قازاقستاننىڭ ۇلتتىق بانكى جەكەلەگەن سالالاردا قولما-قول اقشاسىز تولەمدەردى قابىلداۋ ءۇشىن بانك كوميسسياسىنىڭ تومەندەگەنى تۋرالى مالىمدەدى.

"پرەزيدەنت قاسىم-جومارت توقايەۆتىڭ 2019 جىلعى 2 قىركۇيەكتەگى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا ايتىلعان قولما-قول اقشاسىز تولەمدەردى دامىتۋ جانە بانكتەردىڭ كوميسسيالارىن تومەندەتۋ شارالارىن قابىلداۋ تۋرالى تاپسىرمانى ورىنداۋ شەڭبەرىندە قازاقستان ۇلتتىق بانكى بانكتەردىڭ تولەم كارتوچكالارىن پايدالانا وتىرىپ، تولەمدەردى قابىلداۋ ءۇشىن الاتىن كوميسسيانىڭ تومەندەتىلگەنى تۋرالى حابارلايدى"، دەلىنگەن حابارلامادا.

ۇلتتىق بانكتىڭ مالىمەتىنشە، وزگەرىستەر 2020 جىلدىڭ 1 مامىرىنان باستاپ كۇشىنە ەنەدى. بۇل ماڭىزدى الەۋمەتتىك ءمانى بار ەكونوميكانىڭ جەكەلەگەن سالالارىنا قاتىستى: ءبىلىم بەرۋ، مەديسينالىق قىزمەتتەر، ءدارىحانالار، تۇراق ورىندارى، اقىلى جولدارعا اقى تولەۋ، اۋىل شارۋاشىلىعى قىزمەتتەرى، جىلجىمايتىن مۇلىكپەن جاسالاتىن مامىلەلەر.

قازاقستاننىڭ ۇلتتىق بانكى وسى وزگەرىستەردى قابىلداۋ ءۇشىن حالىقارالىق تولەم جۇيەلەرىمەن جانە ەكىنشى دەڭگەيدەگى بانكتەرمەن قاجەتتى جۇمىس جۇرگىزدى. بىرلەسكەن جۇمىستىڭ، تالداۋ مەن تالقىلاۋلاردىڭ ناتيجەسى بويىنشا جاڭا سەگمەنتتەر ايقىندالدى، 2020 جىلعى 1 مامىردان باستاپ Visa جانە Mastercard حالىقارالىق تولەم جۇيەلەرى بانكارالىق كوميسسيانىڭ مولشەرلەمەسىن قازاقستاندىق بانكتەر ءۇشىن 2 ەسە - 1%-عا دەيىن، فارماسيەۆتيكا سەگمەنتىندە – 1،3%-عا دەيىن تومەندەتەدى.

ساۋدا كوميسسياسىن تومەندەتۋ باستاماسىن تولەم كارتوچكالارى نارىعىنىڭ نەگىزگى قاتىسۋشىلارى قولدادى. ولاردىڭ قاتارىنا «قازاقستان حالىق بانكى» اق، «Kaspi Bank» اق، «Forte Bank» اق، «سبەربانك» اق ەب، «اتفبانك» اق، «بانك سەنتركرەديت» اق، «Jysan Bank» اق، «ەۋرازيالىق بانك» اق كىردى. اتالعان ەكىنشى دەڭگەيدەگى بانكتەرگە ەكۆايرينگتىك قىزمەت نارىعىندا (تولەم كارتوچكاسىن پايدالانا وتىرىپ، قولما-قول اقشاسىز تولەمدەردى قابىلداۋدى ۇيىمداستىرۋ بويىنشا قىزمەت كورسەتۋ) جيىنتىعىندا 96% تيەسىلى.

جوعارىدا اتالعان قارجى ينستيتۋتتارى ساۋدا (ەكۆايرينگتىك) كوميسسياسىن ورتاشا العاندا 35%-عا (2،3% اعىمداعى ورتاشا ماننەن ترانزاكسيا سوماسىنىڭ 1،5%-ى ورتاشا مانىنە دەيىن) تومەندەتەدى. ساۋدا كوميسسياسىن تومەندەتۋ كاسىپكەرلەر مەن ازاماتتارعا بانكتىك كوميسسيا بويىنشا ءوز شىعىستارىن تومەندەتۋگە مۇمكىندىك بەرەدى. بانكارالىق جانە ساۋدا كوميسسياسىن تومەندەتۋ جونىندەگى بىرلەسكەن شارالاردىڭ ناتيجەسى بيزنەس سۋبەكتىلەرى شىعىستارىنىڭ ناقتى ۇنەمدەلۋى رەتىندە جىلىنا 2 ملرد تەڭگە دەڭگەيىندە بولجانادى.

جالپى العاندا، قابىلدانعان شارالار جەكە قولما-قول اقشاسىز ەسەپ ايرىسۋدى ودان ءارى دامىتۋ ءۇشىن جاعدايلاردى ەلەۋلى تۇردە جاقسارتادى جانە «كولەڭكەلى ەكونوميكانىڭ» كولەمى قىسقارۋىنا وڭ اسەر ەتەدى.