8 460 ءوتىنىم تەكسەرۋدەن ءساتتى ءوتتى. زاڭناماعا سايكەس «بجزق» اق-عا ءوتىنىم كەلىپ تۇسكەن كۇننەن باستاپ 5 جۇمىس كۇنىنەن كەشىكتىرىلمەي، سالىمشىلاردىڭ «وتباسى بانكى» اق ارنايى شوتتارىنا شامامەن 49،2 ملرد تەڭگە اۋدارىلادى. اۋدارىمنىڭ ورتاشا سوماسى – 5،8 ملن تەڭگە.

«بجزق» اق 1832 ءوتىنىمدى تومەندەگى نەگىزگى سەبەپتەر بويىنشا قابىلدامادى:

1. سومالار قاتە، ياعني شوتتاعى زەينەتاقى جيناقتارىنىڭ كولەمىنەن اسىرا كورسەتىلگەن. سوندىقتان وتىنىمدەردى «وتباسى بانكى» ۇسىنىمدارىن باسشىلىققا الا وتىرىپ، مۇقيات تولتىرۋ كەرەك.

2. جەكە تابىس سالىعىن (جتس) تولەۋ ءتاسىلىن تاڭداۋ كەزىندە الۋعا سۇرانىس جاسالاتىن سومالار دۇرىس كورسەتىلمەگەن.

سالىق زاڭناماسى بويىنشا مىندەتتى زەينەتاقى جارنالارىنا قورعا اۋدارىلعان كەزىندە جتس سالىنبايدى، سوندىقتان زەينەتاقى تولەمدەرىنە سالىق سالىنۋعا ءتيىس. سالىمشى ءبىرجولعى زەينەتاقى تولەمىن العان كەزدە جتس تولەۋدىڭ ەكى ءتاسىلىن تاڭداۋعا قۇقىلى. ءبىرىنشى ءتاسىل – كەيىنگە قالدىرۋ، ەكىنشى ءتاسىل – ءبىرجولعى زەينەتاقى تولەمى كەزىندە سالىقتى تولىق كولەمدە بىردەن تولەۋ. سالىمشىنىڭ شەشىمى ۋاكىلەتتى وپەراتورعا بەرىلەتىن وتىنىمدە كورسەتىلۋى كەرەك.

ەگەر ءوتىنىش بەرۋشى جتس تولەۋدى كەيىنگە قالدىرۋ تۋرالى شەشىم قابىلداسا، وندا ول وتىنىمدە سۇراتىلاتىن سومانى جتس-تى شەگەرمەستەن كورسەتۋگە ءتيىس. ەگەر ءوتىنىش بەرۋشى جتس-تى تولىق كولەمدە بىردەن تولەۋدى ۇيعارسا، وندا ول وتىنىمدە الۋعا بولاتىن سومانى 10% مولشەرىندەگى جتس-تى شەگەرە وتىرىپ كورسەتۋى قاجەت.

بجزق بەرەتىن ءۇزىندى كوشىرمەدە سالىمشىعا ىڭعايلى جانە ءوز بەتىنشە تاڭداۋ جاساۋ ءۇشىن ەكى سوما دا كورسەتىلگەن. سالىمشى كورسەتەتىن، الۋعا بولاتىن سوما بجزق-دان ونىڭ ۋاكىلەتتى وپەراتوردا اشىلعان ارنايى شوتىنا تۇسەدى.

3. وتىنىمدە الۋعا سۇرانىس جاسالاتىن سومالار ەڭ از جەتكىلىكتىلىك شەگىن ەسەپكە الماستان كورسەتىلەدى. سالىمشىلار ءوز وتىنىمدەرىندە الۋعا بولاتىن جانە ءۇزىندى كوشىرمەدە كورسەتىلگەن سوما شەگىندە ەمەس، جەكە زەينەتاقى شوتىنداعى زەينەتاقى جيناقتارىنىڭ بارلىق سوماسىن كورسەتكەن.

4. وتىنىمدەردە ۆاليۋتا باعامدارىنىڭ قۇبىلمالىلىعى جانە زەينەتاقى اكتيۆتەرىنىڭ ينۆەستيسيالىق پورتفەلىندەگى قارجى قۇرالدارى قۇنىنىڭ وزگەرۋى ناتيجەسىندە ينۆەستيسيالىق تابىستىڭ نارىقتىق اۋىتقۋىنا بايلانىستى وزگەرىستەردى ەسكەرمەيتىن وزەكتى ەمەس سومالار كورسەتىلگەن.

5. «بجزق» اق دەرەكتەر بازاسىندا جەكە زەينەتاقى شوتتارى جانە تيىسىنشە زەينەتاقى جيناقتارى جوق تۇلعالاردان دا وتىنىمدەر تۇسكەن.

6. سالىمشىلار ءبىرىن-بىرى قايتالايتىن وتىنىمدەر دە بەرگەن.

وسى جايتتاردى ەسكەرە وتىرىپ، ازاماتتارعا وزدەرىنىڭ زەينەتاقى جيناقتارى تۋرالى وزەكتى اقپاراتتى، ونىڭ ىشىندە قولجەتىمدى سوما تۋرالى مالىمەتتەردى enpf.kz سايتىنداعى جەكە كابينەتتەن نەمەسە ءبىرىڭعاي جيناقتاۋشى زەينەتاقى قورىنىڭ موبيلدىك قوسىمشاسى ارقىلى ءبىرجولعى زەينەتاقى تولەمدەرىن الۋعا تىكەلەي ءوتىنىم بەرەر الدىندا مۇقيات تەكسەرۋگە كەڭەس بەرىلەدى.

زەينەتاقى جيناقتارى تۋرالى اقپارات «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» ق ر زاڭىنىڭ تالاپتارىنا سايكەس زەينەتاقى جيناقتارىنىڭ قۇپياسىن قامتاماسىز ەتۋ ماقساتىندا سالىمشىنىڭ وزىنە عانا بەرىلەدى.