«قازاقستان – 2050» جالپىۇلتتىق قوزعالىسىنىڭ دەمەۋشىلىگىمەن ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىندە قازاق حاندىعىنىڭ 550 جىلدىعىنا ارنالعان كورمە اشىلدى. بۇل تۋرالى "قامشى" پورتالى ايقىنعا سىلتەمە جاساي وتىرىپ حابارلايدى.
كورمەگە فيلولوگيا، تاريح فاكۋلتەتىنىڭ وكىلدەرى قاتىستى. قازاق حاندىعىنىڭ 550 جىلدىعى قارساڭىندا جۋرناليستيكا فاكۋلتەتىنىڭ ستۋدەنتتەرى «فوتوونەر» قوعامدىق بىرلەستىگىمەن جامبىل – شۋ –مويىنقۇم اۋداندارىندا فوتوەكسپەديسيا وتكىزدى. كورمەگە ەكسپەديسيا بارىسىنداعى فوتوتىلشىلەر مەن ستۋدەنتتەردىڭ ۇزدىك جۇمىستارى قويىلدى.
سونداي-اق ءبىلىم جانە عىلىم مينيسترلىگىنىڭ «ەلدىڭ ينتەللەكتۋالدى الەۋەتى» مەملەكەتتىك باعدارلاماسى اياسىندا فاكۋلتەتتىڭ جاس عالىمدارى «قازاق ەلى» ستۋدەنتتىك عىلىمي ەكسپەديسياسىن ۇيىمداستىرىپ، ايماقتارعا زەرتتەۋلەر جۇرگىزدى. ەكسپەديسيانىڭ نەگىزگى ماقساتى – بۇۇ مادەني مۇرانى ساقتاۋ تۋرالى حالىقارالىق كونۆەنسياسىنا سايكەس قازاق حالقىنىڭ قۇندىلىقتارىن تانىتۋ، زەرتتەۋ جانە ساقتاۋ. ستۋدەنتتىك ەكسپەديسيانىڭ ەندىگى نىسانى – قىزىلوردا، قوستاناي، اقمولا، قاراعاندى وڭىرلەرىنە زەرتتەۋ جۇرگىزۋ. «قازاق ەلى» ستۋدەنتتىك عىلىمي ەكسپەديسياسىنىڭ قورىتىندى جۇمىستارى كورمەگە ۇسىنىلدى.
اسىلحان ءابدىرايىم، «فوتوونەر» قوعامدىق بىرلەستىگىنىڭ ءتوراعاسى، اعا وقىتۋشى:
– قازاق حاندىعىنىڭ 550 جىلدىعىنا وراي ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ فوتوجۋرناليستيكاعا قىزىعۋشىلىق تانىتىپ جۇرگەن ستۋدەنتتەرى، «فوتوونەر» قوعامدىق بىرلەستىگى مەن رەسپۋبليكالىق، قالالىق گازەتتەردىڭ ءفوتوتىلشىلەرى ماۋسىم ايىندا جامبىل – شۋ – مويىنقۇم اۋداندارىنا فوتوەكسپەديسيا وتكىزدى. مۇنداعى ماقسات – قازاق حاندىعىنىڭ العاشقى ۋىق قاداعان جەرىمەن تانىسۋ، تاريحقا ءۇڭىلۋ جانە ەكسپەديسيا بارىسىندا ستۋدەنتتەرگە فوتوتىلشىلەردىڭ شەبەرلىك سىنىپتارىن وتكىزۋ. كونە عاسىرداعى «اقىرتاس» قالاشىعى، شۋ وڭىرىندەگى قوزىباستاۋ تاۋى، سول ايماقتاعى «حانتاۋ» وڭىرىندەگى تاريحي جادىگەرلەرمەن تانىستىق. سول فوتوەكسپەديسيادا تۇسىرىلگەن ۇزدىك سۋرەتتەر كورمەگە قويىلدى. ال استانا قالاسىنداعى تەاترلاندىرىلعان قويىلىم كورىنىستەرىنىڭ اۆتورى – ەدىل ورمانوۆ. كورمەدە فوتوتىلشىلەر مەن ستۋدەنتتەردىڭ ەڭبەكتەرى قامتىلدى. بۇكىل ەل بولىپ تويلاپ جاتقان تاريحي ۇلى مەرەكەگە سۋرەت ارقىلى ءوز ۇلەسىمىزدى قوسقىمىز كەلدى. يگى باستاماعا جامبىل وبلىسى اكىمدىگى مەن «نۇر وتان» پارتياسىنىڭ وبلىستىق فيليالى قولداۋ كورسەتتى.
گۇلميرا سۇلتانباي، «باسپا ءسوز جانە ەلەكتروندى ب ا ق» كافەدراسىنىڭ مەڭگەرۋشىسى، پروفەسسور:
– بيىل ءۇشىنشى رەت ۇيىمداستىرىلىپ وتىرعان ەكسپەديسيانىڭ تاقىرىبى قازاق حاندىعىنىڭ 550 جىلدىعىنا ارنالدى. نەگىزگى ماقساتى – جاس عالىمدار مەن ستۋدەنتتەرگە قازاق جەرىنىڭ ۇلتتىق قۇندىلىقتارىن تانىتۋ، زەرتتەۋ. ءۇش جىل قاتارىنان يۋنەسكو-نىڭ الماتىداعى كلاستەرلىك بيۋروسى، بۇۇ-نىڭ اقپاراتتىق بيۋروسى تىكەلەي قولداۋ كورسەتىپ، كەڭەستەر بەرىپ كەلەدى. 20 كۇنگە سوزىلاتىن ەكسپەديسيادا ستۋدەنتتەر ەل تاۋەلسىزدىگىنەن بەرى قارايعى وڭىرلەردەگى حالىقتىڭ تۇرمىس-تىرشىلىگى، سول ايماققا ءتان ۇلتتىق قۇندىلىقتارى، ءسالت-داستۇر ەرەكشەلىكتەرى جانە تاعى باسقا مادەني-تانىمدىق زەرتتەۋلەرگە كوپ كوڭىل بولەدى. بۇدان بولەك قازاق دالاسىنىڭ، تاريحي باي قالالارىنىڭ فوتوكارتاسىن جاساۋدى قولعا الدى. ياعني، «googlemap»، «ياندەكسmap»-تىڭ تەگىن رەسۋرستارىن پايدالانا وتىرىپ، ستۋدەنتتەر ارالاعان ايماقتاردىڭ كارتاسىن سىزىپ وتىرۋ. بۇگىن ءۇش ەكسپەديسيانىڭ قورىتىندىسىن كورمەگە قويدىق.
