اتىراۋ عالىمدارى وڭىردە بولماعان جەم-شوپ داقىلىنىڭ جاڭا سۇرىپىن ءوسىرىپ شىعاردى. بۇل داقىل «سارايشىق» ءيىرتىس تۇيەجوڭىشقا دەپ اتالادى. بۇل تۋرالى "قامشى" پورتالى قازاقپارات -قا سىلتەمە جاساي وتىرىپ حابارلايدى.

-بۇل داقىل جۇگەرى مەن جوڭىشقاعا قاراعاندا ىلعالعا اسا مۇقتاج ەمەس. ال ونىمدىلىگى ەكى ەسە جوعارى. كاسپيي ماڭىنداعى تۇزدى جەرلەردە مۇنداي جوعارى ونىمدىلىكتى ەشبىر جەم-شوپ داقىلى قامتاماسىز ەتە المايدى، - دەدى وڭتۇستىك-باتىس مال شارۋاشىلىعى جانە وسىمدىك شارۋاشىلىعى ءعزي-دىڭ اتىراۋداعى فيليالى سەكتورىنىڭ مەڭگەرۋشىسى بولات مۇزامبەتوۆ.

جاڭا جەم-شوپ سۇرىپىنا ءبىرىنشى كەزەكتە جەرگىلىكتى مال وسىرۋشىلەر قىزىعۋشىلىق تانىتتى. 

العاش ەككەن كەزدە «سارايشىق» تۇيەجوڭىشقاسىنىڭ ونىمدىلىگى بويىنشا 1 گەكتاردان 624 سەنتنەر الدىق. نەگىزىنەن، ول گەكتاردان 800-1110 سەنتنەر دەڭگەيىندە ءونىم بەرەدى. تۇيەجوڭىشقانىڭ ءبىر ورىمىنىڭ ونىمدىلىگى جوڭىشقانىڭ كەم دەگەندە ءۇش ورىمىنا تەڭ.
اتىراۋلىق عالىمداردىڭ جۇمىسىنا قىزىلوردا وبلىسى دا قىزىعۋشىلىق تانىتتى. گرانتتىق جوباعا عالىمدار ازىرلەگەن ءوتىنىم «سارايشىق» تۇيەجوڭىشقاسىنىڭ ەليتالىق تۇقىمىن جىلىنا 4 مىڭ توننا دەڭگەيىنە جەتكىزۋدى قامتاماسىز ەتەدى. بۇل اتىراۋ وبلىسىنىڭ تاعى ءبىر «برەندى» دەسە بولادى.