بۇگىن، 23 قىركۇيەك، وبلىس اكىمى بەيبىت اتامقۇلوۆ جۇمىس ساپارىمەن سايرام اۋدانىندا بولدى. اۋداننىڭ تىنىس-تىرشىلىگىمەن تانىسقان ايماق باسشىسى الدىمەن، اقسۋكەنت اۋىلىنداعى توزىعى جەتكەن «ماقاتايەۆ» جالپى ورتا مەكتەبىنىڭ جاعدايىمەن دە تانىستى.

اتالعان ءبىلىم ۇياسى 1964 جىلى بالاباقشا بولىپ اشىلىپ، 1990 جىلداردان بەرى ىڭعايلاستىرىلعان مەكتەپ رەتىندە جۇمىسىن جالعاستىرىپ كەلگەن. بۇگىندە 400 بالا وقۋى ءتيىس مەكتەپتە 800 بالا ءبىلىم الۋدا. وسى ماسەلەمەن تانىسقان وبلىس باسشىسى الداعى ۋاقىتتا بۇل جايتتى كەڭىنەن قاراپ،جاڭا عيمارات سالۋعا بيۋدجەت قاراستىرۋدى تاپسىردى.

وتكەن جىلى اۋداندا بەس مەكتەپ سالىنىپ، پايدالانۋعا بەرىلسە، بيىل 3 ءبىلىم وشاعى اشىلدى. ال وسى جىلى ءتورت مەكتەپتىڭ قۇرىلىسى جۇرۋدە. ايتا كەتەرلىگى، مەكتەپ نىساندارىنىڭ قۇرىلىسىن جەرگىلىكتى بيۋدجەتتەن سالۋعا قاۋقارلى اۋدانداردىڭ ءبىرى.

ەستەرىڭىزدە بولسا، ق ر ءبىلىم جانە عىلىم ءمينيسترى قازاقستانداعى اپاتتى جاعدايداعى مەكتەپتەر 3-4 جىلدىڭ ىشىندە جويىلادى دەگەن بولاتىن.

– ءبىزدىڭ ەلىمىزدە بۇگىنگى تاڭدا جىل سايىن جۇزدەن استام سۋ جاڭا مەكتەپتەر پايدالانۋعا بەرىلىپ جاتادى. مۇنداي جوبالارعا مەملەكەت تىكەلەي ارالاسىپ قارجى ءبولىنىپ، ارنايى باعدارلامالار اياسىندا ويداعىداي ىسكە اسىرىلىپ كەلەدى. تاپ وسى قارقىنمەن ءجۇرىپ وتىراتىن بولساق، الداعى 3-5 جىل ىشىندە ءبىز رەسپۋبليكامىزداعى مەكتەپتەرگە ءتۇرلى دەڭگەيلى جوندەۋ جۇمىستارىن جۇرگىزۋ جايىن ءبىرجاقتى شەشەتىن بولامىز. سونىڭ ىشىندە ەرەكشە اتاپ ايتارىم، اپاتتى جاعدايداعى مەكتەپتەردىڭ ماسەلەسى تۇپكىلىكتى شەشىلەتىن بولادى، – دەدى اسلان باكەن ۇلى ءوز سوزىندە. 

وقو اكىمىنىڭ باسپا ءسوز قىزمەتى