جاڭاوزەن قالاسىن دامىتۋ ءۇشىن الەۋمەتتىك-ەكونوميكالىق دامۋدىڭ كەشەندى جوسپارىن جانە مونوقالالاردى دامىتۋ باعدارلاماسىن ىسكە اسىرۋعا اعىمداعى جىلى 7 ملرد تەڭگە ءبولىندى. بۇل تۋرالى بۇگىن ماڭعىستاۋ وبلىسى اكىمىنىڭ ورىنباسارى شولپان ىلمۇحانبەتوۆا حابارلادى.

«جاڭاوزەن قالاسىندا ءارقايسىسى 320 ورىندىق 4 بالاباقشا، مەديسينا ورتالىعى، شاعىن اۋدانىشىلىك جولدار سالىنىپ، ەلەكتر، سۋ جەلىلەرىن جوندەۋ جۇمىستارى جۇرگىزىلۋدە. شاعىن جەو اۋىستىرا وتىرىپ، ورتالىق قازاندىق جوندەلىپ، كەڭەيتىلۋدە. تاۋلىگىنە 30 مىڭ تەكشە مەتر سۋ تازالايتىن اۋىزسۋ قۇرىلعىسىن سالۋ جۇمىستارى جاسالۋدا»، - دەدى ول.

«بيزنەستىڭ جول كارتاسى-2020» اياسىندا شاعىن كاسىپكەرلىكتى مەملەكەتتىك قولداۋ تۇرعىسىنان العاندا، جاڭاوزەن قالاسىنىڭ كاسىپكەرلەرىنىڭ جوبالارى وبلىس ماقۇلداعان جوبالاردىڭ جارتىسىنان كوبىن قۇرايدى.

«وسى جىلى ءبىرىنشى جارتىجىلدىقتا وبلىس ورتالىعىنىڭ جوبالارى 40 پايىزدى قۇرايدى، قالعانى جاڭاوزەن مەن اۋىل بيزنەسمەندەرىنىڭ جوبالارى»، - دەپ اتاپ ءوتتى كاسىپكەرلىك، ساۋدا باسقارماسىنىڭ باسشىسى ۆەنەرا مۇستاپوۆا.

بۇدان باسقا، رەسپۋبليكالىق تا، جەرگىلىكتى بيۋدجەت ەسەبىنەن دە حالىقتىڭ ءوزىن-وزى جۇمىسپەن قامتۋىن نەسيەلەندىرۋ قولعا الىنعان. اۋىلدىق اۋماقتاردى دامىتۋ ماسەلەسى دە شەشىلۋدە.