كوۆيد-19 پاندەمياسى جانە اقش – جۇڭگو اراسىنداعى قايشىلىقتاردىڭ كۇشەيۋى سالدارىنان امەريكا جوعارى وقۋ ورىندارى 15 ملرد دوللار تابىسىنان  ايىرىلماق. بۇل تۋرالى قامشى ءتىلشىسى SCMP-عا سىلتەمە جاساپ حابارلايدى. 

185-تەن استام ەلگە تارالعان، 2،6 ميلليوننان استام ادام جۇقتىرعان جانە الەم بويىنشا 180 000-نان استام ادامنىڭ ءومىرىن قيعان اۋرۋ الەمگە بۇرىن-سوڭدى بولماعان زالال اكەلدى.

– شەكارالار جابىلعان، حالىقارالىق ساپارلار شەكتەلۋدە. امەريكا ۋنيۆەرسيتەتتەرى ءۇشىن جۇڭگو ستۋدەنتتەرىنىڭ جوعارى بىلىمگە دەگەن سۇرانىسى 2020-2021 وقۋ جىلىندا قاتتى تومەندەيدى، – دەپ حابارلادى اقش – جۇڭگو ەكونوميكالىق جانە قاۋىپسىزدىك ساراپتامالىق كوميسسياسىنىڭ سەيسەنبىدە جاريالانعان پاندەميانىڭ ەكونوميكالىق اسەرلەرى تۋرالى كونگرەسستەگى بايانداماسىندا.

ەسەپ قىتايدا بولاتىن اقش-قا ءتۇسۋ ەمتيحاندارىنىڭ كەشىگۋى نەمەسە كۇشىنەن قالدىرىلۋى، جول جۇرۋگە بەلگىسىز شەكتەۋلەر جانە اقش كوللەدجدەرىنىڭ  قاشان اشىلاتىنى تۋرالى بەلگىسىزدىك سياقتى كوپتەگەن ماسەلەلەردى انىقتادى. مۇنىڭ سالدارى اۋىر بولۋى مۇمكىن. ال، اقش ۋنيۆەرسيتەتتەرىنە تولەنەتىن تولەمدەردىڭ ۇشتەن ءبىر بولىگى شەتەلدىك ستۋدەنتتەردەن تۇسەدى. امەريكادا وقيتىن جۇڭگو ستۋدەنتتەرىنەن اقش ۋنيۆەرسيتەتتەرىنە جىلىنا 15 ميلليارد اقش دوللارى تابىس تۇسەتىن كورىنەدى.