«بيزنەستىڭ جول كارتاسى-2020» باعدارلاماسىنىڭ ارقاسىندا جامبىل وبلىسىنىڭ سارىسۋ اۋدانىنان شىعاتىن ءونىم كولەمى 106%-عا جەتكەن. بۇل تۋرالى "قامشى" پلورتالى Baq.kz -كە سىلتەمە جاساي وتىرىپ حابارلايدى.
وعان ۇلەس قوسىپ جۇرگەندەردىڭ ءبىرى باقىتجان تامايەۆ. ول مەملەكەت كورسەتكەن قولداۋدىڭ ارقاسىندا پلاستيك ەسىك-تەرەزە شىعاراتىن قوسىمشا سەح اشىپ العان. ءقازىر شاعىن كاسىپورىن جەرگىلىكتى سۇرانىستى قامتاماسىز ەتىپ وتىرعان بىردەن ءبىر كەشەن. «FTM» جاۋاپكەرشىلىگى شەكتەۋلى سەرىكتەستىگىندە قۇرىلىسقا قاجەتتى زاتتار دايىندالادى. مۇندا ءۇي جيھازدارى، تەمىردەن قاقپا، شارباق جاسايتىن بىرنەشە سەح جۇمىس ىستەيدى. سوڭعى كەزدەرى پلاستيك ماتەريالدان جاسالاتىن قۇرىلىس زاتتارعا سۇرانىس جوعارى بولعاندىقتان كاسىپكەر وسىعان دەن قويعان. مەملەكەتتىك باعدارلامامەن جەڭىلدەتىلگەن نەسيە الىپ، قاجەتتىنىڭ ءبارىن الدى.
باقىتجان تامايەۆ، كاسىپكەر: - بيىل تاعى دا وسى بانكتەردەن تۋرا وسى باعدارلاما بويىنشا 10%-ى سۋبسيديالاناتىن 12،8 ميلليون نەسيە الدىق. جۇڭگو مەملەكەتىنەن قۇرال-جابدىقتى الىپ كەلدىك. جۇرگىزىپ جاتىرمىز. شەتەلدەن اكەلگەن زاماناۋي قۇرىلعى جارتىلاي اۆتوماتتاندىرىلعان. قىتايلىق ماماندار جەرگىلىكتى جۇمىسشىلاردى ءبىر اپتاداي وقىتىپ، تەحنيكانىڭ ءتىلىن ۇيرەتكەن. ءقازىر مۇنداعى جۇمىسشىلار وتاندىق ءونىم شىعارىپ، جەرگىلىكتى سۇرانىستى قامتاماسىز ەتىپ وتىر. ءقازىر شاعىن سەحتا كۇنىنە 10-نان استام ەسىك-تەرەزەگە دەيىن دايىندالادى. تاپسىرىس تۇسسە، ءونىم كولەمىن ەكى ەسەلەۋگە مۇمكىندىك بار. جالپى اۋداندا شاعىن جانە ورتا كاسىپكەرلىكتى دامىتۋ باعىتىندا ەڭبەك ەتىپ جاتقان 1256 جەكە كاسىپكەر، 95 جاۋاپكەرشىلىگى شەكتەۋلى سەرىكتەستىك، مالشارۋاشىلىعىمەن اينالىساتىن 529 شارۋاقوجالىق بار.
جۇمات ساحىپبەكوۆ، سارىسۋ اۋداندىق كاسىپكەرلىك جانە ونەركاسىپ ءبولىمىنىڭ باسشىسى: - اۋدانداعى جالپى شاعىن جانە ورتا بيزنەستىڭ بۇگىنگى كۇنگە جىل باسىنان بەرگى 8 ايداعى ءونىم كولەمى 1 ملرد 715 ميلليون تەڭگەنى قۇراپ وتىر. بۇل بىلتىرعى جىلمەن ەسەپتى كەزەڭمەن سالىستىرعاندا 106%-دى قۇرادى. سوڭعى ەكى جىلدا سارىسۋ اۋدانىندا «بيزنەستىڭ جول كارتاسى-2020» باعدارلاماسى بويىنشا 17 جوبا ىسكە اسىرىلدى. وعان 135 ميلليون تەڭگە نەسيە بەرىلگەن.
