدى. مۇنداعى بىلىكتىلىگى جوعارى مەديسينا قىزمەتكەرلەرى اۋىل تۇرعىندارىنا ساپالى قىزمەت كورسەتىپ، حالىق دەنساۋلىعىن جاقسارتۋ ماقساتىندا جالىقپاي جۇمىس جاسايدى دەپ سەنەمىز. تالايدىڭ تانىنە ساۋلىق، جانىنا مەيىرىم سىيلاعان اق حالاتتى ابزال جاندارعا حالىق ءۇشىن يگىلىكتى ىستەرىڭىزگە ساتتىلىك تىلەيمىن» دەگەن سۇيىندىك تاسەمەن ۇلى مەديسينالىق مەكەمەگە ءتۇرلى-تۇستى تەلەديدار تارتۋ ەتتى.
اۋىل تۇرعىندارى اتىنان ءسوز العان بەكەت اتانىڭ ۇرپاعى ب.ساندىبەكوۆ شاعىن ەلدى مەكەننىڭ شىرايىن كىرگىزگەن جاڭا دەنساۋلىق ساقتاۋ نىسانىن سالىپ، قازىنا قارجىسىن حالىق يگىلىگىنە اينالدىرعان وبلىس اكىمدىگىنە، «اليانس لتد» ج ش س ديرەكتورى ا.كەرەلبايەۆقا شەكسىز العىس ايتىپ، كوپشىلىك قاۋىمعا اق باتاسىن بەردى. قۇرمەتتى قوناقتاردىڭ قۇتتىقتاۋ لەبىزدەرى تولاستاعاننان كەيىن وبلىس اكىءمىنىڭ ءبىرىنشى ورىنباسارى س.الداشيەۆ پەن اۋىل تۇرعىنى ب.ساندىبەكوۆ جاڭا امبۋلاتوريانىڭ لەنتاسىن قيدى. اۋىل ىرگەسىندە تيپتىك ۇلگىدە بوي كوتەرگەن مەديسينالىق مەكەمەنىڭ ءىشىن ارالاپ، كابينەتتەرمەن تانىستى.
– قازىرگى تاڭدا بولاشاعى بار، وسىپ-كوركەيىپ كەلە جاتقان باتىر اۋىلىندا حالىق سانى 2700-گە جەتتى. ونىڭ ىشىندە ءبىر جاسقا دەيىنگى 80 ءسابي، 55 جۇكتى ايەل بار. بۇرىن باسى اۋىرىپ، بالتىرى سىزداعان باتىر اۋىلىنىڭ تۇرعىندارى 25 شاقىرىم جەردەگى ماڭعىستاۋ سەلوسىنا بارىپ، قارالاتىن. وتكەن جىلدان باستاپ، وسى باتىردا فەلدشەرلىك- اكۋشەرلىك پۋنكت اشىلدى. حالىق سانى ءوسىمىنىڭ ارتۋىنا بايلانىستى دارىگەرلىك امبۋلاتوريا اشۋ قاجەتتىگى تۋىنداپ، جاڭا مەديسينالىق مەكەمە بوي كوتەردى. قۇنى 182 ملن.بولاتىن نىساندا شارۋاشىلىق بولمەلەرىن قوسپاعاندا دارىگەرگە دەيىنگى كابينەت، تەراپيەۆت پەن اكۋشەر، ءتىس ەمدەۋ، قان الۋ، نەسەپ تالداۋ، ەگۋ كابينەتتەرى، فيزيوكابينەت، ەم-شارا كابينەتتەرى مەن 40 ادام ەم الاتىن توسەك-ورنى سايلى كۇندىزگى ستاسيونار بار. مۇندا ەكى دارىگەر مەن 12 ورتا بۋىندى مەيىربيكە جۇمىس جاسايدى. تولىقتاي زاماناۋي ۇلگىدەگى مەديسينالىق قۇرال-جابدىقتارمەن، قۇرىلعىلارمەن جاساقتالعان. بيىل «ديپلوممەن اۋىلعا» باعدارلاماسى بويىنشا استانا، الماتى، اقتوبە قالاسىنداعى اكادەميانىڭ تۇلەكتەرى ءبىزدىڭ اۋدانىمىزعا كەلەدى. ون ەكى جاس مامان تامىز ايىنان باستاپ، اۋدانىمىزداعى مەديسينالىق مەكەمەلەردە جۇمىس جاسايتىن بولادى،-دەيدى اۋداندىق اۋرۋحانانىڭ ديرەكتورى ا.شىرشىقبايەۆ.
وبلىستىق دەنساۋلىق ساقتاۋ باسقارماسىنىڭ مالىمەتىنشە، بيىل وبلىسىمىزدا «سالاماتتى قازاقستان» مەملەكەتتىك باعدارلاماسى بويىنشا 8 مەديسينالىق مەكەمە بوي كوتەرگەن. سونىڭ 7-ەۋى دارىگەرلىك امبۋلاتوريا بولسا، بىرەۋى فەلدشەرلىك- اكۋشەرلىك پۋنكت. سونداي-اق، الداعى ۋاقىتتا قىزان جانە ءومىرزاق سەلولارىندا دارىگەرلىك امبۋلاتوريا اشۋ جوسپارلانىپ وتىر ەكەن.
– مەملەكەتتىڭ بەلگىلەنگەن ءنورماتيۆى بويىنشا، حالىق سانى ەكى مىڭنان 10 مىڭعا دەيىن بولسا، اۋىلدا دارىگەرلىك امبۋلاتوريا سالىنۋى قاجەت. وبلىس اۋماعىندا شاعىن ەلدى مەكەندەردىڭ ۇلعايۋىنا بايلانىستى وسىنداي مەديسينالىق مەكەمەنىڭ ىرگەسىن قالاپ، ەل يگىلىگىنە تاپسىرۋدى جوسپارلاپ وتىرمىز. كەلەسى جىلى ماڭعىستاۋ اۋدانىنداعى شەتپە-1 شاعىناۋدانىندا، مۇنايلىعا قاراستى باسقۇدىق اۋىلىندا سەلولىق ەمحانا سالۋدى ماقسات ەتىپ وتىرمىز. وبلىسىمىزدا ءۇش جىلجىمالى مەديسينالىق كەشەننىڭ بىرەۋى وبلىستىق اۋرۋحانا جانىندا تۇراتىن. سونىڭ بىرەۋىن مۇنايلى اۋدانىنا بەردىك. مەديسينالىق كەشەن بۇگىن باتىر اۋىلىندا جۇمىسىن باستادى. الداعى ۋاقىتتا كەستە بويىنشا بارلىق اۋىلدارعا بارىپ، حالىققا كومەك كورسەتەدى،-دەيدى وبلىستىق دەنساۋلىق ساقتاۋ باسقارماسىنىڭ باسشىسى ر.بەكتۋبايەۆ.
دەرەككوزى: مangmedia.kz.
پىكىر قالدىرۋ