م.اۋەزوۆ اتىنداعى قازاق مەملەكەتتىك اكادەميالىق دراما تەاترى 9 قازاندا تاراز قالاسىنىڭ ورتالىق ستاديونىندا جابال ەرعالييەۆتىڭ «قيلى جول» تاريحي دراماسىن قويادى. بۇل تۋرالى «قامشى» پورتالى م.اۋەزوۆ تەاترىنىڭ باسپا ءسوز قىزمەتىنە سىلتەمە جاساي وتىرىپ حابارلايى. جوبا جەتەكشىلەرى: كسرو حالىق ءارتيسى، تەاتردىڭ كوركەمدىك جەتەكشىسى ءاسانالى ءاشىموۆ، ق ر ەڭبەك سىڭىرگەن قايراتكەرى، تەاتر ديرەكتورى ەرلان ءبىلالوۆ. رەجيسسەرى – ق ر ەڭبەك سىڭىرگەن قايراتكەرى اۋباكىر راحيموۆ. رەجيسسەرلەرى: ق ر ەڭبەك سىڭىرگەن قايراتكەرى ا.كاكىشيەۆا، ە.نۇرسۇلتان. سۋرەتشىسى – ق ر ەڭبەك سىڭىرگەن ونەر قايراتكەرى ەسەنگەلدى تۇياقوۆ. ساحنا قوزعالىسى: ءا.بايلين، ۆ.گونچاريەۆ، م.ايدارقۇلوۆ. كومپوزيتورى – ش.بازارقۇلوۆا. ءبيىن قويعان – گ.مۇحامەدجانوۆا.
XVI عاسىر. التىن وردانىڭ ىدىراعان تۇسىندا، جاق-جاق بولىپ ۇرىسقان بايانسىز قان توگىس، قاتىگەز شاپقىنشىلىق مەڭدەتكەن قازاق رۋلارىن ءابىلقايىر حاننىڭ تەپكىسى ءبىر بۇيىردەن قىسا تۇسەدى. تۋىسقان ۇلىستاردىڭ الدىندا ءوزارا باس بىرىكتىرىپ، وردا تىگىپ ورنىعا الامىز با دەگەن ۇلى سىن تۇردى. وسى شاقتا بولات سۇلتاننىڭ ۇلى كەرەي مەن باراق حاننىڭ ۇلى جانىبەك سۇلتاندار بەرەكەگە بەلىن بۋعان ەلدى باستاپ قونىس بولار مەكەن ىزدەپ موعولستان حانى ەسەنبۇعاعا كەلەدى. سول تۇستا شىعىسىندا جۇڭگو، سولتۇستىگىندە ويراتتار، وڭتۇستىگىنەن ابۋسەيىت پەن ءجۇنىس سۇلتاندار شابۋىلداپ، موعولستانعا ءقاۋىپ ءتوڭدىرىپ تۇرعان-دى. ەسەنبۇعا قازاق رۋلارىنىڭ بۇرىنعى اتا قونىسىن ءبولىپ بەرىپ، ىرگەلەس ەل رەتىندە قوندىرىپ، وزىنە قورعانىc تابادى. بۇل كورىنىستەر باسى قوسىلىپ، بەرەكەسى ۇيىسقان قازاق ۇلىستارىنىڭ كەرەي سۇلتاندى اق كيىزگە وتىرعىزىپ حان كوتەرىپ، تاريح ساحناسىنا قازاق حاندىعى كەلگەن ساتكە ۇلاسادى. قويىلىم دالا جاۋىنگەرلەرىنىڭ ۇرىستارى، اقىن-جىراۋلاردىڭ ماقامدارى جانە ۇلتتىق داستۇرلەرمەن ارلەنەدى.
شەجىرە-تاريح ەلىمىزدىڭ ەرتەڭىن جاس ۇرپاققا امانات ەتەدى. قويىلىم ەلباسىمىز نۇرسۇلتان ءابىش ۇلى نازاربايەۆتىڭ تاۋەلسىزدىك، بىرلىك، ازاماتتىق رۋح تۋرالى ويلارىمەن تۇيىندەلەدى.
پىكىر قالدىرۋ