ورىستە مالى، توي-جيىندا باسى قوسىلعان كورشىلەس اقشىمىراۋ، قىزان اۋىلىنىڭ تۇرعىندارى ءۇشىن بەرەكەلى كۇز مەرەكەلى بولىپ باستالدى.

قىزان اۋىلىندا اشىلعان دارىگەرلىك امبۋلاتوريا كوپشىلىكتىڭ كوز قۋانىشى دا، كوڭىل قۋانىشى دا بولدى. اۋدان بويىنشا دارىگەرلەرى تۇراقتى، دەنساۋلىق ساقتاۋ مەكەمەسى قالىپتاسقان اۋىل بولعانىمەن تۇرعىندار جاڭا زاماناۋي اپپاراتتارعا مۇقتاج ەدى. تيپتىك ۇلگىدە سالىنعان ەمدەۋ ورنى سوڭعى ۇلگىدەگى مەديسينالىق قۇرالدارمەن تولىق جابدىقتالعان. فيزيوكابينەت، ءتىس ەمدەۋ بولمەسى، بالالار ءبولىمى مەن ەگۋ كابينەتى، ون توسەكتىك كۇندىزگى جانە تاۋلىك بويى جۇمىس ىستەيتىن امبۋلاتوريادا تەراپيەۆت مەن اكۋشەر قۇلاش سەرمەپ قىزمەت ەتە الاتىن جاعداي بار. 1982 جىلى سالىنعان ەسكى ەمدەۋ ورنىندا كورشىلەس ەكى اۋىلدىڭ تۇرعىندارىنا قالتقىسىز قىزمەت ەتكەن بىلىكتى دارىگەرلەر ازانبەك قۇدايبەرگەنوۆ پەن باقتىلى قونىسوۆامەن قاتار 14  مەيىربيكە جاڭا نىساندا قىزمەتتەرىن باستاپ كەتكەن.

ساسكەگە تامان اۋىل شەتىندەگى جاڭا عيماراتتىڭ الدىنا جينالعان حالىقتىڭ قۋانىشىندا شەك بولماي، اق جاۋلىقتى انالار شاشۋ شاشىپ، اقساقالدار جاعى قول الىسىپ ءبىر-بىرىن قۇتتىقتاپ جاتتى.

  ەل ءۇشىن اق تۇيەنىڭ قارنى جارىلعان كۇن بولعان مەرەكەلى كۇندە وبلىس اكىمى ا.ايداربايەۆ، وبلىستىق ءماسليحات حاتشىسى ب.ءجۇسىپوۆ، وبلىستاعى باسقارما باسشىلارى، اۋدان اكىمى ج.ايتۋاروۆ، ءبولىم، مەكەمە باسشىلارى اۋىل تۇرعىندارىنىڭ قۋانىشىمەن ءبولىستى.

  نىساننىڭ اشىلۋ سالاتاناتىندا ءسوز العان ءوڭىر باسشىسى جينالعان كوپشىلىكتى اتا زاڭىمىزدىڭ 20 جىلدىق مەرەيتويىمەن قۇتتىقتاي كەلىپ، ارنايى قۇتتىقتاۋىن جەتكىزدى.

  - قۇرمەتتى اۋىل اقساقالدارى، اق جاۋلىقتى انالار سىزدەردى بۇگىنگى قۋانىشتارىڭىزبەن قۇتتىقتايمىن! ءسىزدىڭ اۋىلدا اشىلىپ وتىرعان جاڭا ەمدەۋ مەكەمەسى سوڭعى ەكى جىلدا ماڭعىستاۋ اۋىلىندا اشىلعان 7 امبۋلاتوريانىڭ ءبىرى بولىپ وتىر. وتكەن ايلاردا جىڭعىلدى، ۇشتاعان اۋىلدارىنىڭ تۇرعىندارىنىڭ  ءدال وسىنداي قۋانىشىمەن بولىسكەن ەدىك. ءبىز اشىلعان بارلىق جاڭا نىساننىڭ زاماناۋي جابدىقتارمەن قامتىلۋىن قاداعالاپ كەلەمىز، بۇل نىساندا دا بارلىق قاجەتتى مەديسينالىق قۇرال-جابدىقتار بار، سوندىقتان سىزدەرگە ساپالى مەديسينالىق قىزمەت كورسەتىلەتىنىنە سەنەمىن،-دەپ اقجارما تىلەگىن ارناعان ا.سەرىك ۇلىنىڭ يىعىنا قازاقتىڭ داستۇرىمەن اۋىل اقساقالى ت.نۇرلىبايەۆ شاپان جاۋىپ قۇرمەت كورسەتتى.

  جاڭا نىساننىڭ قۇرىلىسىن جۇرگىزگەن «ەلمونتقۇرىلىس» ج ش س ديرەكتورى س.تۇرجان ۇلى سيمبوليكالىق كىلتتى سالتاناتتى تۇردە امبۋلاتوريانىڭ باس دارىگەرى ا.قۇدايبەرگەنوۆكە تاپسىرعاننان سوڭ، وبلىس اكىمى ا.ايداربايەۆ پەن جارتى عاسىرعا جۋىق ۋاقىت اۋىل حالقىنىڭ العىسىنا بولەنگەن دارىگەر ب.قونىسوۆا جاڭا نىساننىڭ لەنتاسىن قيدى.

  كوپتەن كۇتكەن جاڭالىقتىڭ كۋاسى بولعان كوپشىلىك ەمدەۋ ورنىنا قاۋمالاي كىرىپ، وبلىس باسشىسىمەن بىرگە جاڭا نىساننىڭ ءىشىن ارالاپ شىقتى.

  كوپ تىلەگىنىڭ ورىندالۋىنا باس بولعان ءوڭىر باسشىلارىنا العىستارىن ايتقان اۋىل تۇرعىندارىمەن قوشتاسىپ كورشىلەس اقشىمىراۋ اۋىلىنا ات باسىن بۇرعان ەل اعالارىن اۋىل اجارىنا كورىك قوسقان  مادەني كوپشىلىك ورتالىقتىڭ الدىنا جينالعان حالىق قۋانىشپەن قارسى الدى.

  الپىس جىل بۇرىن سالىنىپ اۋىل تۇرعىندارىن قۋانتقان شاعىن كلۋبتىڭ كۇيى كەتكەلى قاشان. اۋىلعا مادەنيەت ءۇيىنىڭ كەرەكتىگى اۋىل اقساقالدارىنىڭ ءوڭىر باسشىلارىنىڭ الدىنا كوپتەن قويىپ جۇرگەن ماسەلەلەرىنىڭ ءبىرى ەدى. ماسەلە وڭ شەشىمىن تاۋىپ، اۋىل تەرريتورياسىنان مۇناي ءوندىرىپ جاتقان «كوممۇناي» ج ش س دەمەۋشىلىگىمەن جاڭا مادەنيەت ءۇيىنىڭ سالىنۋىن اۋىل حالقى كوپ كۇتتى. كوپتەن كۇتكەن قۋانىشتىڭ ولشەمى بيىك بولدى ما، بۇل اۋىلداعى حالىقتىڭ قاراسى كوپ ەكەن. اۋىل ورتالىعىنان بوي تۇزەگەن جاڭا عيماراتتىڭ الدىنا قازاقتىڭ قوس كيىز ءۇيى تىگىلىپ، قۋانىشتى ەسەلەي تۇسەتىن جاعىمدى اۋەندەر ويناتىلىپ، اۋىل ءتورى انگە بولەنۋدە.

  بۇعان دەيىن قۇنى 144 ملن تەڭگە بولاتىن 50 بالاعا ارنالعان بالاباقشا سىيعا تارتقان وندىرىستىك مەكەمە 156 ملن قارجى جۇمساپ 150 كورەرمەنگە شاقتالعان مادەني ورتالىقتىڭ كەلبەتىن كەلىستىرىپ سالىپ بەرىپتى. كەڭ ءارى جايلى نىساندا مادەنيەت قىزمەتكەرلەرىنەن باسقا اۋىل پوشتاسى، كىتاپحانا ورنالاسپاق. وسىعان دەيىن مەكتەپتىڭ ءبىر بولمەسىن پايدالانىپ وتىرعان پوشتاشىلار مەكتەپ جۇمىسىنا كەدەرگى كەلتىرەتىنى كوپ جەردە ايتىلاتىن. بۇل ماسەلەنىڭ دە شەشىمى وڭاتايلى تابىلىپ، زەينەتكەرلەر زەينەتاقاسىن الۋ ءۇشىن كەڭ دالىزدە كەزەككە تۇراتىن بولدى.

  اۋىل تۇرعىندارىن قۋانىشقا بولەگەن دەمەۋشى كومپانيانىڭ باسشىسىنا العىس بىلدىرگەن ا.ايداربايەۆ جاڭا عيمارات رۋحاني ازىقتىڭ ورداسى بولسىن دەگەن تىلەگىن ارنادى. جاڭا نىساننىڭ سيمبوليكالىق كىلتىن مادەنيەت مەكەمەسىنىڭ ديرەكتورى ق.تىندىرعانوۆقا تابىستاعان «كوممۇناي» ج ش س ديرەكتورى ۆ.دۋرمانوۆ قوناقجاي كورشىلەرىنە ءارقاشان قول ۇشىن سوزاتىنىن جەتكىزدى.

  اۋىل تۇرعىندارى اتىنان ءسوز العان ەڭبەك ارداگەرى د.تىلەۋباي ءوڭىر باسشىسى مەن ءوندىرىس ورىنىنىڭ باسشىسىنا العىس ارناپ، ءارقاشان بەكەت اتامىز قولداپ ءجۇرسىن دەگەن تىلەكپەن اتانىڭ وعىلاندىداعى مەشىتىنىڭ پورترەتىن سىيعا تارتتى. اۋىل جاستارىنىڭ تىلەگى قۇرىلىسى اياقتالۋعا جاقىن مەيرامحانا عيماراتىن سپورت كەشەنى ەتىپ جاساقتاۋعا وبلىس، اۋدان باسشىلارىنىڭ  قولداۋى ەكەنىن جەتكىزدى. 

  وبلىس اكىمى جانە دەمەۋشى كومپانيا باسشىسى مەن اۋىل اقساقالى ق.سەرىكوۆ عيماراتتىڭ لەنتاسىن قيعان سوڭ، اۋىل حالقى ەڭسەلى مادەني ورىننىڭ العاشقى كونسەرتىن تاماشالادى.

ماڭعىستاۋ اۋدانى اكىمىنىڭ اپپاراتى

 «قامشى» سىلتەيدى