قازىرگى كەزدە جەرگىلىكتى ۇلەستى ارتتىرۋ ءۇشىن ماڭعىستاۋ وبلىسىندا جالپى سوماسى 311،4 ملرد. تەڭگەگە 120 مەموراندۋمعا قول قويىلدى. اتالعان مەموراندۋمداردىڭ اياسىندا 295 ملرد. تەڭگەگە 334 كەلىسىم جاسالدى.

«بۇل كەلىسىمدەر قر-دا جاسالعان كەلىسىمدەردىڭ جالپى كولەمىنىڭ ۇشتەن ءبىر بولىگىن قۇراپ وتىر»، - دەپ اتاپ ءوتتى ايماقتىڭ الەۋمەتتىك-ەكونوميكالىق دامۋىنا ارنالعان كونفەرەنسيانىڭ بارىسىندا ماڭعىستاۋ وبلىسى اكىمىنىڭ ورىنباسارى شولپان ىلمۇحانبەتوۆا.

بۇدان باسقا، ونىڭ اتاپ وتۋىنشە، بارىنشا جۇمىسپەن قامتۋ جەرگىلىكتى بيلىك كوزدەرى جۇمىسىنىڭ باستى ۆەكتورى بولىپ تابىلادى. 

«جىل باسىنان بەرى وبلىس بويىنشا 13 مىڭ 570 جۇمىس ورنى قۇرىلدى، بۇل وتكەن جىلمەن سالىستىرعاندا 109 ورىنعا كوپ. جۇمىسسىزدىقتىڭ جالپى دەڭگەيى وتكەن جىلمەن سالىستىرعاندا 5،4 پايىزدان 5،2 پايىزعا دەيىن، سونىڭ ىشىندە جاستار اراسىنداعى جۇمىسسىزدىق دەڭگەيى 6،8 پايىزدان 3،8 پايىزعا دەيىن تومەندەگەن. 

بۇل قارقىندى ساقتاپ، بارلىق دەڭگەيدەگى جۇمىسكەرلەردى قىسقارتۋ ءقاۋپىن بارىنشا ازايتۋ ءۇشىن اكىمدىكتەردىڭ جۇمىس بەرۋشىلەر، كاسىپوداقتار جانە كاسىپكەرلەر پالاتاسىمەن بىرلەسىپ وندىرىستىك پروسەستەردى تۇراقتاندىرۋ، جۇمىسكەرلەردىڭ ەڭبەك قۇقىقتارى مەن جۇمىسقا ورنالاسۋىن قامتاماسىز ەتۋ ماسەلەلەرى بويىنشا ىنتىماقتاستىق تۋرالى 620 مەموراندۋم جاسالدى. سول ارقىلى ەكونوميكانىڭ ءتۇرلى سەكتورلارىندا 105 مىڭ جۇمىسكەردىڭ مۇددەسى قورعالدى»، - دەپ تۇيىندەدى ش.ىلمۇحانبەتوۆا.