وڭتۇستىك قازاقستان وبلىسىنىڭ اكىمى ب.اتامقۇلوۆ سارىاعاش اۋدانى قوشقار اتا اۋىل وكرۋگىنە قاراستى جالپى ورتا مەكتەپتە ورىن العان وقىس جاعدايدى ءوزى نازارعا الىپ، قاتاڭ باقىلاماق. ەستەرىڭىزگە سالساق، 12 قىركۇيەكتە سارىاعاش اۋدانىنداعى №81 ماقتاشى جالپى ورتا مەكتەبىندە 2-سىنىپ وقۋشىسى اقەركە سەيىتقۇل سىنىپتى تازالاماق بولعاندا ۇستىنە شكاف قۇلاپ، كوزىنەن اۋىر جاراقات الدى. وسىنىڭ سالدارىنان ءجاسوسپىرىم ءبىر جانارىنان ايرىلدى. بەلگىلەنگەن ءتارتىپ بويىنشا وقىس وقيعا ورىن العان ۋاقىتتان باستاپ ءۇش ساعاتتا جاعدايدى مەكتەپ اكىمشىلىگى بيلىك ورىندارىنا مالىمدەۋى قاجەت. الايدا، جاۋاپتىلار بۇل جايتتى ون كۇن بويى جاسىرىپ كەلگەن. وسىعان وراي، №81 جالپى ورتا مەكتەبىنىڭ ديرەكتورى د.يساكوۆا مەن مەكتەپ ديرەكتورىنىڭ تاربيە ءىسى جونىندەگى ورىنباسارى گ.ەسەنبەكوۆا جانە 2 «ءا» سىنىپ جەتەكشىسى ا.سەرىكبايەۆا اتقارىپ وتىرعان جۇمىسىنان بوساتىلدى. اۋدان اكىمىنىڭ وكىمىمەن ءبىلىم ءبولىمىنىڭ باسشىسى ە.رىسبايەۆتىڭ قىزمەتىنە سايكەس ەمەستىگى تۋرالى ەسكەرتۋ تۇرىندەگى تارتىپتىك جازا قولدانىلدى. بۇگىندە ا.سەيىتقۇلدىڭ جاعدايى ءبىر قالىپتى. بۇل ماسەلە وبلىستىق دەنساۋلىق ساقتاۋ باسقارماسىنىڭ باقىلاۋىندا. ەگەر وتادان كەيىن ەمىن جالعاستىراتىن بولسا، ونى وڭالتۋ ءۇشىن رەسپۋبليكالىق مەديسينالىق مەكەمەلەرگە تەگىن جولداما بەرىلەدى. ءاربىر قىزمەتكەر ءوز جۇمىسىن جاۋاپكەرشىلىكپەن اتقارۋى ءتيىس دەگەن ءوڭىر باسشىسى ب.اتامقۇلوۆ وسى جايتتى ءوز ءجىتى نازارعا الىپ، قاتاڭ باقىلايتىنىن جەتكىزدى.

وقو اكىمىنىڭ باسپا ءسوز قىزمەتى