وڭتۇستىك قازاقستان وبلىسىنىڭ اكىمى بەيبىت اتامقۇلوۆ العاشقى جۇمىس ساپارىندا شىمكەنت قالاسىندا كۇردەلى جوندەۋدەن ءوتىپ جاتقان ءبىرقاتار مەكتەپتەردەگى جۇمىس بارىسىمەن تانىستى، دەپ حابارلايدى وقو اكىمىنىڭ باسپا ءسوز قىزمەتىنەن.

وبلىستا بيىلعى جىلى رەسپۋبليكالىق جانە وبلىستىق بيۋدجەت ەسەبىنەن 104 ءبىلىم نىسانىنىڭ قۇرىلىسى قولعا الىنعان. ونىڭ ىشىندە جىل اياعىنا دەيىن 67 ءبىلىم مەكەمەسىنىڭ قۇرىلىسىن اياقتاۋ جوسپارلانىپ، بۇگىنگە دەيىن 37 نىسان ىسكە قوسىلعان. پايدالانۋعا بەرىلگەن جاڭا نىسانداردىڭ ىشىندە عيماراتى اپاتتى دەپ تانىلعان 19 مەكتەپتىڭ دە قۇرىلىسى اياقتالىپ وتىر. جىل سوڭىنا دەيىن وسى ساناتتاعى تاعى 10 مەكتەپتىڭ قۇرىلىسىن ءبىتىرۋ جوسپارلانعان. قالعان 27 اپاتتى مەكتەپتىڭ ماسەلەسى 2017 جىلعا دەيىن كەزەڭ-كەزەڭىمەن شەشىلمەك.

سونىمەن قاتار، بيىلعى جىلى 100 ءبىلىم نىسانىندا كۇردەلى جوندەۋ جۇمىستارى جۇرگىزىلۋدە. قازىرگى تاڭدا وسى باعىتتاعى جۇمىستاردىڭ 80 پايىزى اياقتالعان. ءبىلىم مەكەمەلەرىنىڭ جوندەۋ جۇمىستارىن وبلىس اۋماعىندا 25 تامىزعا دەيىن اياقتاۋ جوسپاردا بار.

جاڭا وقۋ جىلى قارساڭىندا ءبىلىم مەكەمەلەرىنىڭ دايىندىعىن پىسىقتاۋدى ماقسات ەتكەن وبلىس اكىمى باستاعان جۇمىس توبى شىمكەنتتەگى ب.مومىش ۇلى اتىنداعى №44 جانە قازىبەك بي اتىنداعى №36 ورتا مەكتەپتەرىندەگى جوندەۋ جۇمىستارىمەن، سايرام ەلدى مەكەنىندەگى 1200 ورىندىق ورتا مەكتەپتىڭ قۇرىلىسىمەن تانىستى.

ءبىلىم وشاقتارىنىڭ الداعى وقۋ جىلىنا دايىندىعىن قاداعالاعان وبلىس باسشىلىعى مەردىگەرلەردەن جوسپارلانعان جۇمىستاردى ءوز مەرزىمىندە اياقتاۋدى تالاپ ەتتى. قۇرىلىس بارىسىندا قولدانىلىپ جاتقان قۇرىلىس ماتەريالدارى ساپالى بولۋى كەرەكتىگىن، مەكتەپ اۋلالارىنىڭ كورىكتەندىرىلۋى دە ۇنەمى نازاردا بولۋى قاجەتتىلىگىن ەسكەرتتى. الەۋمەتتىك نىسانداردىڭ قۇرىلىس-مونتاجداۋ جۇمىستارىنا قاجەتتى جوبالاۋ-سمەتالىق قۇجاتتاردى ازىرلەۋدە عيماراتتاردىڭ جىلۋ جۇيەلەرىن جىلىتۋ ماۋسىمىندا ىس-جۇزىندە قاداعالاۋ ماسەلەسى مەن مەكتەپ ىرگەسىندەگى جەر ۋچاسكەلەرىن سۋعارۋ جۇيەسىن ورناتۋ تالاپتارىن ەسكەرۋدى جۇكتەدى. 

جۇمىس ساپارى قورىتىندىسىندا ءبىلىم وشاقتارىنداعى اتقارىلىپ جاتقان جۇمىستاردى وڭ باعالاعان بەيبىت اتامقۇلوۆ مەكتەپتەردە بالالاردىڭ ساپالى ءبىلىم الۋى ءۇشىن بارلىق جاعداي جاسالۋى كەرەكتىگىنە كوڭىل ءبولىپ، وبلىس اكىمدىگى الداعى ۋاقىتتا دا ساماننان سالىنعان مەكتەپتەردىڭ ورنىنا زاماناۋي ءبىلىم وشاقتارىن سالۋ جونىندە ناقتىلى شارالاردى اتقاراتىنىن ايتتى.

دەرەككوزى: قازاقپارات