وتكەن جىلى قولعا الىنعان «سەرپىن-2050» پيلوتتىق جوباسى بيىل العاشقى رەت جۇمىسىن باستادى. مىڭداعان جاستاردىڭ باعىن جاندىرىپ، ءبىلىم تۇڭعيىعىنا جەتەلەگەن الەۋمەتتىك جوباعا 6200 گرانت ءبولىندى. بۇل تۋرالى ماڭعىستاۋ وبلىسىنا ارنايى ات سابىلتىپ كەلگەن «ماڭگىلىك ەل جاستارى – يندۋسترياعا!» - «سەرپىن-2050» جوباسى رەسپۋبليكالىق ۇيلەستىرۋ كەڭەسىنىڭ ءتوراعاسى مۇرات ابەنوۆ مالىمدەدى.
– «سەرپىن-2050» جوباسى ەكى ماقساتتى كوزدەيدى. ەلىمىزدە يننوۆاسيالىق-يندۋستريالىق ماڭىزدى جوبالار جۇزەگە اسىرىلىپ، وڭىرلەرگە قاجەتتى وندىرىستەر، زاۋىتتار ىسكە قوسىلۋدا. الايدا ونىڭ ناتيجەلى بولۋى تىكەلەي تەحنولوگيالار مەن ماماندارعا بايلانىستى ەكەنى ايان،-دەپ باستادى ءسوزىن ب ا ق وكىلدەرىنە ارنالعان باسپا ءسوز ماجىلىسىندە مۇرات ابەنوۆ. – وكىنىشكە وراي، ءبىرقاتار وندىرىستىك ايماقتارىمىزدا بالا تۋۋ كورسەتكىشى تومەن، حالىق سانى شامالى. بۇل كادر رەسۋرستارىنا كەرى اسەرىن تيگىزىپ، ءوندىرىستى قۇلدىراتادى. وعان كەرىسىنشە، بالا تۋۋدان كوش باستاعان 5 وبلىسىمىز بار. ەكونوميكالىق ماقسات – وسى 5 وبلىستىڭ جاستارىن وندىرىستىك وڭىرلەرگە جىبەرىپ، سول جەردە قاجەتتى ماماندىقتارعا وقىتىپ، بىلىكتى كادرلاردى دايارلاپ شىعارۋ. ال ەكىنشى الەۋمەتتىك ماقساتىنا كەلەر بولساق، حالىق سانى جوعارى ماڭعىستاۋ، الماتى، قىزىلوردا، جامبىل جانە وڭتۇستىك قازاقستان وبلىستارىنىڭ وزەكتى ماسەلەسى – بالاباقشا، مەكتەپ، كوللەدج جانە جوعارى وقۋ ورىندارىنداعى ورىن تاپشىلىعى ەكەنى بەلگىلى. مەكتەپ ۇياسىنان قانات قاققان تۇلەكتەر بىردەي ماماندىق تاڭداپ، كەيىن شەكتەۋلى بوس جۇمىس ورىندارىنا تالاسىپ، اقىرىندا جولى بولماعاندار جۇمىسسىزداردىڭ قاتارىن تولتىرادى. بۇل كەلەڭسىزدىكتى بولدىرماۋ ءۇشىن بەس ايماقتىڭ بالالارىن ەڭبەك نارىعىندا سۇرانىسقا يە ماماندىقتارعا تارتىپ، حالىق سانى تومەن ايماقتارعا ءناپاقاسىن تابۋعا جىبەرۋ قاجەت،-دەدى ول.
اتاۋى ايتىپ تۇرعانداي، مەملەكەتىمىزدىڭ ەكونوميكالىق جانە الەۋمەتتىك سالاسىنا سەرپىن بەرەر بۇل جوبانىڭ ەرەكشەلىگى – گرانت يەلەنگەن جاستاردى تولىق جاتاقحانامەن قامتاماسىز ەتىپ، شاكىرتاقىسىن بەرىپ، پويىز جولىن تولەيدى. سونداي-اق جوبا ۇيلەستىرۋشىسى م.ابەنوۆتىڭ سوزىنشە، بالالار ءبىلىم الۋمەن قاتار، وندىرىستىك ورىنداردا جۇمىستارعا ارالاسىپ، تاجىريبە جينايدى. «ۋنيۆەرسيتەت ءتامامداعان تۇلەكتەر 100 پايىز جۇمىسپەن قامتىلادى. كەيبىر جاستار اۋىلدارىنا ورالعىسى نە وقۋدى جالعاستىرعىسى كەلەدى. وعان دا شەكتەۋ قويىلمايدى. مەملەكەت بارلىق جاعدايدى جاساپ، تاڭداۋ ۇسىنادى. كەلەسى قادام جاستاردىڭ ءوز ەركىندە»،- دەپ شەشىلە سويلەدى ول.
وتكەن جىلى باستالسا دا، ۇلكەن قىزىعۋشىلىق تۋدىرعان «سەرپىن-2050» جوباسى اياسىندا بيىل جوعارى وقۋ ورىندارىنا – 5000، كوللەدجدەرىنە – 1200 گرانت ءبولىندى. 8 ايماقتىڭ 19 ۋنيۆەرسيتەتى مەن 36 كوللەدجى قاتىسىپ، 60 ماماندىقتى ۇسىندى. مۇرات ابدۋلاميت ۇلى تالاپكەرلەردى «سەرپىن-2050» جوباسىنا قاتىسۋعا، گرانت يەگەرى اتانۋعا شاقىرىپ، قۇجاتتاردى تاپسىرۋ تالاپتارىمەن Serpin-2050.kz سايتىنان تانىسۋعا بولاتىنىن ايتتى.
بىلىمگە قۇمار جاستاردىڭ بولاشاعى جارقىن بولۋىنا جاردەمدەسەتىن «سەرپىن-2050» الەۋمەتتىك جوباسى بويىنشا ستۋدەنتتەردى جىبەرۋشى جانە قابىلداۋشى وبلىستاردا ايماقتىق شتابتار قۇرىلىپ، جۇمىس ىستەۋدە. تالاپكەرلەر تولعاندىرعان ساۋالدارى بويىنشا وسى شتابتارمەن حابارلاسىپ، تولىق اقپاراتقا قانىعا الادى.
اقپارات كوزى: مangmedia.kz.
