قازاقستان فۋتبول فەدەراسياسىنىڭ ەكس-باس حاتشىسى ا.ءچايجۇنىسوۆ «استانا ەكسپو-2017» ۇلتتىق كومپانياسىنىڭ باسقارۋشى ديرەكتورى بولىپ تاعايىندالدى. بۇل تۋرالى «قامشى» پورتالى Today.kz-كە سىلتەمە جاساي وتىرىپ حابارلايدى.

«ال، قفف-نىڭ  ەكس-حاتشىسى اللەن ءچايجۇنىسوۆ ەندى  “استانا ەكسپو-2017″ ۇك ماركەتينگ جانە دامىتۋ دەپارتامەنتىنىڭ ديرەكتورى مىندەتىن اتقاراتىن بولادى»،-دەپ جازادى NUR.kz سايتى.

بەلگىلى بولعانداي، 2015 جىلدىڭ ماۋسىم ايىندا ا.ءچايجۇنىسوۆ قفف باس حاتشىسى قىزمەتىنەن بوساتۋ تۋرالى ءوتىنىش جازعان.

سونداي-اق، 2015 جىلدىڭ 23 ماۋسىمىنان باستاپ كومپانيانىڭ باسقارۋشى ديرەكتورى قىزمەتىنە بولات ءاشىموۆ كىرىسكەنى تۋرالى دا قازاقستاندىق باق-تا جازىلعان بولاتىن.

2015 جىلدىڭ ماۋسىم ايىندا “استانا ەكسپو-2017″ ۇك باسقارما ءتوراعاسى ءبىرىنشى ورىنباسارىنىڭ باس ديرەكتورى قىزمەتىنە الىشەر پىرىمبەتوۆ تاعايىندالدى. ول بۇعان دەيىن قارجى جانە اكىمشىلىك ماسەلەلەر بويىنشا باسقارما ءتوراعاسىنىڭ ورىنباسارى قىزمەتىندە بولعان.

سونىمەن، ەكسپو-2017 رەسمي سايتىنداعى مالىمەتتەرگە سايكەس، “استانا ەكسپو-2017″ ۇك باسقارماسىنا تاعايىندالعان تۇلعالاردى نازارلارىڭىزعا ۇسىنامىز:

ادىلبەك جاقسىبەكوۆ – باسقارما ءتوراعاسى؛

الىشەر پىرمەتوۆ – باس ديرەكتور – باسقارما ءتوراعاسىنىڭ ءبىرىنشى ورىنباسارى؛

سەرىك تازابەكوۆ – باسقارۋشى ديرەكتور؛

الماز جامانبەكوۆ – باسقارما ءتوراعاسىنىڭ ورىنباسارى؛

ماييا ەگىمبايەۆا – باسقارۋشى ديرەكتور؛

ۆلاديمير ليۋتوۆ – باسقارما ءتوراعاسىنىڭ ورىنباسارى؛

انۋاربەك مۋسين – باسقارۋشى ديرەكتور؛

مارات نۇرشايەۆ – باسقارۋشى ديرەكتور؛

مارلەن جاكەجانوۆ – باسقارما ءتوراعاسىنىڭ ورىنباسارى؛

بولات ءاشىموۆ – باسقارۋشى ديرەكتور؛

اللەن ءچايجۇنىسوۆ – باسقارۋشى ديرەكتور – ماركەتينگ جانە دامىتۋ دەپارتامەنتىنىڭ ديرەكتورى.

ەستەرىڭىزدە بولسا،  ۇلتتىق كومپانيادا جەمقورلىققا قاتىستى داۋ ورشىگەن بولاتىن. ماسەلەن، جاقىندا  “استانا ەكسپو-2017″ باسقارماسىنىڭ ەكس-توراعاسى تالعات ەرمەگيايەۆ “وزگەنىڭ مۇلكىن زاڭسىز يەلەندى” دەگەن كۇدىكپەن قۇرىقتالعان بولاتىن.

سونىمەن قاتار “استانا ەكسپو-2017″  ۇك قۇرىلىس دەپارتامەنتىنىڭ ەكس-باسشىسى قاجىمۇرات ۇسەنوۆ تە ءۇيقاماققا الىنعان.

ال باسقارما ءتوراعاسىنىڭ ورىنباسارى سانالىپ كەلگەن ۆەرا كوباليا قىزمەتىنەن كەتىپ، ونىڭ ارتىنشا، تۋريزم، ماركەتينگ جانە قوعاممەن بايلانىس باعىتىندا ۇلتتىق كومپانيادا قىزمەت ەتكەن سالتانات راحىمبەكوۆا دا ءوز ەركىمەن ورنىن بوساتقانى بەلگىلى بولدى.

نۇرزات توعجان