بۇگىن بارشا قازاقستاندىقتار قازاق حاندىعىنىڭ 550 جىلدىعىن تويلايدى. استانادان باستاۋ الاتىن سالتاناتتى شارا 11-13 قىركۇيەك كۇندەرى ارالىعىندا جالعاسپاق. بۇل تۋرالى "قامشى" پورتالى "كازينفورم" - گە سىلتەمە جاساي وتىرىپ حابارلايدى.

مەرەيتويدىڭ سالتاناتتى اشىلۋى ساعات 11.00-دە استاناداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ قاتىسۋىمەن ورىن الادى. ايتۋلى جيىنعا قوعام قايراتكەرلەرى، ۇكىمەت مۇشەلەرى مەن پارلامەنت دەپۋتاتتارى، تاريحشىلار جانە ب ا ق وكىلدەرى قاتىسادى دەپ كۇتىلۋدە.
سونىمەن قاتار، «قازاق ەلى» الاڭىندا 50 كيىز ءۇي تىگىلىپ، ەكى ۇلكەن ساحنا، سپورت الاڭدارى، التىباقاندار، تايقازان جانە ت.ب. ورناتىلدى. مەرەكەلىك شارانى شامامەن 10 مىڭنان استام ادام قاتىسادى دەپ جوسپارلانعان دەپ حابارلايدى قازاقپارات.
ۇيىمداستىرۋشىلار قالا تۇرعىندارى مەن قوناقتارىنىڭ نازارىنا قىزىقتى ويىن-ساۋىق جانە كونسەرتتىك باعدارلاما ۇسىنادى. ەلىمىزدىڭ ءار ءوڭىرى ۇزدىك حورەوگرافيالىق ۇجىمداردىڭ، انسامبلدەردىڭ، حالىق جانە ەسترادا ونەرىنىڭ سوليستەرىنىڭ قاتىسۋىمەن وتەتىن كونسەرتتىك باعدارلامادان باسقا، كورەرمەندەر نازارىنا «قازاقستاننىڭ ەجەلگى قالالارى» بەينەپرەزەنتاسياسىن، «قازاق ۇلتتىق كيىمىنىڭ تاريحى ارقىلى حالىق تاريحىن جەتكىزۋ» اتتى ءسان فەستيۆالىن، «سيقىرلى بي الەمى» بي فەستيۆالىن، «بىرلىگىمىز جاراسقان» اتتى قازاقستان حالقى دوستىعى كونسەرتىن، «عاسىرلار ءۇنى» ەتنو-كونسەرتى ۇسىنىلادى. بۇدان باسقا، ەتنواۋىلدا جەتىم بالالارعا ارنالعان ەكسكۋرسيا جانە استانالىق دارىندى جاستاردىڭ قاتىسۋىمەن كونسەرت وتكىزىلەدى.
اتالمىش شارادا قازاق كۇرەسى، ارقان تارتۋ، توعىز قۇمالاق، بۇقا تارتىس، ارقان تارتىس، اسىق اتۋ سىندى ۇلتتىق سپورت تۇرلەرىنەن جارىستار ۇيىمداستىرىلادى. مەرەكەلىك شارالار باعدارلاماسىنا ساندىك-قولدانبالى ونەر كورمە-جارمەڭكەلەرى، حالىق شەبەرلەرىنىڭ شەبەرلىك دارىستەرى ەنگىزىلدى.
بارلىق وبلىستاردىڭ ۇلتتىق كيىم كيگەن وكىلدەرىنىڭ شەرۋى ءۇش كۇنگە جالعاساتىن مەرەكەنىڭ كوركىن كەلتىرمەك. شارا 12 قىركۇيەكتە ساعات 10.00-دە «قازاق ەلى» مونۋمەنتىنىڭ الدىنداعى الاڭدا وتپەكشى. وسى كۇنى ساعات 19.00-دە وڭىرلەردىڭ ەڭ ۇزدىك نومەرلەرى گالا-كونسەرتتە كورەرمەندەر نازارىنا ۇسىنىلادى.
"قامشى"  سىلتەيدى