الماتى. قامشى پورتالى - اقتاۋ تەڭىز ساۋدا پورتىن سولتۇستىك باعىتتا كەڭەيتۋ بويىنشا جوبا قۇنى شامامەن 40 ملرد تەڭگەنى قۇرايدى. اتالعان جوبا «يندۋستريالاندىرۋ كۇنىندە» جالپىۇلتتىق تەلەكوپىر كەزىندە ەلباسى نۇرسۇلتان نازاربايەۆقا تانىستىرىلدى.

«بۇگىندە ءۇش ايلاق - استىق، كونتەينەرلىك جانە باس جۇكتەرگە ارنالعان ايلاقتار بويىنشا جۇمىستار اياقتالىپ كەلەدى. بيداي تەرمينالىنىڭ بارلىق التى سۇرلەمى كوتەرىلدى، قۇرال-جابدىقتاردى مونتاجداۋ جۇمىستارى اياقتالۋعا تايادى. ءتورتىنشى - پورت فلوتىنا ارنالعان ايلاق اياقتالۋعا جاقىن. سونىمەن قاتار اكىمشىلىك نىساننىڭ، سانيتارلىق-ەپيدەميولوگيالىق قىزمەتتەر ورتالىعىنىڭ، ماتەريالدىق قويمالاردىڭ، قۇرال-جابدىق قويماسى مەن گاراج ىرگەتاسى كوتەرىلىپ جاتىر. كولىكتەر ءۇشىن كىرۋ جولدارى دا توسەلىپ جاتىر. جۇمىس كەستەگە ساي جۇرگىزىلۋدە. 300-دەن استام جۇمىسشى تارتىلدى. نىساندى 2015 جىلدىڭ ەكىنشى جارتىسىندا تاپسىرۋ كوزدەلگەن»، - دەدى «اقتاۋ حالىقارالىق تەڭىز ساۋدا پورتى» ۇلتتىق كومپانياسى» اق پرەزيدەنتى ميحايل يالباچيەۆ.

ونىڭ سوزىنە قاراعاندا، جوبا اياسىندا ءاربىرى 10 مىڭ توننالىق 6 بۋنكەردەن تۇراتىن استىق قامباسىنىڭ قۇرىلىسى قاراستىرىلعان. بۇل جىلىنا 1،5 ملن توننا استىق تاسىمالداۋعا جول اشادى. جىلىنا 1 ملن توننا جۇكتى وڭدەيتىن كونتەينەرلىك الاڭ مەن ءاربىرى 150 مەترلىك 3 ايلاق تەڭىز پورتىنىڭ كولىك الەۋەتىن ەداۋىر دامىتۋعا سەپتەسەدى.

جوبا ءۇش كەزەڭدە جۇزەگە اسىرىلادى. العاشقى كەزەڭ اياسىندا 2006-2011 جىلدارى قورعانىش قۇرىلىمدارى سالىندى. قۇرىلىستىڭ جالپى سوماسى 10،82 ملرد تەڭگەنى قۇرادى، «قازاقستان دامۋ بانكى» اق قاراجاتى پايدالانىلدى. 

ءقازىر ەكىنشى جانە ءۇشىنشى كەزەڭدەر بويىنشا جۇمىستار جۇرگىزىلىپ جاتىر. ەكەۋى دە بيىل اياقتالۋى ءتيىس. سوڭعىسىن جۇزەگە اسىرۋ ءۇشىن «Inter port development PTE.ltd» (سينگاپۋر، 60%)، «KTZ Express» اق(30%)، «اقتاۋ ممتپ» ۇك» اق (10%) كومپانيالارىنىڭ قاتىسۋىمەن «اقتاۋ تەڭىز سولتۇستىك تەرمينالى» ج ش س قۇرىلدى.