مۇگەدەكتىك - بۇكىلالەمدىك قاۋىمداستىق ءۇشىن مەديسينالىق - الەۋمەتتىك پروبلەمالاردىڭ ءبىرى. الەمدىك دەرەككە سۇيەنسەك، بۇگىندە مۇگەدەكتىگى بار جاندار جەر شارى ادامدارىنىڭ 10 پايىزىن قۇرايدى ەكەن. وكىنىشكە وراي، ولاردىڭ بارلىعى دەرلىك قاجەتتى الەۋمەتتىك  كومەكتى الىپ، قوعامنىڭ ومىرىنە تولىققاندى قاتىسا المايدى. مۇنىڭ سەبەبى  ءارتۇرلى توپتاعى مۇگەدەكتەر ءۇشىن قورشاعان ورتانىڭ قاجەتتى دەڭگەيدە  جايلىلىعىن قامتاماسىز ەتە الاتىنداي دامىماعانىندا.

قازىرگى قوعامنىڭ مىندەتى -  بارلىق ادامدار ءۇشىن، سونىڭ ىشىندە مۇمكىندىگى شەكتەۋلى ازاماتتار ءۇشىن دە قولايلى ورتامەن قامتاماسىز ەتۋ جولىندا قىزمەتتەنۋگە قادامدار جاساۋ.

 بارلىق الەۋمەتتىك نىساندار سياقتى، حالىققا قىزمەت كورسەتۋ ورتالىقتارى دا  مۇمكىندىگى شەكتەۋلى ادامداردىڭ مەملەكەتتىك قىزمەتتەردى الۋعا كەلۋى ءۇشىن ىڭعايلى ورتا جاساۋدا. ولاردىڭ كىرىپ-شىعۋىن وڭايلاتۋ ءۇشىن پاندۋستار ورناتىلعان. ءبىرىنشى جانە ەكىنشى توپتاعى مۇگەدەكتەر ءۇشىن  ۇيدەن قىزمەت كورسەتۋگە جاعداي جاسالعان. بۇرىن ولارعا قانداي دا بولماسىن مەملەكەتتىك قىزمەت تۇرلەرىن الۋ ءۇشىن حالىققا قىزمەت كورسەتۋ ورتالىقتارىنا وزدەرى كەلىپ نەمەسە باسقا ادامعا نوتاريالدى كۋالاندىرىلعان سەنىم حات بەرۋگە تۋرا كەلەتىن. بۇل ارينە كوپتەگەن قيىنشىلىقتار تۋعىزاتىن. قازىرگى ۋاقىتتا بۇل ساناتتاعى ازاماتتار  ءبىرىڭعاي  بايلانىس ورتالىعىنىڭ «1414» ءنومىرىن تەرۋ ارقىلى قاجەتتى قىزمەتكە تاپسىرىس بەرە الادى. ول ءۇشىن كەز-كەلگەن ءموبيلدى تەلەفوننان تەگىن قوڭىراۋ شالۋ ارقىلى ءوزىنىڭ بايلانىس تەلەفوندارى مەن قاجەتتى اقپاراتتاردى قالدىرۋى جەتكىلىكتى. حالىققا قىزمەت كورسەتۋ ورتالىقتارىنىڭ قىزمەتكەرلەرى  سول بايلانىس نومىرلەرى ارقىلى حابارلاسىپ، قاجەتتى قۇجاتتاردى راسىمدەۋ ءۇشىن تاپسىرىس بەرۋشىنىڭ ۇيلەرىنە بارىپ قىزمەت كورسەتەدى.

جاڭاوزەن  قالاسى اكىمدىگىنىڭ باسپا ءسوز قىزمەتى.