قوستاناي وبلىسىنىڭ اكىمى نۇرالى سادۋاقاسوۆ قازاق ءتىلىن ۇيرەنۋگە ۋادەسىن بەردى. بەيسەنبى كۇنى استانادا وتكەن باسپاسوز-كونفەرەنسياسىندا شەنەۋنىككە وبلىستىڭ تەك الەۋمەتتىك-ەكونوميكالىق جەتىستىكتەرى جونىندە عان ەمەس، ودان وزگە دە  سۇراقتارعا  جاۋاپ بەرۋگە تۋرا كەلدى، دەپ حابارلايدى   NewTimes.kz سايتى.

ءجۋرناليستىڭ اكىمگە: "قاشان قازاق ءتىلىن ۇيرەنەسىز" دەپ قويعان سۇراعىنا سادۋاقاسوۆ بىلاي دەپ جاۋاپ بەردى: "مەن ورىسشا-قازاقشا ارالاس مەكتەپتە وقىعانمىن. ينستيتۋتتى ورىس تىلىندە ءبىتىرىپ شىقتىم. ءوزىم بۇرىن جۇمىس جاساعان اۋدانداردا  تەك ورىس تىلىندە قاتىناسۋعا تۋرا كەلدى. ماعان ۋاقىت بەرىڭىزدەر".

اۋدان باسشىسى قازىرگى ۋاقىتتا قوستاناي وبلىسىندا قازاق ۇلتىنىڭ ۇلەسى  38 پايىزعا جەتكەندىگى جونىندە ايتتى. بۇدان الدىڭعى جىلدارى ونداعى قازاقتاردىڭ  ۇلەسى تەك 19 پايىزدى العان. باسپاسوز-كونفەرەنسياسى بارىسىندا اكىمگە باس-اياعى 30-عا جۋىق سۇراق قويىلدى. ب ا ق وكىلدەرىن قازىرگى تاڭداعى قوستاناي وبلىسىنىڭ جولدارى، ينۆەستورلىق جوبالاردىڭ ىسكە اسۋى، مەكتەپ، بالاباقشا جاعدايى، حالىققا مەكەن-جاي بويىنشا قىزمەت كورسەتۋ ماسەلەلەرى جونىندە مالىمەت الدى. سونىمەن قاتار، نۇرالى سادۋاقاسوۆ جەكە ءوزى بلوكقا جاۋاپ بەرەدى مە، ازاماتتاردىڭ ارىزدارىن تىڭداۋ ءۇشىن قابىلدايدى ما، قوستانايدا حالىققا ەڭبەگى سىڭگەن قايراتكەرلەرگە ەسكەرتكىش سالۋ جولعا قويىلعان ب؟- دەگەن ساۋالدار قويىلدى.

نۇرالى سادۋاقاسوۆ قوستاناي اكىمى بولىپ 2013 جىلى 20 قاڭتاردا سەرگەي كۋلاگيننىڭ ورنىنا بەكىتىلگەن.