اقتاۋدا زاماناۋي ايالداما ىسكە قوسىلدى. بۇل تۋرالى اقتاۋ قالاسى اكىمىنىڭ باسپا ءسوز قىزمەتى ءمالىم ەتتى.

بۇعان دەيىن قالا اكىمدىگى شاھاردا حالىقتىڭ كۇندەلىكتى ءومىر ساپاسىن جاقسارتۋ ماقساتىندا كاسىپكەرلەرمەن بىرلەسىپ ايالداما سالۋ جۇمىستارى باستالعانىن حابارلاعان ەدى. 

ءقازىر قالا بويىنشا ايالدامالار سالۋ جۇمىستارى قارقىندى جۇرگىزىلىپ جاتىر.

«وزدەرىڭىزگە ءمالىم قالاداعى ەسكى ايالدامالاردا تۇرعىندارعا قولايلى جاعداي جاسالماعان. ياعني، جاز مەزگىلىندە ىستىق، قىس مەزگىلىندە سالقىن. وسىعان وراي تۇرعىنداردىڭ جاعدايىن جاساۋ ءۇشىن ءارى كاسىپكەرلەردى قولداۋ ماقساتىندا وسى جوبانى ىسكە قوستىق»، - دەدى اقتاۋ قالاسىنىڭ اكىمى نۇرداۋلەت قيلىباي.

جاڭا نىسان اقتاۋداعى جوعارى شاعىن اۋداندا ورنالاسقان. وندا اس ىشەتىن شاعىن ورىن مەن اجەتحانا قاراستىرىلعان. ايالدامانى اكىمدىكتىڭ ءبىرىڭعاي ەسكيزىنە ساي جەكە كاسىپكەر سامات تۇلەنوۆ ءوز قاراجاتى ەسەبىنەن تۇرعىزدى.

بۇدان بولەك جوبا اياسىندا تاعى 2 ايالدامانىڭ تولىق قۇرىلىسى اياقتالدى. جىل سوڭىنا دەيىن زاماناۋي 7 ايالداما پايدالانۋعا بەرىلەدى.

ايتا كەتەيىك، ەسكى ايالدامالاردى ءبىرىڭعاي ەسكيزگە ساي قايتا جاڭعىرتۋ جۇمىستارى قاراستىرىلىپ جاتىر.

اقتاۋ قالاسى اكىمىنىڭ باسپا ءسوز قىزمەتى