بۇگىن، 29 قىركۇيەك وڭتۇستىك قازاقستان وبلىسىنىڭ اكىمى بەيبىت اتامقۇلوۆتىڭ توراعالىعىمەن اكىمدىكتىڭ كەزەكتى ءماجىلىسى ءوتتى. جيىن بارىسىندا بىلىكتى دارىگەرلەر مەن مامانداردىڭ جەتكىلىكتى ەكەنىن ايتقان وبلىس باسشىسى ولاردىڭ جۇمىس ىستەۋىنە ءتيىستى جاعدايدىڭ جاسالماي وتىرعانىن جەتكىزدى. ماجىلىستە ءسوز العان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىربايەۆا بيىل 109 مىڭعا جۋىق مۇگەدەك ازامات ەسەپكە تۇرعانىن حابارلادى. ولاردىڭ 38 پايىزى وڭالتۋ شارالارىمەن جانە الەۋمەتتىك قىزمەتتەرمەن قامتىلعان. ال مۇمكىندىگى شەكتەۋلى ازاماتتاردىڭ الەۋمەتتىك نىساندارعا كىرىپ-شىعۋى بويىنشا وڭىردەگى 4083 نىساننىڭ 3316-نا پاندۋستار ورناتۋ قاجەت ەكەنىندە جەتكىزدى. بيىل جوسپارلانعان 621 پاندۋستىڭ بۇگىنگە 50 پايىزى تالاپقا سايكەستەندىرىلگەن. بايانداماشىنى تىڭداعان وبلىس باسشىسى بۇل تۇرعىدا جۇمىستاردى كۇشەيتىپ، پاندۋستاردىڭ تالاپقا ساي سالىنۋىن قاداعالاۋدى جاۋاپتى ماماندارعا تاپسىردى. باسقارما باسشىسىنىڭ ايتۋىنشا، جىل باسىنان بەرى 1500-گە جۋىق مۇمكىندىگى شەكتەۋلى ازامات جۇمىسپەن قامتىلعان. سونىمەن قاتار، باسقارما تاراپىنان ۇيىمداستىرىلعان 16 جارمەڭكەگە قاتىسقان 557 مۇگەدەكتىڭ 40 پايىزىنا الەۋمەتتىك قولداۋ كورسەتىلدى. اكىمدىكتىڭ كەزەكتى ماجىلىسىندە كوتەرىلگەن ەكىنشى ماسەلە مەملەكەتتىك كاسىپورىنداردا ەڭبەك زاڭدىلىقتارىن ساقتاۋ جانە جالاقى قارىزدارىن بولدىرماۋ جايىندا ءوربىدى. وبلىستىڭ باس ەڭبەك ينسپەكتورى باستار ەسقارايەۆتىڭ ايتۋىنشا، جىل باسىنان بەرى مەملەكەتتىك كوممۋنالدى كاسىپورىندارعا 18 رەت تەكسەرۋ جۇرگىزىلىپ، ناتيجەسىندە 57 زاڭ بۇزۋشىلىق انىقتالعان. سونداي-اق، 12 مەملەكەتتىك ۇلەسى بار سەرىكتەستىكتىڭ 78 ميلليون تەڭگەگە جۋىق جالاقى قارىزى انىقتالىپ، بۇگىندە تولىعىمەن تولەندى. جيىندى قورىتىندىلاعان ايماق باسشىسى ەڭبەك زاڭناماسىن ساقتاۋدى، ونىڭ ىشىندە جالاقى قارىزدارىن بولدىرماۋ جونىندە ناقتى تاپسىرمالار بەردى.

وقو اكىمىنىڭ باسپا ءسوز قىزمەتى