بۇگىن الماتىدا «دامۋ» كاسىپكەرلىكتى دامىتۋ قورىنان سۋبسيديا الىپ، كاسىبىن جۇرگىزىپ وتىرعان كومپانيالاردىڭ ءوندىرىس ورىندارىنا باسپاسوزگە ارنالعان تۋر ۇيىمداستىرىلدى.
«دامۋ» قورى الماتى قالالىق فيليالىنىڭ ديرەكتورى سۆەتلانا نازاريۋك ەل ۇكىمەتى كاسىپكەرلىكتى قولداۋعا ارنالعان مەملەكەتتىك باعدارلامالارعا وزگەرىس ەنگىزىپ جاتقانىن ءمالىم ەتتى.
– بيزنەستىڭ جول كارتاسى – 2025 مەملەكەتتىك باعدارلاماسىنا ەنگىزىلگەن وزگەرىسكە ساي، مونوقالا، شاعىن قالا جانە اۋىلدىق ەلدىمەكەندەگى كاسىپكەرلەردىڭ بيزنەس-باستامالارىن قولداۋ باعىتى قىسقارتىلدى. ەندى باعدارلاما كاسىپكەرلەرگە پورتفەلدىك سۋبسيديالاۋ تۇرىندەگى قارجىلاي قولداۋ شارالارىن جاسايدى. ول بويىنشا ينۆەستيسيالىق ماقساتتاعى كرەديتتىڭ ماكسيمالدىق سوماسى – 20 ملن تەڭگە. قۇرال-جابدىق ساتىپ الۋعا 5 ملن تەڭگەگە دەيىن قارجى بەرىلەدى. سىياقى مولشەرلەمەسىن تاعايىنداۋ بارىسىندا ۇلتتىق بانكتىڭ 8،5 پايىز كولەمىندەگى مولشەرلەمەسى قوسا ەسەپتەلەدى. بورىشكەر تەك 6 پايىزبەن تولەيدى. ينۆەستيسيالىق جوبالارعا الىنعان قاراجاتتى 3 جىلعا دەيىن، قۇرال-جابدىق قارجىسىن 2 جىلعا دەيىنگى مەرزىمدە قايتارۋ كەرەك. باعدارلاما اياسىندا دامۋ قورىنان 85 پايىز كەپىلدىك بەرىلەدى. پورتفەلدىك كەپىلدەندىرۋ مەن سۋبسيديالاۋ بويىنشا نەسيە بەرۋ ماسەلەسىن ەكىنشى دەڭگەيلى بانكتەر مەن شاعىنقارجىلىق ۇيىمدار شەشەدى. بۇگىندە سبەربانك رەسەي، حالىق بانك، اتف بانك، نۇربانك، الفا بانك، بانك سەنتركرەديت، يسلام بانكى، ءال-حيلال بانكى، RBK بانك سەكىلدى قارجىلىق ۇيىمدارمەن كەلىسىم جاسالعان، – دەدى سۆەتلانا نازاريۋك.
ونىڭ ايتۋىنشا، ەكىنشى باعىتتاعى وزگەرىستەرگە ساي، ءىرى كاسىپكەرلىكتىڭ ىقتيمالدى سالالارىنىڭ ءتىزىمى كەڭەيگەن. سونداي-اق وزگە بانكتەردەن، ليزينگتىك كومپانيالاردان الىنعان مەرزىمى 8 جىلدان اسپاعان كرەديتتەردى قايتا قارجىلاندىرۋ مۇمكىندىگى تۋعان.
بيزنەستىڭ جول كارتاسى باعدارلاماسى بويىنشا الماتىنىڭ 2020 جىلعى بيۋدجەتى 9،7 ملرد تەڭگەنى قۇرايدى.
– قازىرگى تاڭدا الماتى بيزنەستىڭ جول كارتاسى – 2020 باعدارلاماسى اياسىنداعى قولداۋ جانە سۋبسيديالاۋ مەن كەپىلدەندىرۋ بويىنشا كوش باستاپ تۇر. جىل باسىنان بەرگى 9 ايدا 59 ملرد تەڭگە سوماعا 168 سۋبسيديالاۋ كەلىسىم-شارتى جاسالدى. ءوسىم 2019 جىلعى 3 توقسانمەن سالىستىرعاندا 39 پايىزدى قۇرادى. كرەديتتىڭ جالپى سوماسى 11،5 ملرد تەڭگە بولاتىن 139 جوبا 3،8 ملرد تەڭگەگە كەپىلدەندىرىلدى. «باسىم جوبالار مەحانيزمى» باعدارلاماسىنىڭ قارجىلاندىرىلۋى ارتتىرىلىپ، 1 ترلن تەڭگەگە دەيىن جەتتى. باعدارلاماعا ەنەتىن تاۋارلار ءتىزىمى ارتتى. 3-تەن 5 ملرد تەڭگەگە دەيىن كرەديت الىنعاندا كەپىلدەندىرۋ كولەمى 30 پايىز بولادى. توتەنشە جاعداي رەجيمى «دامۋ» قورى ارقىلى مەملەكەتتىك قولداۋ الۋعا ەش كەدەرگى كەلتىرمەگەنىن ايتا كەتكەن ءجون. سۋبسيديالاۋ مەن كەپىلدەندىرۋ بويىنشا وتىنىمدەر ونلاين تۇردە Egov، ونلاين دامۋ پورتالدارى ارقىلى جۇرگىزىلەدى، – دەدى «دامۋ» قورى الماتى قالالىق فيليالىنىڭ ديرەكتورى.
2020 جىلى قور تاراپىنان الماتى قالاسىنداعى كاسىپورىندارعا 221 جوبا بويىنشا نەسيەنىڭ جالپى سوماسى 191 ملرد تەڭگەگە پايىزدىق مولشەرلەمەنى سۋبسيديالاۋ تۇرىندە قارجىلىق قولداۋ كورسەتىلگەن.
«دامۋ» قورىنىڭ قارجىلىق قولداۋىنا يە بولعان جاس كومپانيالاردىڭ ءبىرى – «Astro Engineering». كومپانيا 2018 جىلدان بەرى TCL ساۋدا ماركاسىنىڭ تەلەديدارلارىن قۇراستىرۋمەن اينالىسادى. كومپانيا زاۋىتىندا تەلەديدارلار قۇراستىرىلىپ، ولاردىڭ باعدارلاماسى ورناتىرىلادى. «Astro Engineering» ءونىمى بۇگىندە الماتى قالاسىنداعى تۇرمىستىق تەحنيكا ساتاتىن بارلىق ءىرى جەلىلەردە ۇسىنىلعان.
– بيىل كومپانيا «ءدامۋ-وندىرىس» باعدارلاماسى بويىنشا مەملەكەتتىك قولداۋعا يە بولدى. قاجەتتى شيكىزاتتى ساتىپ الۋعا «قازاقستان حالىق بانكى» ارقىلى 600 ملن تەڭگە جەڭىلدەتىلگەن نەسيە الدىق. قارىزدىڭ مولشەرلەمەسى جىلدىق 6 پايىزدى قۇرايدى، – دەيدى ونەركاسىپ ديرەكتورى ۆالەريي سون.
ونىڭ سوزىنشە، TCL برەندى تەلەديدار ساتۋدان الەمدە 2-ورىنعا شىققان. الماتىداعى زاۋىتتا وندىرىلەتىن ءونىم ازىرگە تەك قازاقستان اۋماعىنا تارالادى. جاقىن كەلەشەكتە تاۋاردى ەكسپورتتاۋ جوسپارلانىپ وتىر. كومپانيانىڭ بيىلعى مەجەسى – جىل سوڭىنا دەيىن 50 مىڭنان استام تەلەديدار ءوندىرۋ. كاسىپورىندا 80-گە جۋىق ادام جۇمىس ىستەيدى.
«دامۋ» قورىنان قولداۋ العان كەلەسى كومپانيا – كارىز قۇبىرلارى مەن تەرەزە پروفيلدەرىن وندىرەتىن «Novus Polymer» جاۋاپكەرشىلىگى شەكتەۋلى سەرىكتەستىگى. كومپانيا نارىقتا 12 جىلدان بەرى جۇمىس ىستەپ كەلەدى. جىلىنا 30 مىڭ توننا ءونىم وندىرۋگە قاۋقارلى. كومپانيا 300 ادامدى جۇمىسپەن قامتىپ وتىر. ونىڭ 97 پايىزى – قازاقستان ازاماتتارى.
– ءبىزدىڭ كاسىپورىن «ءدامۋ-وندىرىس» باعدارلاماسىنىڭ قاتىسۋشىسى. سونىڭ ارقاسىندا «قازاقستان حالىق بانكى» ارقىلى 300 ملن تەڭگە سوماسىنا نەسيە الدى. اتالعان قولداۋ كومپانيانىڭ اينالىمدىق قاراجاتىن تولتىرۋعا مۇمكىندىك بەردى، – دەپ اتاپ ءوتتى كومپانيا ديرەكتورى ەنگين شەمشەك.
كومپانيا وسى كۇنگە دەيىن قازاقستان ەكونوميكاسىنا 50 ملن دوللاردان استام ينۆەستيسيا قۇيعان. كومپانيا باسشىسىنىڭ سوزىنشە، «Novus Polymer»ء-دىڭ قازاقستاننىڭ بارلىق ءىرى قالالارىندا رەسمي ديلەرلەرى بار. سونداي-اق ءونىم قىرعىزستانعا، تاجىكستانعا، وزبەكستانعا جانە اۋعانستانعا ەكسپورتتالادى.
«دامۋ قورى ارقىلى كاسىپكەرلىكتىڭ ءتۇرلى سالالارى جەڭىلدەتىلگەن نەسيە الىپ وتىر. سولاردىڭ قاتارىنا «سۇڭقار» ەمدەۋ-دياگنوستيكالىق ورتالىعى دا ەنەدى.
ورتالىق مەديسينالىق قىزمەت كورسەتۋ نارىعىندا 2007 جىلدان بەرى جۇمىس ىستەيدى. بيزنەستى قولداۋدىڭ مەملەكەتتىك باعدارلاماسى اياسىندا جابدىقتار ساتىپ الۋعا جەڭىلدىكپەن نەسيە العان.
– «بيزنەستىڭ جول كارتاسى 2020» باعدارلاماسى شەڭبەرىندە ءبىزدىڭ كومپانيا ەكىنشى دەڭگەيلى بانكتەن 14% جىلدىق مولشەرلەمە بويىنشا 550 ملن تەڭگە سوماسىنا نەسيە الدى. ونىڭ 8،4%-ىن «دامۋ» قورى سۋبسيديالايدى. نەسيەگە العان قاراجاتقا كومپانيا مرت جانە كت اپپاراتتارىن ساتىپ الدى. «دامۋ» قورى كومپانيانى 5 جىلدان بەرى قولداپ كەلەدى، – دەدى «سۇڭقار» ەمدەۋ-دياگنوستيكالىق ورتالىعى ديرەكتورىنىڭ ورىنباسارى قۋانىش كەرىمقۇلوۆ.
ونىڭ سوزىنشە، ورتالىقتا ەل بويىنشا 5 مىڭعا تارتا ادام جۇمىس ىستەيدى.
پىكىر قالدىرۋ