بۇگىن قىزىلوردادا قالا كۇنىن مەرەكەلەۋ «شۇبات-قىمىز» فەستيۆالىمەن باستالدى. ۇلتتىق سۋسىندى ۇلىقتاعان شاراعا قالا مەن اۋدانداردىڭ بارلىعىنان دەرلىك شارۋالار كەلىپ قاتىستى. بۇل تۋرالى "قامشى" پورتالى قازاقپاراتقى سىلتەمە جاساي وتىرىپ حابارلايدى.

فەستيۆالدا ايماق باسشىسى قىرىمبەك كوشەربايەۆ قىزىلوردالىقتاردى مەرەكەلەرىمەن قۇتتىقتادى.

بۇگىندە سىر وڭىرىندە قىمىز-شۇباتقا سۇرانىس ارتىپ كەلەدى. «سوندىقتان قىمىزحانا جەلىلەرىن كەڭەيتىپ، قىمىز ءوندىرۋ تەحنولوگياسىن دامىتۋ كەرەك» - دەيدى ماماندار. بۇگىندە جىلقىنىڭ ءسۇتى - ۇلتىمىز ءۇشىن قارجى تابۋدىڭ كوزى عانا ەمەس، ەمدىك قاسيەتى مول ءونىم سانالادى. ياعني، ۇلتتىق برەندكە اينالىپ وتىر.

فەستيۆالعا 2 مىڭ ليتر شۇبات، 1500 ليتر قىمىز جانە ءسۇت ونىمدەرىنەن جاسالعان قۇرت، ىرىمشىك اكەلىنگەن. سونداي-اق، قازاقى ناقىشتا دايىندالعان قولونەر بۇيىمدارى دا كورمە تورىنەن ورىن الدى. ايماق باسشىسى كورمەنى ارالاپ شىعىپ، ۇلتتىق سۋسىننان ءدام تاتتى. مەرەكەلىك شارادا قالا جاستارى «قارا جورعا» ءبيىن بيلەسە، اتا-اجەلەر ۇلتتىق داستۇرلەردى كورسەتتى.

- ءتورت تۇلىكتىڭ تورەسى تۇيە مەن قامبار اتانىڭ سۋسىندارى ءتۇرلى دەرتكە داۋا ەكەندىگىن اتا-بابامىز الدەقاشان دالەلدەگەن. سول سارا جولدى جالعاپ، بۇگىن قالا كۇنى مەرەكەسىن اقتان ءدام تاتىپ باستاپ وتىرمىز. مەرەيلى مەرەكە قۇتتى بولسىن، - دەدى وبلىس اكىمى ق.كوشەربايەۆ.

فەستيۆال ۇلتتىق ويىندارمەن جالعاستى. بالۋاندار بەلدەسى، اسىق اتۋ، گىر كوتەرۋ، قول كۇرەستە مىقتىلار انىقتالدى.

جالپى، قالا كۇنى مەرەكەسى بيىل كەڭ كولەمدە اتالاپ وتىلەدى. قاۋىن-قاربىز، كونديتەرلىك ونىمدەر جانە بالالار شىعارماشىلىعى فەستيۆالى، جاس اقىندار ءمۇشايراسى، اۋىل شارۋاشىلىق جارمەڭكەسى، سپورتتىق سايىستار ۇيىمداستىرىلىپ، الەۋمەتتىك نىساندار پايدالانۋعا بەرىلەدى. قالا كۇنى ەسترادا جۇلدىزدارىنىڭ قاتىسۋىمەن وتەتىن گالا-كونسەرتپەن قورىتىندىلانادى.