قازالى اۋدانىندا ءبىلىم بەرۋ ۇيىمدارى ەلەكتروندى وقىتۋ جۇيەسىنە كوشەدى. بۇل تۋرالى ءبىلىم بەرۋ ساپاسىن ارتتىرۋ جانە نەگىزگى كورسەتكىشتەردى كۇشەيتۋ جونىندە ماجىلىستە بەلگىلى بولدى. قازىرگى تاڭدا بۇل جۇيە بويىنشا ءبىرقاتار مەكتەپتەر ەكسپەريمەنت رەتىندە جۇمىس جاساپ جاتىر. ال وسى وقۋ جىلى №16، 170، №216، №226، №190 مەكتەپتەر اتالمىش جۇيەگە كوشەدى دەپ كۇتىلۋدە. ەلەكتروندى وقىتۋ جۇيەسى ەنگەن ءبىلىم بەرۋ ۇيىمدارى قاجەتتى جابدىقتارمەن: مونوبلوكتار، ينتەرنەت جەلىسى، كومپيۋتەرلىك تەحنيكا، ينتەراكتيۆتىك جابدىقتارمەن قامتاماسىز ەتۋ جۇمىستارى جۇرگىزىلۋدە، دەپ حابارلايدى وبلىستىق اكىمدىكتىڭ باسپا ءسوز قىزمەتى. بۇل تۋرالى "قامشى" پورتالى قازاقپاراتقا سىلتەمە جاساي وتىرىپ حابارلايدى.

بۇدان وزگە جيىن بارىسىندا ءبىلىم ساپاسىن ارتتىرۋ، ۇلتتىق ءبىرىڭعاي تەستىلەۋگە وقۋشىلاردىڭ 100 پايىز قاتىسۋىن قامتاماسىز ەتۋ، تاربيە جۇمىستارى، جاس مامانداردى جۇمىسقا تارتۋ، كادرلاردىڭ بىلىكتىلىكتەرىن ارتتىرۋ ماسەلەلەرى تالقىلاندى. سونداي-اق، بiلiم بەرۋدi دامىتۋدىڭ 2011-2020 جىلدارعا ارنالعان مەملەكەتتiك باعدارلاماسى مەن «بالاپان» باعدارلاماسىنىڭ ورىندالۋ بارىسى دا باياندالدى.

اۋدان اكىمى ناجمادين شامۇراتوۆ اتالعان ماسەلەلەرگە قاتىستى مەكتەپ باسشىلارى مەن ۇستازدار قاۋىمىنا ءبىرقاتار تاپسىرمالار بەرىپ، «بىلەككە ەمەس، بىلىمگە سەنەتىن زاماندا» وقۋشىلاردىڭ ساپالى ءبىلىم الۋىنا جاۋاپكەرشىلىكپەن قاراۋدى تاپسىردى.