سالاعا جەكە ينۆەستيسيالاردى تارتۋ ءۇشىن قازاقستاندا تەمىرجول جولاۋشىلار تاسىمالىندا سۋبسيديالاۋ تەتىكتەرىن وزگەرتۋ جوسپارلانىپ وتىر. بۇل تۋرالى بۇگىن استانادا تەمىرجول كولىگىن دامىتۋعا ارنالعان كەڭەستە ق ر يدم كولىك كوميتەتى تەمىرجول كولىگى باسقارماسىنىڭ باسشىسى نۇربەك قابيجان ءمالىم ەتتى. بۇل تۋرالى "قامشى" پورتالى قازاقپاراتقا سىلتەمە جاساي وتىرىپ حابارلايدى.
ونىڭ سوزىنە قاراعاندا، جاڭا جولاۋشىلار ۆاگوندارىن الۋ ءۇشىن تاسىمالداۋشىلاردىڭ زاەمدىق قارجىسى ەسەبىنەن تەمىرجول جولاۋشى كولىگىنە ينۆەستيسيا تارتۋدىڭ تەتىگىن جاساۋ ماقساتىندا زاڭناماعا وزگەرىستەر ەنگىزۋدىڭ قاجەتتىگى تۋىنداۋدا.
وسىعان بايلانىستى ءبىرىنشى كەزەكتى ءىس-قيمىلداردىڭ 2015 جىلعا ارنالعان جوسپارىنا سايكەس، ينۆەستيسيا تارتۋدىڭ قۇقىقتىق شارتتارىن جاساۋ تۇرعىسىندا ءتيىستى زاڭ جوباسى ازىرلەندى.
اتالعان قۇجاتتا جولاۋشىلاردى تاسىمالداۋدى سۋبسيديالاۋ تەتىگىنە وزگەرىستەر ەنگىزۋ مەن نەگىزگى اكتيۆتەردى جاڭارتۋدىڭ ۇزاق مەرزىمدى نەگىزدەگى نورماتيۆتىك-قۇقىقتىق شارتتارىن جاساۋ قاراستىرىلعان.
«سۋبسيديالاۋ تەتىگىن وزگەرتۋ قارجىلاندىرۋدىڭ اشىقتىعىن ارتتىرادى، سونداي-اق تاسىمالداۋشىلارعا جىل سايىن شامامەن 150 جاڭا ۆاگون ساتىپ الۋىنا جانە ءبىر جىلدا 25 ملرد. تەڭگە ينۆەستيسيا تارتۋىنا مۇمكىندىك اشادى»، - دەدى ن. قابيجان.
