سولتۇستىك كورەيانىڭ مەملەكەتتىك KCNA اقپارات اگەنتتىگى سەنبى كۇنى كيم چەن ىن پحەنياننىڭ سولتۇستىگىندەگى تىڭايتقىشتار شىعاراتىن زاۋىتتىڭ اشىلۋ سالتاناتىنا قاتىسقانىن مالىمدەدى. بۇل تۋرالى قامشى ءتىلشىسى BBC جانە The Sun باسىلىمىنا سىلتەمە جاساپ حابارلايدى.

20 كۇن ۇزىلىستەن سوڭ جەرگىلىكتى ب ا ق سولتۇستىك كورەيا باسشىسىنىڭ سۋرەتتەرىن جاريالادى. مەملەكەتتىك اقپارات قۇرالىنىڭ جازۋىنشا، تىڭايتقىش زاۋىتىنىڭ لەنتاسىن قيعان كەزدە كيم چەن ىن كوڭىلدى بولعان. زاۋىتتىڭ اشىلۋ سالتاناتىنا سولتۇستىك كورەيا ليدەرىنىڭ قارىنداسى كيم ءو چجون دا قاتىسقان. بۇل اقپاراتتىڭ ناقتىلىعىن BBC دە، Reuters اگەنتتىگى دە ءوز بەتىنشە انىقتاي الماعانىن حابارلادى. 

الايدا سوڭعى ساعاتتاردا بريتانيالىق The Sun باسىلىمى كيم چەن ىننىڭ لەنتا قيعان ءساتىنىڭ فوتولارىن العاشقىلاردىڭ ءبىرى بولىپ جاريالادى. 

ايتا كەتەيىك، بۇعان دەيىن سولتۇستىك كورەيانىڭ بۇقارالىق اقپارات قۇرالدارى كيم چەن ىننىڭ وڭتۇستىك افريكا پرەزيدەنتىنە 27 ساۋىردە جولداعان قۇتتىقتاۋ حاتى مەن پحەنيان قۇرىلىسشىلارىنا جازعان العىس حاتىن جاريالاعان بولاتىن.  

36 جاستاعى ديكتاتور 11 ساۋىردەن بەرى كورىنبەي كەتكەن سوڭ، وعان قاتىستى ءتۇرلى قاۋەسەتتەر تاراپ، ونىڭ جۇرەك وتاسىنان كوز جۇمعانى جايىندا اقپارات پايدا بولدى، ءتىپتى، ونىڭ اينەك تابىتتا جاتقان فوتوسى الەۋمەتتىك جەلىلەردە كەڭ تارالدى. پحەنياننان قاشىپ شىققان زاڭ شىعارۋشى قىزمەتكەر سولتۇستىك كورەيا ليدەرىنىڭ وتكەن اپتادا ولگەنىن مالىمدەدى. ال بىرنەشە كۇن بۇرىن كيم چەن ىننىڭ وتباسىلىق پويىزىنىڭ جەرسەرىكتەن تۇسىرىلگەن سۋرەتى جاريالانىپ، ونىڭ ءتىرى ەكەنى تۋرالى وڭتۇستىك كورەيا پرەزيدەنتىنىڭ كەڭەسشىسى سۇحبات بەردى. سولتۇستىك كورەيا باسىلىمدارى كيم چەن ىننىڭ قۇرىلىسشى جۇمىسكەرلەرگە العىس حات جولداعانىن جازدى. ال، 25 ءساۋىر كۇنى جۇڭگو مەديسينالىق توبىنىڭ سولتۇستىك كورەيا استاناسى پحەنيانعا جىبەرىلگەنىن حابارلاعانبىز. سونىمەن بىرگە، كيم چەن ىننىڭ ومىرىنە ۇلكەن ءقاۋىپ ءتونىپ تۇرعانىن جازعان CNN اقپاراتىن دا جاريالادىق. ەگەر كيم چەن ىن كوز جۇمسا، ورنىنا قارىنداسىنىڭ كەلۋى مۇمكىن ەكەنىن جانە سولتۇستىك كورەيا باسشىسىنىڭ ءولىمى يادرولىق سوعىس ءقاۋپىن تۋدىراتىنىن جازعانبىز.