بالالاردىڭ ءبىر ساتتىك قۋانىشى ءۇشىن سانالى عۇمىرىن بەينەتكە جۇمساعان ۇلتتىمىزدا بالا تاربيەسىنىڭ ورنى بولەك. تىپتەن دۋمانداتىپ وتكىزەتىن ءدۇبىرلى تويىنىڭ العاشقى باستاۋى دا بالانىڭ ومىرگە كەلۋىمەن بايلانىسىپ جاتادى. وسى ءۇردىستى جالعاعان تۇركىستاندىقتار بالالار مەرەكەسىنە وراي كەشەندى ءىس-شارا جاساپ، سونىڭ اياسىندا داتالى كۇندى كەڭ كولەمدە اتاپ ءوتتى.

تاڭەرتەڭ ورتالىق ەسىمحان الاڭىندا باستاۋ العان شارادا بالالارعا مەرەكەلىك كوڭىل-كۇي سىيلايتىن مەرەكەلىك شاعىن كونسەرت پەن ءتۇرلى سايىستار ۇيىمداستىرىلدى. بۇدان سوڭ ارنايى سىي-سياپاتقا تولتىرىلعان كولىكتەر 100-دەن استام مۇگەدەك بالالاردىڭ ۇيلەرىنە مەرەكەلىك بازارلىق تاراتۋعا جول تارتتى.

وسىلايشا جالعاسىن تاپقان بۇلدىرشىندەردىڭ قۋانىشتى كۇنى رەسمي شارامەن جالعاستى. قالالىق مادەنيەت ۇيىندە وتكەن «بار جاقسىلىق – بالالارعا» اتتى كونسەرتتىك باعدارلامانىڭ العاشقى بولىمىندە قالا اكىمى بالالاردى قۇتتىقتاپ، مەكتەپ وقۋشىلارىنا العىس حاتتار مەن باعالى سىيلىقتار تابىس ەتتى. شاھار باسشىسىنىڭ ايتۋىنشا ءبۇل كۇنى جالپى سانى 500 بالاعا ءتۇرلى دەڭگەيدە قولداۋ كورسەتىلمەك. سونىڭ ىشىندە، جازعى دەمالىس لاگەرلەرىنە 163 بالاعا تەگىن جولداما بەرىلسە، 128 بالا كيىم-كەشەكپەن قامتىلدى. سونىمەن بىرگە، مۇنداي قولداۋلاردان بالاباقشا بۇلدىرشىندەرى دە قۇر قالعان جوق. ايتا كەتەرلىگى، سوڭعى جىلدارى تۇركىستاندا بالالاردى بالاباقشامەن قامتۋ جۇمىستارى قارقىندى جۇرگىزىلىپ كەلەدى. سونىڭ ناتيجەسىندە 2009 جىلدان بەرى 43 ءبىلىم مەكەمەلەرى بۇلدىرشىندەرگە ەسىك اشىپ، وسى ۋاقىت ارالىعىندا بالالاردى مەكتەپكە دەيىنگى مەكەمەمەن قامتۋ 13 پايىزدان 76،5 پايىزعا ارتقان. ايتا بەرسەك، 22 مەكتەپتىڭ جاڭا عيماراتى دا وسى جىلدار ىشىندە پايدالانۋعا بەرىلىپ ۇلگەرگەن. ايتا كەتۋ كەرەك، مەرەكە كۇنىندە بالالار قۋانىشىن ەسەلەي ءتۇسۋ ءۇشىن جالپى كولەمى 6 ملن-عا تارتا قارجى جۇمىسالعان. ونىڭ ىشىندە بالالار دەمالىسى ءۇشىن 2،8 ملن. تەڭگەسى جەرگىلىكتى بيۋدجەتتەن قارالسا، قالعان قارجى قالاداعى جانى جومارت جانداردىڭ ەسەبىنەن بەرىلگەن.    

مىنە، وسىنداي جان جادىراتار جاڭالىقتارى كوپ مەرەكەدە كيەلى وڭىردەگى وبلىستىق بالالاردى وڭالتۋ ورتالىعىنىڭ تاربيەلەنۋشىلەرى دە شات-شادىمان قۋانىشقا بولەندى. تاريحي-مادەني ەتنوگرافيالىق ورتالىقتا بالالارعا قۋانىش سىيلاعان شارادا بۇلدىرشىندەر ءوز ريزاشىلىقتارىن زور قوشەمەتىمەن جەتكىزدى.         

تۇركىستان قالاسى اكىمىنىڭ باسپا ءسوز قىزمەتى