ەلىمىزدىڭ بىرنەشە وڭىرىندە ازىق-تۇلىكتىڭ باعاسى كوتەرىلە باستادى. اسىرەسە حالىق كوپ تۇتىناتىن تاۋارلاردىڭ قۇنى رەكوردتىق كورسەتكىشپەن وسۋدە. بۇل تۋرالى «قامشى» پورتالى كتك ارناسىنا سىلتەمە جاساي وتىرىپ حابارلايدى.

قىمباتشىلىق، اسىرەسە پەتروپاۆل، قوستاناي جانە تاراز قالالارىندا قاتتى سەزىلىپ جاتىر. ونىڭ ۇستىنە كەيبىر ازىق تۇرلەرى ءتىپتى دۇكەندەردە جوق. ءار ايماقتا باعانى تۇراقتاندىرۋ ءۇشىن ارنايى شتاب قۇرىلعانىمەن، كاسىپكەرلەر اكىمشىلىكتىڭ امىرىنە كونەتىن ەمەس.

پەتروپاۆلدا دۇكەن سورەلەرىنەن ءۇش كۇن بويى جوعالىپ كەتكەن قانت تەك 25 تامىزدا عانا پايدا بولدى. ءبىراق باعاسى اسپانداپ، تۇرعىنداردىڭ قالتاسىنا سالماق سالۋدا. كەلىسى 160 تەڭگەدەن ساتىلعان شەكەر 200 تەڭگەگە شارىقتاپ كەتكەن. سۇيىق ماي مەن ەت قۇنىنىڭ كوتەرىلۋى دە تۇرعىنداردىڭ ىزاسىن تۋعىزۋدا.ءتىپتى، ىرىمشىكتىڭ باستاپقى قۇنى 650 تەڭگەنى قۇراسا، ديەۆالۆاسيادان سوڭ 900-گە جەتكەن.

قوستانايدا دا ازىق-تۇلىكتىڭ باعاسى مىڭ قۇبىلىپ تۇر. رەسەيدەن تاسىمالداناتىن ءونىم 5-10 تەڭگەگە كوتەرىلسە، يمپورتتىق تاۋار قۇنى 20 پايىزعا شارىقتاعان. بۇل جاعداي جۇرتقا قاتتى سەزىلىپ جاتقان جوق. سەبەبى ازىرگە قورداعى تاۋار ساۋداعا شىعۋدا. ەندى جاڭا ءونىم تۇسكەندە قىمباتشىلىق بولۋى بەك مۇمكىن. ءبىراق بۇل دۇربەلەڭدى شەنەۋنىكتەر بايقامايتىن ءتارىزدى.

جامبىل وبلىسىنىڭ جۇرتى ەندى قانتپەن مۇلدەپ قوش ايتىسۋى ىقتيمال. ايماقتاعى كوتەرمە ساۋدا ورىندارىندا قانت اتىمەن جوق. كەي جەرلەردە بولعان كۇننىڭ وزىندە قۇنى تىم قىمبات. بۇعان دەيىن 3500 تەڭگەگە ساتىلعان ءبىر قاپ شەكەر، 4500-گە ءبىر-اق جەتتى.

ساۋداگەرلەر تارازداعى قانت زاۋىتى جۇمىسىن توقتاتتى دەگەن ءۋاج ايتۋدا. سول سەبەپتى دەلدال فيرمالار تاۋار جەتكىزبەي جاتسا كەرەك. الايدا شەكەر شىعاراتىن ءوندىرىس باسشىلىعى ءونىم تاپشى دەگەن بەكەر دەپ وتىر. ءار وڭىردە، باعانى باقىلاۋ ءۇشىن ارنايى شتاب قۇرىلعان. ءبىراق ازىرگە ونىڭ جۇرتقا پايداسى شامالى.

گۇلدەن ءابدىباقىت