بۇل تۋرالى «قامشى» پورتالى ماڭعىستاۋ وبلىسىنىڭ ەكونوميكا جانە بيۋدجەتتىك جوسپارلاۋ باسقارماسىنا سىلتەمە جاساي وتىرىپ حابارلايدى.

«ماڭعىستاۋ وبلىسى رەسپۋبليكا بويىنشا ايماقتىق جالپى ءونىمدى جان باسىنا شاعۋ كولەمى جاعىنان ءتورتىنشى ورىندا. وبلىستاعى ايماقتىق جالپى ءونىم 744 مىڭ تەڭگەنى قۇراپ وتىر، ق ر بويىنشا ورتاشا كورسەتكىش – 472،8 مىڭ تەڭگە. ولكەنىڭ 2015 جىلدىڭ ءى جارتى جىلدىعىنداعى ناقتى ءوسىم – 103،7% قۇرايدى، ياعني ول 453،2 ملرد. تەڭگە. 2015 جىلدىڭ قاڭتار-ماۋسىم ايلارى بويىنشا وبلىستاعى ونەركاسىپتىك مەكەمەلەر قولدانىستاعى باعامەن 772،5 ملرد. تەڭگە بولاتىن ءونىم ءوندىردى. ايماقتىڭ ونەركاسىپ ءونىمىنىڭ ناقتى كولەم يندەكسى 98،4%-دى قۇراپ وتىر»، - دەلىنگەن حابارلامادا.

وبلىستاعى ءبىرقاتار ونەركاسىپتەردە، اتاپ ايتساق، مەتاللدىق ەمەس مينەرالدى ونىمدەردە – 1،6 ەسە، رەزەڭكە مەن پلاستماسسالىق بۇيىمداردا – 1،2 ەسە، بىلعارى جانە سول تەكتەس ونىمدەردە – 16،1%، ازىق-تۇلىكتەردە – 20،3%، حيميا ونەركاسىبىندە – 1،7% ءوسىم بەلگىلەنگەن.

ماڭعىستاۋ وبلىسىنىڭ ەكونوميكا جانە بيۋدجەتتىك جوسپارلاۋ باسقارماسى حابارلاعانداي، وبلىستاعى مۇناي ءوندىرۋ 2014 جىلمەن سالىستىرعاندا اعىمداعى جىلدىڭ ءى جارتىجىلدىعى بويىنشا 9،2 ملن. توننانى نەمەسە 100،7%-دى قۇراپ وتىر. تابيعي گازدى ءوندىرۋ 16،8%-عا ءوسىپ، 1173،3 ملن. تەكشە مەتردى قۇرادى. ەسەپتىك كەزەڭ بويىنشا ولكەنىڭ وڭدەۋ ونەركاسىبىندە 41،3 ملرد. تەڭگەگە ءونىم ءوندىرىلىپ، ناقتى كولەم يندەكسى 101،3%-دى قۇرادى.