بۇگىن اقتوبە وبلىسىنىڭ اكىمى وڭداسىن ورازالين وڭىردەگى جۇقپالى اۋرۋلاردىڭ، ونىڭ ىشىندە COVID-19 كوروناۆيرۋستىق ينفەكسياسىنىڭ ورشۋىنە قارسى تۇرۋعا دايىندىق دەڭگەيىن جوعارىلاتۋ ماقساتىندا وبلىستاعى 19 مەديسينالىق مەكەمەگە جەدەل جاردەم كولىگىنىڭ كىلتىن تابىستادى. سوڭعى ۇلگىدەگى قۇرال-جابدىقتارمەن قامتاماسىز ەتىلگەن جەدەل جاردەم كولىكتەرى اقتوبە قالالىق #1،2،3،4، ەمحانالارى مەن قوبدا، العا، مۇعالجار، ىرعىز، بايعانين، حرومتاۋ، ويىل، شالقار، ەمبى، تەمىر اۋداندىق اۋرۋحانالارىنا بەرىلدى. 

ايماق باسشىسى ساپالى دەنساۋلىق ساقتاۋ ەل ءال-اۋقاتىنىڭ نەگىزگى كورسەتكىشتەرىنىڭ ءبىرى ەكەنىن جەتكىزە وتىرىپ، جەرگىلىكتى اق حالاتتىلارعا العىس ءبىلدىردى.
“حالىققا شۇعىل مەديسينالىق كومەك كورسەتۋدىڭ نەگىزگى باعىتتارىنىڭ ءبىرى - جەدەل مەديسينالىق كومەك. ناۋقاستاردىڭ ءومىرىن اراشالاۋعا العاش بولىپ جەدەل- جاردەم بريگاداسى كەلەدى، ال ناۋقاستاردىڭ تاعدىرى دارىگەرلەردىڭ ارەكەتتەرىنە، جابدىققا، سونىڭ ىشىندە كولىككە بايلانىستى. پاندەميا كەزىندە ازاماتتارعا ايانباي كومەك كورسەتكەندەرىڭىز ءۇشىن العىس بىلدىرەمىن”،- دەدى وڭداسىن ورازالين. 10 مىڭ حالقى بار ەلدىمەكەندە 1 جەدەل جاردەم كولىكتىڭ بولۋى مىندەتتى دەپ كورسەتىلگەن دەنساۋلىق ساقتاۋ مينيسترلىگى بەكىتكەن ستاندارتقا سايكەس اقتوبە وبلىسىندا بۇل شارالار بەلسەندى جۇزەگە اسىرىلىپ وتىر. جىل باسىنان بەرى 22 جەدەل- جاردەم كولىگى ساتىپ الىنسا، قازان ايىنىڭ سوڭىنا دەيىن تاعى دا 22 مەدەسينالىق كولىك الىنادى.ناتيجەسىندە، ايماقتاعى جاڭا جەدەل-جاردەم كولىكتەرىنىڭ سانى 63- ءتى قۇرايدى. تابىستالعان 19 كولىكتىڭ ءىشى قاجەتتى مەديسينالىق جابدىقتارمەن تولىق قامتاماسىز ەتىلگەن. وندا وكپەگە جاساندى اۋا بەرۋ اپپاراتىنان باستاپ دەفيبريللياتور، ەلەكتروكارديوگراف، مونيتور، ەلەكترووتسوس جابدىقتارى ورناتىلعان.